入大行好唔好（下）

最近介紹咗一位好朋友同埋三位讀者入去大行度做，佢哋差唔多做咗一個月，都分別同我講覺得份工作冇想像中咁容易，同埋真係好辛苦，希望佢哋可以堅持落去做到好成績。可能你哋會好奇怪點解我唔請佢哋過嚟幫手，事實係因為我公司個文化好Results Driven，老闆鍾意搵一啲有經驗、有Entrepreneur mindset嘅人，可以一入嚟就自動波做BD跑數，然後短時間內有deals。始終搵新人風險好大，與其自己做衰人，叫perform唔到嘅人走，倒不如叫有心人去大行入面浸一浸，學更多嘢。

好！繼續承接上回。

壞處：

1. Factionalism。太多山頭文化。大公司分Team分派，有數嘅自然有牙力去攞更多資源、Attention，老闆會好關照。當你唔好彩入咗條冇乜Performance嘅Team，就真係乜都要靠自己。一位朋友響大行做，佢就同我呻，有數嘅全Team可以遲到早退、長期冇數嘅Team就要做到九點追數；星期五Happy Hour就其他同事可以去，佢哋就要繼續做；最頂癮係新入職同事，如果冇表現，仲會俾人開盤賭幾時會頂唔順辭職。

2. Red Tape。太多繁文縟節。大行通常冇細行咁有彈性，太多paperwork同程序，好似同新客戶做生意，一定要簽咗合約先可以幫客戶搵Candidate，而當中份T&C又要起碼成個星期先可以過五關斬六將咁通過唔同部門，呢個時候其他行家已經占先機了。T&C或是一些Compliance forms如果客戶未簽、未填寫，就唔可以開始搵Candidate；就算真係幫佢搵到一個合適嘅Candidate，都唔會分到Commission。最搞笑係聽過一間大行有Customer Service Form，會要求客戶填寫成個Recruitment過程嘅滿意度，如果Consultant攞唔到10分，都會被經理叫入房問責，而當中Consultant就要幾乎每一日都要催促客戶去填寫份表格。公司越大，就越多五花百門的表格或程序要跟足，對於真心想搵錢嘅人來講可能係一種阻滯，因為每日花時間係呢啲程序上，對於佢哋來講會真係好痛苦，所以知道一啲好跑得數嘅Top Biller會請人幫佢分擔一些Administrative工作。

3. Team Developing more than Personal Developing。管理層會著重Build team多於Individual。雖然大行Training比較完善，但其實Training內容會比較Generic，並不會有針對行業嘅內容，譬如你做IT Industry，就唔好期待個Trainer會俾一份IT 101你。完成Training之後，就要自己搵方法學習同時跑數，兩個月內做第一張單，三個月都係蛋都未生一隻，就係時候準備俾管理層叫入房問你：「其實你覺得自己適唔適合做呢行？有冇諗住轉行？」呢啲問題。如果捱得過去，就可以繼續留低；相反，頂替你嘅人大有人在，總會有人適合做。

4. Desk Split。大行會將每個客分得好細，因為佢哋唔想一人獨大，或者自己攞晒咁多大客另起爐灶。分客方式包羅萬有，大範圍可以係By Industry咁分，譬如John睇Telecom、Susan睇Media、Patrick睇Retail；By Salary Range咁分，新入職Consultant負責月薪四萬以下嘅Roles、Senior啲嘅Consultant睇五萬至八萬嘅Roles。中範圍可以係By Alphabetical Order，即係Mary係負責由A至M名字開頭嘅Retail客、Susan係負責由N至Z名字開頭嘅Retail客。最有創意係一間大行用港鐵顏色線去界定：上司睇好你嘅，就可以做紅綠藍任何一條線、如果上司唔睇好你，就會分到啡或紫色線。聽聞有啲公司仲會運用香港18區分佈去分客，真係有啲人會做中西區、有啲唔好彩嘅會分到離島區，諗起如果每次去離島做Client meeting都真係好惡啃。個人覺得最好就係用Specialist去分：有大行會咁做，譬如係一個人做Corporate Banking RM、一個人做Commercial Banking RM、一個人做Private Banking RM。

5. Candidate / Client Ownership。呢樣真係有好有唔好，正常無論客戶或者Candidate，Consultant見過面就會“own”一年，一年入面如果其他同事有Role俾個Candidate，都需要知會個“Owner”；如果有Placement，都要將收益分返一個指定%俾個Owner；如果Owner嘅客戶有需要請人，而個Position唔係Owner負責，幫手嘅同事如果做咗一單Deal，都有機會要分番一半比個同事。雖然係鼓勵Synergy，但自己都聽過有Consultant不斷BD一啲唔屬於自己嘅Role俾其他人，借助他人之力幫自己搵錢；又有一啲Consultant一日不停「見」Candidate，可能短短十分鐘，儲一大堆人去攞Candidate Ownership。

6. Commission rate。自己做過一個CEO Placement，3M Deal Size，埋單最後攞大約廿幾萬Commission；同樣Position，有大行朋友最近做咗單4M CEO，最後攞八萬。大行就係咁，死做爛做，收入同付出永遠唔成正比，因為Commission真係太低。當然，有得攞已經好好，有一啲大行用Discretionary bonus制度，真係攞幾多係睇彩數。

7. Flexibility。有啲客寧願冇人做、唔做都唔比你做。你睇開嗰個客，就算經濟不景，佢Freeze Headcount、Cut cost你都要繼續為佢效勞。管理層相對上比較保守，唔係太鼓勵你開新客，就算開到新客，喺T&C上面都唔會有好多價錢議價空間，往往因為咁少咗好多新客。好多嘢都係管理層講落算，好多灰色地帶，譬如IT Audit係IT Team還是Accounting Team做、IR又應該係Finance定Marketing Role？做細嘅，永遠只可以跟着大方針、管理層政策走。

8. Expectation。入得大公司，公司比咁多資源去訓練、栽培你，你一年做唔到3M數你都唔好意思啦？咁如果唔好意思，就要走啦喎。大行多客多Candidate係定律，管理層、同事之間有期望、有比較都係定律。食得鹹魚抵得渴，你要有大心臟先可以生存到。

9. KPIs。幾乎每間大行都行KPI制度：一個星期要打幾多電話、見幾多人、Send幾份CV都有規定。你要不停賣力做到夜晚9、10點，然後第二朝8點準時返工繼續做。呢啲生活係咪你所追求？每日都追住一堆KPIs跑，然後用幾個小時去入System以證明自己達標。

10. Bureaucracy。As a tiny cog in a massive machine，it’s hard to truly see the fruits of your labour come to light。管理層Richard真係好Rigid。一間大行太多層，好多想法構思都去唔到佢哋𠴱度，決策慢，又被好多Rules綁住，久而久之Job Satisfaction就會下降。大行對於一些以Job Satisfaction為主嘅人並不是最佳選擇，因為你永遠唔可以改變公司，只可以係公司改變你。有時一間公司太多人，你根本唔知道係你層樓嘅人係邊個，所有嘢都係一堆數字，there’s rarely a personal feel to your workplace， feeling like you work in an office full of strangers。

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。