媽劇停週記：月入二萬九，妄想買層樓

我今個月升咗職做Assistant Marketing Manager ，人工加咗15%，有$29,000一個月。我好開心。

呢股開心嘅情緒衝昏咗我嘅頭腦，因為兩個星期前我萌起買樓嘅念頭。我開始去地產鋪睇下行情，上網做下資料搜集。自此，我由好開心，變得好唔開心。而我廿幾年對數字嘅一貫概念，亦第一次被完全扭曲。

當你稍為將首期、印花稅、每月供款做對比，你會知道$29,000原來「唔係錢」。辛苦工作6年儲到嘅50幾萬，原來都「唔係錢」。

「咁鬼叫你做媽劇停咩。」

Ok，呢一刻我承認，如果我想買樓，我唔應該入行做媽劇停，我真係明。

但喺呢幾年，我自覺都總算做得有啲成績。問題係就算我點努力、點力爭上游，每晚做到11點、星期六返埋工都好，呢啲根本唔會計算喺令你買到樓嘅因素內。

Not even 1%。

當我將最精壯嘅十幾年完全奉獻畀工作嘅時候，我又得到啲咩？胃痛、失眠定係瞓醒覺就check email嘅習慣？

「咁咪唔好買樓囉。」

而家樓價係歷史高位，我有眼睇，但明明上年又話已經係歷史高位？我有個大學同學上年懷著「燈蛾撲火」嘅心情喺屯門上車，而家佢層樓升咗15%。呢一刻，佢慶幸自己當時選擇咗孤注一擲。今年如果我選擇唔做燈蛾，咁下年我咪連火屑都見唔到？

我唔係想以買樓嚟證明啲咩，我只想擁有屬於自己嘅空間。你估個個星期六日出街行商場好得意？你估我想喺Starbucks同人爭位坐、同人爭電制用電腦？當而家行山同旺角一樣咁多人嘅時候，我只想有個獨立空間，離開公司、離開工作，一個星期放空、放鬆兩日，咁大把。

「咁你慳啲使，慢慢儲啦。」

點慳？返工帶飯？每日搭船過海？謝絕朋友飯局？用八達通自動增值，但用阿媽張信用卡找數？點解我搵$29,000都唔可以過我想過嘅生活？

我唔明。

我自覺唔算揮霍，兩年換一次iPhone、間唔中搭的士返工，有畀家用，亦會一年去一兩次旅行。有人話「唔好成日去日本旅行」就可以幫助上車，咁請問唔去幾多次日本先至夠錢？

我計過，應該係兩世。

如果你做兩世人都唔去日本旅行，就應該啱啱好喺粉嶺買到一層建築面積300呎嘅樓。由於我未知下世樓市如何，所以我選擇今世繼續去日本。

「咁你父母可唔可以幫下手呀。」

第一，我唔想。我29+1歲，父母59+1歲，我唔想要兩個退休人士粗心又出錢。我硬頸，我承認。

第二，我唔明。正值壯年、有工返嘅人買唔到樓，反而要年老、退咗休嘅人幫。邏輯上，講唔通。

「咁冇辦法，你又冇丁權。」

我同大部分男人一樣，下面有一條「丁」，但就係冇「權」。咁可以點？

認識一位朋友嘅朋友喺大埔有個「丁」，佢喺幅地上面起咗屬於自己嘅2,000呎大屋。結婚後就同老婆搬入去住。一段唔駛儲首期、唔駛畀錢租樓嘅情侶關係，究竟係點？我唔知，亦永遠都唔會知。因為一出世，我同佢彼此嘅「丁」就已經決定一切。

今次係我第一次升職而覺得唔開心。因為加咗人工令我「想得太多」，亦令我知道更多令人氣餒、令人睇唔到出路嘅現實。

讀過幾年前「月入3萬港人」嘅潮文，不知不覺，我已經成為當中嘅主角。唔同嘅係，當年嘅3萬同今時今日嘅3萬已經唔一樣。麥記最平嘅「超值套餐」要$24、的士起錶亦已經要$24，上次炒iPhone都仲要倒蝕$600。

點解要諗咁多嘢，咁辛苦。

突然之間，我唔想升職。

(原文載於「我做Marketing」專頁
www.facebook.com/iDoMarketingHK)

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。