失落工作日，HR要識轉彎
加倍地緊張檢查手機訊息，追看網上即時嘅直播片段係大家最近日常吧，工作上無心戀戰，擔心返工放工會遇到唔安全嘅情況。
由今年8月開始，陸陸續續有公司嘅HR向全體同事發信，提及到如返工當日收到有唔穩定嘅交通消息，同事可以自行決定返公司或者留係家中工作。最後總會有句溫馨提示，就係最重要確保安全。係大家心情極度鬱悶下，公司能帶頭給予多一點體諒，最後係會得到員工嘅回饋。
HR唔係安坐係座位上應付Paper work，處理大量電郵、電話和Interview，跟足Standard去搞Routine嘅活動咁簡單。作為員工和管理層之間嘅一道橋，其實係要對無論天氣、交通、時局都要有足夠嘅敏感度，只要有影響公司運作嘅任何事都要識得及時俾Advise，Fit到同事和公司嘅需要。
但係好可惜，愈大規模嘅公司作風就愈保守，甚至會因為同事對立嘅政治立場，係無出過Warning下濫權無理解僱員工，完全妄顧左同事一直嘅服務表現，妄顧左將會嚴重被破壞嘅士氣，妄顧左公眾對公司一貫嘅印象。口説保持中立，但身體卻非常誠實，骨子裡係想徹底要求同事做無靈魂嘅上班機器，自私地將勇於表達自己意見嘅員工一一剔除，怕被標籤卻不停標籤員工。不愛惜員工，退步求自我安穩嘅公司，不用多說，已失去值得守護嘅價値。
HR沒有最終話事權，但仲有企硬嘅餘地。若果要無理解僱，要我地親手奉上大信封畀無重大過犯嘅同事，小熊絕不服從！唔能夠每隻Case拎到Special Approval就大晒的，我地唔理會背後係咪有隱形、非常精密嘅大佬。係有無限多程序和階級式嘅公營機構，而家呢個時勢可能反而成為左好處，我相信仲未可以直接By Pass晒所有部門，想炒邊個就炒邊個，我地仲可以把一把關。收到柯打唔係唔做，不過萬大事查清楚先，我地要奉行公司最唔想收到設訴嘅理念。
就咁嘅，Er……我地HR暫時手頭上無資料，無證據提供，麻煩你搵搵即將被炒嘅同事黎填張form先，我地再幫手調查及跟進吧！
失落嘅時光中，更容易浮出黑暗嘅一面，HR可以閉起雙眼選擇做幫兇，或者用盡辦法守住底線，由員工守護番員工。
以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
