應唔應該揀「優質偶像」做老公？
跨世代紅娘 — 張惠萍
張惠萍 (Anita)為HK Romance Dating創辦人，有線電視及亞洲電視新聞部前主播，擅長探討兩性關係，由心理學角度深入淺出到實戰應用，化身現代紅娘，穿針引線，撮合天下單身男女。
More Blogs相信唔少80後女性仲係少女時，都幻想過某位台灣「優質偶像」做自己男朋友。我就試過唔知幾多次夢見自己同佢拍拖啦。
如果俾你遇到個好似「優質偶像」咁嘅「男神」，但之後你又發現佢真面目，你會點做呢？會好理智咁離開，定係奮不顧身同佢一齊？
整合番近日新聞，該「優質偶像」的前妻對佢嘅婚前指控主要有4點。若然屬實，我地應唔應該仲同佢一齊呢？我地逐點分析下丫。
第一，佢指「優質偶像」係媽寶爸寶。從心理學角度分析，媽寶現象被認為係造成親密關係唔穩定嘅重要因素之一，因為佢威脅咗親密關係中最重要嘅基礎。心理學話我地知，人際關係最基礎最原始嘅建立係源於「母嬰關係」。人類剛出生時，心理同生理都處於極度脆弱階段，如果最初呢個關係出現停滯，「心理斷奶」始終未完成，就會形成一系列問題。作為伴侶，大家記住唔好認為你能憑一己之力改變佢，最後佢能唔能夠改變都要睇佢自己，可唔可以脫離原生家庭影響組織一個家。若然你決定同佢一齊而佢又改唔到，要接受到佢同媽媽嘅關係密切到好似佢第二個女朋友咁，亦會喺好多事情上揸唔到主意，你唔好到時先嚟怨。
第二，「優質偶像」被指試過上完床，第二日就話自己唔ready拍拖，又作好多藉口，可能會話受過情傷投入唔到感情之類。呢類男人好危險，一係本身佢係悲觀底，到咁大個人都控制唔到自己情緒；一係就好簡單，佢係玩家。呢類人惹上身後禍無窮，佢係有機會改變嘅，但唔知幾時，所以遇到呢啲男人大家當俾人呃咗一次就算，唔好再沈淪，之後無論如何，你要發誓唔好食回頭草。
第三，佢指「優質偶像」身邊異性緣太好。呢點其實好睇人性格，有啲人異性緣好，但會點到即止，另外都要睇下你嘅心胸有幾廣。好似伍詠薇咁，佢成日同啲男人玩到攬頭攬頸，但個個都覺得佢係貪玩，佢老公亦會玩埋一份。相信大家都會判斷到一個異性緣好嘅人，究竟只係會同對方保持朋友關係，定係真係會越軌。如果係前者而你夠大方，其實問題都不大。若你會眼冤，就唔好開始喇。
第四，佢話「優質偶像」係player底。成為player，有機會係佢認為自己好叻，能夠控制所有人；又有機會佢係性上癮、睪丸素太高，控制唔到自己，要周圍搵性伴侶。老實講，遇到呢類人都係早走早著，人係有機會改變，但機會真係唔大，都唔勸各位抱中彩心態。若然你要繼續落去，真係要好有信心先得，而且最後一定唔可以後悔。
以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
Follow CTgoodjobs for the latest career news, hot topics and recommended jobs!