Next
【職場熱話】入職翌日即被要求背熟所有貨品 零售新人：壓力好大好委屈
【職場熱話】入職翌日即被要求背熟所有貨品 零售新人：壓力好大好委屈
2022-04-21
市道受疫情影響而不暢旺，零售業可謂首當其衝，銷售額不如往昔，所以前線管理人員對追趕銷售目標十分著緊。最近，有一打工仔因經濟不景而轉行到零售業，怎料遇上要求極不合理的上司，更因此而忍不住哭泣。事主將個人遭遇發布到「香港討論區」，隨即引來一番討論。
延伸閱讀：【職場熱話】上司扮後生講潮語照顧00後新同事 同事：聽到都覺得尷尬
即睇事主分享及其他網民回應：（按圖了解）
事主分享：
「市道唔好，唯有轉行搵份零售工作，預咗人工會低。無諗到第二日返工，上司就要我記得晒店舖所有產品嘅英文縮寫、價錢、功用同埋要識計晒日常舖頭運作嘅文件，仲要即刻跑數做生意，每張單要over 800蚊。如果客人只買1件產品或者無做會員都會畀佢鬧到狗血淋頭。
其實我培訓班又未上，產品又無人教，又點會突然識得做大生意，所有嘢都係我自己玩、自己試、自己開櫃桶睇產品放邊度。主動問同事嘢，攞本簿抄咗7頁紙，但有啲運作嘢抄唔切，畀上司話我對工作唔上心，唔認真，係嚟玩嘅。
我覺得好委屈，其實我係新人，唔係超人，可唔可以畀少少適應時間我呢？一埋位就想我十八般武藝咩都識，又話我咁樣過唔到試用期。
終於忍唔住，喊住返屋企，我壓力好大啊！不禁懷疑自己係咪唔適合返工，但唔返工又會手停口停，畀上司踩到覺得自己好無用……」
網民：萬事起頭難！懷疑老細要求太高好過懷疑自己。
網民：當係歷練，呢度都頂到，之後去到邊都得！
網民：第一日咩都識，你就係經理啦！仲有三個月先到試用期，問心無愧，自問盡力便可。人哋都係第一日識你，大家都畀啲時間互相適應，真係唔得，咪當攞經驗，下份會更好，加油啊！
網民：市道差，老細實更加變態，做住先，慢慢搵！
網民：呢個就係佢哋呢個時候都要請人嘅原因！一定係惡做先要請人，好做嘅工，員工都唔會辭職啦！
網民：生意差無計，個個都要追數，你有壓力，你店長經理都一樣有壓力。追唔到數，達唔到標，佢哋都要執包袱。
網民：什麼零售咁巴閉，最低人工想請個超人？如果你唔使養家，應該搵啲住宅區商場小店，全日無乜客，幾Hea都得。
網民：慢慢嚟啦，每份工都有一個適應時間。唔好小小事都諗唔做，同自己講畀四個月時間自己，真係發覺唔掂先辭工啦！
網民：我試過有份Office工，跟正個阿姐，第一日已經話我呢個位啲人做唔長，話我當時已經係第X個，日日單單打打，畀說話你聽，玩夠一個月走，唔浪費時間。
網民：早走早着，呢啲公司就算第日疫情完結，生意大到上埋市都唔會有良心對員工，只會永遠只會係榨汁機。
網民：呢啲工要唔要都罷，又係唔係高人工又要受氣……
網民：如果真係委屈就唔好迫自己做落去，再落去都無意思。
上司應提供合理適應期 事主：工作已影響睡眠質素
眾多網民炮轟上司要求並不合理，並指沒有人能夠一步登天，難以在短短兩、三日與新工作環境完美接合，其中一名網民直言：「第一日咩都識，就係經理啦！」不少網民安慰事主，不應懷疑自己，反倒應要懷疑上司要求是否過高。多個留言表示，上司應提供合理的適應期，因為新員工要與工作環境及方式磨合，才能確保往後可順暢地工作。
事主在發文後翌日回應，感謝各位網民的回應和支持，並指第三日即使加快腳步嘗試切合要求，但上司似乎沒有大改變，而事主個人生活已開始受到影響，例如放工後腦海仍是工作上的事、晚上未能入睡等。事主稱「真心想做好份工，但似乎影響咗健康」，更留下一句「或者下一份，真的會更好啦」，暗示可能會再轉職。
部分網民呼籲事主應設立觀察期，避免開首遇上困難就放棄，但同時另有一派支持事主離職，指：「真係覺得委屈……再做落去都無意思。」
打工仔認為理想上司應該係點樣？要打成一片定係保持距離？即睇網民點樣講：（按圖了解）
延伸閱讀：【職場熱話】打工仔慘呻發夢都返緊工 網民：仲唔快啲辭職！
延伸閱讀：【職場熱話】返工預咗要受氣？ 職場新人呻遇上衰格senior 搶功勞黑面樣樣齊
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!