和你非‧你份Report唔OK

和你非‧你份Report唔OK

盈力僱員服務顧問

盈力僱員服務顧問是「基督教家庭服務中心」轄下的服務單位,自1993年起為公私營機構提供僱員輔助計劃(Employee Assistance Program,簡稱EAP)。盈力服務超過300間公私營企業,逾40萬僱員。我們多年來與僱主結成伙伴,透過提供僱員輔導、職場培訓、危機介入、管理顧問等,以推廣僱員身心健康為己任,為職場注入色彩。

More Blogs

這裡嘅非,所指嘅係工作過失,先睇睇以下對話再解說:

上司:你過一過嚟!

下屬:係……

上司:琴日你同Mike交嚟份嘢你覺得自己做成點?

下屬:Hmmm…邊方面有意見?

上司:你交個Report啲數字錯㗎喎!尾二行64.5及尾三行67.6嘅總和,加埋點會係整數!唔使計數機都知啦!

下屬:Sorry,我宜家去改……

做細嘅‧錯要認

呢個Report嘅錯未必令下屬大為失分,但如果同事想保住飯碗,下次麻煩校閱多多幾次先交貨。累積多一兩次錯,上司對之表現愈嚟愈唔放心,之後交嘅貨亦比之前Check得更嚴謹,同事可能要好耐先洗到底;如果情況愈嚟愈壞,以往辛苦建立嘅分分鐘一鋪清袋。值得一提嘅係,事例中嘅下屬無死撐、無推卸,如果本身上司已狀甚憤怒,就算同事有合理解釋,都吞返落肚先,解咗當前嘅結至為緊要。

管理人‧批評前先定位

管理人平時雖然都受唔少做細嘅閒氣,但批評前一般都會睇環境,即係下屬嘅往績、公司現行人手、人力巿況而決定你嘅定位,輕則提醒,隨嚴重程度而愈變強硬。

提醒/勸喻:下屬若然態度受教,並迅速改正,仲識主動匯報補鑊方案進度,愚子可教,下次話佢時都留有一線都仲得。管理人喺同下屬傾之前有時需要做搜證,指出時具體陳述錯處,佢嘅過失帶嚟嘅影響。例如,雖然份Report未必會為公司帶嚟虧損,但都可以具體哋帶出同事嘅誤失,會影響客戶對公司的印象,公司對佢的評價,及至對團隊嘅影響等。

責備/警告:「你覺得做成點?唔使計數機都知」呢啲略帶火氣嘅說話,反映同事有可能係一個慣犯。對於重複犯錯嘅下屬,管理人甚至要對方講出改善方案,若然下屬交唔出或白交,管理人或須清楚提出期望,即使非量化嘅工作,亦盡可能化成可量化嘅目標。例如未來一個月內達到指標,對犯錯同事嚟講更易於掌握。

反映進步

單單以理,往往服不了人,因為沒有人喜歡承認自己有錯。心理學家B.F.Skinner的動物實驗結果是,因好行為受賞的動物,其學習快,持續力久,人同此理。因此,事後下屬如果有改善,記得反映進步。話人只要集中講件事,讚人不得不提同事為人。「上次個系統出事,你好快同IT settle,而且提醒所有人系統恢復,返確保運作正常,好欣賞你主動及為大局著想。」呢個好重要,上司肯咁講,做細嘅沒齒難忘,當然……同事本身待DQ不在此列。

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!