人比人，工比工，意義何在
容許我係以「細路」嘅身份形容自己，雖然已經出身係職場游走咗幾年，但係自己嘅爸爸媽媽眼中只係個細路，其實由細到大我都無直接咁問過佢哋我應該點走將來嘅路，我只係估計佢地希望我有份穩定嘅文職工作慢慢做上去養活到自己，家用就視乎屋企經濟實際情況俾，但暫時好似未有好轉嘅跡象出現……
未踏入社會大學前當然會想得好理想，出到嚟先知道原來自己倔強正直嘅性格係會好易處處碰壁，起碼係轉咗兩份工後先開始習慣將自己自動轉Mode，開始掌握到捉摸上司心理。中間嘗試過裸辭，心入面真係好懼怕，就好似睇過嘅日劇入面講有位爸爸突然失業，依然日日一早出門，去公園坐到傍晚時候先返屋企，當無事發生過一樣，唔敢同屋企人講事實。最痛苦係竟然對身邊最珍惜嘅人都唔可以毫無保留地講自己嘅感受，罪惡感揮之不去，只能急急腳搵番份工做，再編個藉口話係搵到份更好而走人，唔會提及有過真空期。
有好多網友同小熊傾訴過類似嘅問題，佢地情願搵個陌生人去宣洩感受，希望有人能體諒個種煎熬，唔想爸爸媽媽覺得係自己唔生性、唔識諗，而質然去做一個廢青。
比較和競爭係可以帶嚟動力，但用得太過，反效果係可以嚴重到令一個人精神完全扭曲。
係每次嘅親戚聚會入面，就更深切體會到呢種壓力，上一代嘅不停搵自己嘅仔女嚟比較，「而家做緊咩工啊？搵緊幾多啊？升職未啊？」如果唔係基於尊重長輩嘅禮貌，真係一早發咗脾氣，講過又唔記係心，而且我份糧有幾多需要同親戚交待咩？你又憑咩去Judge我份工有無前途，係咪一份筍工？以前有個表哥會考成績得個位數字，當時啲親戚係人地背後指指點點，嘲笑佢一世無出頭，娶老婆都無錢。過咗幾年，表哥誤打誤撞入左行做紮鐵，以為賣勞力搵多啲，就撞正建築界需要呢類專業嘅人手，際遇就係咁，可能一夜之間就唔同晒！而家個個梗係改晒口風，讚佢有遠見識揀工啦！而我呢啲細個讀書考第一時就讚到飛天，而家搵得比表哥少，親戚們就不停勸喻我入政府做公務員，大惑不解我唔去選擇份油工。
聽到好厭倦，除非你成為專業人士，否則往往就標籤咗做政府工先係人生羸家，佢地不停主張係為我好先特地提點我，我仲應該要笑住去感謝佢地咁寶貴嘅意見。腎上腺迅速飆升到一個點，都堅持要忍耐！如果我入唔到嘅話，就會認為我呢個細路係無本事，其他業績出色嘅MNC，大規模嘅港資公司和公營機構佢地都不屑一顧，眼界狹窄得令人悲憤。
我地呢班細路已經長大成人，唔好再待我地係棋子般指揮住要點樣走，待遇和際遇係呢個時代都變得好唔同，以你地有限嘅資訊將我地隨意無限咁比較，其實係一種傷害。
以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
