【職場熱話】新舊管理風格對比 打工仔Buy邊種？網民：最憎Team building⋯

隨着時代的變化，公司的管理風格亦有所不同。在員工年齡多元的職場中，管理層及一般員工又如何面對代際的差異？近日有80後的管理層在社交平台「Threads」發文，比較新舊管理層做法的不同，認為現在的職場無需強調責任感，只要能夠完成任務，不必追究過程，引起年輕打工仔的共鳴。

按圖即睇事主分享及網民討論：

+14

+13

事主：「以前做管理層：

要員工有歸屬感，有責任感，跑到數，每樣嘢都要詳盡嘅計劃書；得閒搞吓Team building，畫吓大餅，但開口埋口都話要炒你。

而家做管理層：

你要錢，我要人，我準時出糧，你準時返工；只要結果，不問過程；錢到位，交到貨，收工就收工，唔好搞咁多活動，冇咗邊個都係咁運作。」

網民A：「但有啲下屬態度唔好，又唔想學，錢佢哋就照收，嘢又做唔到，咁有返啲員工嘅責任感好啲。」

網民B：「我而家要管住班60後同70後，有啲甚至乎係50後，佢哋成日同我講，以前唔係咁樣做嘢㗎。同啲思維唔會變嘅人共事真係好辛苦。」

網民C：「以前返工好有責任感，放工、放假都會做公司嘢。但當你離開間公司之後，其實咩都唔係。諗返轉頭真係唔需要奉獻（情緒）健康畀間公司，而家好後悔。」

網民D：「80同90後真係夾喺新舊派之間嗰層，So sad。」

網民E：「至憎Team building，老細對人好就係最好嘅Team building了，無啦啦又要劃啲時間出嚟搞活動。」

網民F：「我而家遇到嘅問題係，00後上班至少遲一個到一個半鐘，另一條Team甚至仲有12點先到公司嘅。但只要佢哋交到貨，我就冇意見。」

網民G：「而家叫人做嘢，要逐個程序指令講得好清楚，出事嗰陣就話你冇講清楚。」

網民H：「而家真係冇得畀你行以前嗰套，可能我細個都比較『叛逆』，最鍾意問阿頭『我對公司好，公司賺大錢係咪分埋畀我？』所以而家我管啲伙計都係好簡單，我畀呢個錢你就做呢個職位嘅嘢，多嘅亦唔使你做，要你做咗額外嘢做唔好嘅話，唔係你嘅責任，係我嘅責任。」

網民I：「責任感呢樣嘢好主觀，點先算有，點先算冇？準時返工但成日蛇王又點計？」

網民J：「咩派都唔關事，本身個人係咁就係咁。」

網民K：「我有兩位IT下屬，成日叫佢哋早走，因為我會早走。望佢哋交到功課，就冇其他要求。當然我都會畫大餅，但會着重呢個Project對佢哋以後做嘢有咩好處。」

網民L：「我70後，十幾年前已用『而家』嗰套。」

網民M：「可能某個年齡層會出現比較多某一種特性，但我覺得個人嘅質素影響較大，結論係每個年齡層都有盡責醒目嘅人，亦有懶散嘅人。」

網民N：「將工作做好，受人錢財替人消災，就已經好有責任感了。」

不必強求員工對公司產生歸屬感

大部分網民都讚同，管理風格要與時俱進，打工仔的職責是在辦公時間內完成份內工作，歸屬感不是公司應該強求的事；亦有網民認為講究責任感無可厚非，工作態度多多少少會影響到工作效率和成果。另外，有網民指出，管理風格未必與管理層的年紀有關，個人的性格才是更大的影響因素。無論上層管理風格如何，打工仔只要盡職盡責就問心無愧了。

延伸閱讀：【打工仔辛酸】打工仔心靈受創 一人一句上司講過最難聽嘅嘢！網民：聽到都想原地辭職……

+16

+15

延伸閱讀：【夾心階層壓力】2025或迎中階主管崩潰潮 Z世代拒升職 企業料受嚴重影響？

延伸閱讀：【2025職場趨勢5大預測】報復式辭職開始「老細我唔撈喇！」、Gen Z上位10個有1個做管理層

延伸閱讀：【員工不再追求升職？】「曲折職涯」成新常態 專家：新一代追求ＯＯ多於職銜

最新專訪片︰

【Office豪華旅行團】安永會計重視多元和企業社會責任 培養包容性的企業文化

⏩⏩  需要請人？立即刊登招聘廣告！  ⏪⏪