投身社會前的寶貴實習經驗
郭美德 Joanna Kwok
香港恒生大學企管發展中心總監、伍絜宜創新及創業中心榮譽顧問，專責籌備行政人員課程及企業培訓；擁有豐富市場營銷、公關、管理及培訓行政人員經驗；碩士課程顧問及學生導師。
More Blogs早幾日（2月26日），我去左另一間母校（科大）同 一批School of Business嘅同學分享點樣建立個人品牌，並為Career作好準備。我發現出席嘅同學主要係一、二年級，佢地咁快就開始留意呢方面嘅事，非常醒目；但亦有四年級嘅同學仍未試過實習，其實咁樣係有少少蝕底嘅。相比之下，我現時任職嘅學校——恒管，就有唔少Year One嘅學生已經好緊張去準備何時要搵Internship。
我諗而家唔似我哋以前嘅年代，我畢業嗰陣真係未做過寫字樓工，連Filing都唔識。而家嘅畢業生普遍都有一D工作經驗，大部分嘅僱主都願意為學生提供實習嘅機會，咁當然係要自己爭取、申請啦。
做實習好重要，一來學生有機會認識多啲社會上不同機構及行業、工種，以至公司文化，不同工作崗位，而最重要就係真真正正學習吓點樣返工，率先感受一下上班氣氛同埋工作嘅生涯。完成實習後再返學校慢慢調適，就可以更清楚自己喜歡做D乜野工作；甚至乎未想咁快出嚟做嘢，仲可以繼續進修。
實習可以讓學生認識不同行業、工種，真真正正學習吓點樣返工。（圖片來源：BillionPhotos.com）
當你未踏足社會工作之前，往往會對自己嘅前路，甚至乎心目中想做嘅工作好模糊。所以有機會做實習，又或者Part Time工作，其實係最理想不過。咁當然有啲同學可能會希望畢業後做Management Trainee ，但係每一間公司嘅名額都唔多，通常只限於一D比較大規模嘅公司。咁如果你係做Intern已經有好表現，其實好大可能嗰間公司都會請返你做長工。令你同一D畢業後至去搵工嘅同學比較下，可以勝人一籌。呢個係我個人比較深刻嘅體會，亦都係而家我同好多HR傾計後，得出嘅一個結果。
唔少公司都好希望可以揀選到有潛質嘅實習生，因為要建立Talent Pool 亦非易事，請唔到D可以培育嘅人才（Future Leaders），就會出現人才斷層。而市場上亦都唔容易請到合適人才，貿貿然請一個新人返嚟，後來至發現佢態度唔好，或者訓練完一輪先至發覺性格唔啱、表現唔理想，都會係浪費大家時間 。
所以Internship係唔少企業「偷步」預先揀卒嘅機會，係機構為將來請Full Time員工嘅一個重要Screening 步驟， 同學們要好好把握每一個實習嘅機會。
新的一年，我希望大家都以提升個人能力為目標，加強語文能力（英文及普通話）、 溝通表達能力、 EQ情商及AQ抗逆能力，最後，多作團隊合作項目，学習欣賞别人的優點；包容他人的缺點，主動服務團隊，不要斤斤計較付出，這樣，你將收獲更多！
狗年剛至，祝你們萬事勝意，身體健康！過豐收美滿的一年！
(聯絡電郵：edcdirector@hsmc.edu.hk )
以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
