其實HR一樣怕見工

其實HR一樣怕見工

HR熊 - 職場航行日誌

人事部工作既小妹,見盡唔少公司既「人」同「事」,係呢個平台上一齊分享職場上既苦與樂,笑與淚。

More Blogs

有朋友經常係收到約Interview電話或者電郵後,就叫我俾貼士點樣覆人好啊,點樣準備會萬無一失啊,著咩衫最恰當啊,連珠發炮咁轟炸我。最準確最想知Standard答案真係應該問番果間公司嘅HR,只要Make sense唔怕問,答你問題係佢工作之一。

我都好怕恃著自己做開,懶醒估一般情況係咁,但到頭來人地有特別要求而你無做到失分!好多人以為做得HR,對各式各樣嘅Interview流程瞭若指掌,亦見識唔少Candidates嘅對答,理應偷咗咁多師,好易捉摸到Interviewer心理,仲有咩好驚啊?真係唔好咁多以為,有時知得愈多反而愈捉唔到路。

小熊每次見到一班又班Candidates喺Waiting room緊張地等待,無論係做Test又好Interview又好,唔好講表現如何,起碼人地有份心想改變,肯行出第一步執靚份CV,而又清楚自己有相關嘅才能有機會被挑選出嚟,小小嘅努力係值得被尊重。所以我都盡量表現得友善啲,無謂喺啲無關痛癢嘅接待上面令人有壓力,另一方面係自私地想洗脫一下大家對HR嘅負面印象。

有時自己Sit in喺Interview裡面,不其然會代入咗角色,Technical問題大家通常都答得不相伯仲,就要玩下處境題考反應和態度嚟分勝負。有啲刁鑽嘅題目我聽到時都會心跳加速埋一份,答得普通無意思,專登拋書包又唔知Interviewer buy唔buy,但你已經無時間去衡量咁多野,因為Dead air得太耐會好尷尬,然後就會迅速磨蝕晒僅存嘅自信。

小熊作為HR上去人地Office見工,人地HR可能一見到我已經開始打分,因為Suppose我應該好清晰中Point有禮嘅對答係點,唔好問多餘嘅問題浪費大家時間。而學歷和工作證明必定係準備充足,帶定正本副本相片,有齊資料完美地填好份Application form!呢啲所有細節位都要好謹慎,自己平時就係幫Candidate check呢啲文件有無出錯,自己唔細心和淡定啲真係對唔住做緊嘅崗位。

其實,我只認為做HR耐性應該會比其他人小勝一籌,其他嘅都無大分別。試過老闆吩咐落約一班Candidates喺同一個鐘數嚟,然後逐個In,排前面嘅當然無問題,但後面嘅可能白白等超過唔止一小時。當然有Candidate因為咁而著晒向HR發火,自己做呢行就會多多體諒嘅,反正果個Moment已經肉隨砧板上,一係等,一係走。

就算做開HR,對Interview有滿腦子方案,都無可能100%準確預計到所有問題,你要知道,大把Interviewer鍾意睇人愕然、緊張嘅反應,多過聽到Model answer,所以唔一定係Job related嘅問題,隨時問你一條時事、玩Group interview、看圖作文殺你一個措手不及就KO你!

所以,準備心情先係重點,簡單一句平常心,係啱嘅。

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!