全職獵人FullTime Headhunter

一個中環Headhunter,遊走於各大企業、不停挖角。澳洲回流,全職獵頭,兼職旅人。風流不下流,靠把口搵食。純粹分享每日光怪陸離、有血有淚的獵頭生活。

More Blogs

係,我哋真係好迷信。無可否認我哋呢行大部份人都會好迷信,有自己獨特嘅增運手法。試過一間公司個外籍老闆新年一定要請師傅睇風水、佈局,請舞獅上office向我哋掟菜,難得有位女同事好Enjoy比人掟菜落塊面,當時我大為不解,相隔幾年問佢先知原來比人掟「財」响面係佢一個小小的開年儀式,覺得被祝福。初入行時,都遇過一啲迷信同事,試過特登買兩棵樹擺响Office,又試過有位前輩一個星期總會有一日10:17開工,因為係吉時。又有男同事連續一個禮拜都着同一條粉紅色底褲,因為嗰個星期要Close Deal. 最特別係一位女同事每次同Candidate present offer之前都會對住佢枱頭個麵包超人傾幾句計,因為佢相信麵包之神會幫到佢。但係通常呢,連我自己在內都會係枱頭擺啲綠色植物去旺財。

公司有盞神燈,佢係我之前上司送俾我嘅禮物,佢話每逢有Deal之前捽下佢,就好大機會Close到張單。自己試呢就覺得呢盞神燈好準,尤其係一啲大單:CEO,CFO𠴱啲,做完Final Round,捽一捽佢就有Offer。不過我估燈神都係對人,我之前上司坐左半年,捽到隻手起枕都係蛋都未生一隻。

呢啲野真係信則有不信則無。Thomas Jefferson講過:”I am a great believer in luck, and I find the harder I work the more I have of it” 真心覺得You create your own luck係永恆不變的道理。學我前老闆話齋,含淚播種的人一定能含笑收穫。

正如我依家夜晚九點半仲係機場入邊等我個Candidate落機,為嘅只係同佢傾10分鐘。我相信努力會有回報。

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!