【見工大忌】查家宅式審問出事！求職者被揭悲慘過去 HR懺悔：以後唔會再亂問！

CTgoodjobs' Editor

Published: 2025-07-24 08:15

Updated: 2025-07-24 08:15

見工面試本應是企業與求職者互相了解的專業過程，但部分HR卻採用近似「審問」的手法，反覆追問求職者上一份工作的詳情，甚至涉及私人生活細節，令求職者感受被侵犯私隱，心情倍感壓力。近日，有HR在社交專頁「奴工處」承認，曾在面試中不斷追問求職者的工作狀況及悲慘過往，直至對方情緒崩潰，事後感到深刻懺悔，表示今後不會再無謂詢問私人問題。

HR因咩事要大懺悔？

+40

+39

樓主：
我：「點解你之前嗰份工，做咗5年，做得好哋哋唔做嘅？」
佢：「其實都唔係好哋哋，都係捱，不過叫做Manager好睇我，所以一直捱落去。本應已被通知會升職⋯點知Manager驗到有Cancer離咗職，空降咗個阿姐落嚟，最後份appraisal由佢做⋯⋯公司又改革，我之前做過嘅成績冇人證明到，亦被無視做過嘅一切。我阿媽嗰年仲跟住有埋Cancer，我頂唔順，就想休息行開下。」

我：「咁你再之前份工，點解又做咗1年唔做？」
佢：「唔係我想，係間公司做唔住清盤，我被遣散。」

我：「咁你中間嗰段空窗期做過啲咩？」
佢：「去歐洲探個好耐冇見嘅朋友，本來兩星期架咋，點知去到畀人搶走咗個袋，Passport、銀包、電話冇晒，我要搞好多手續⋯搞下搞下返到嚟都用咗一個月；然後中間都有過Offer，點知臨返工前又畀人通知個Offer要收返，咪搞咗幾個月。」

聽到呢度，我都唔知問咩好⋯⋯
佢：「點呀，仲有冇嘢問？我仲可以講埋FG嗰份工點解唔做㗎，如果你想知⋯」

自從嗰次之後，我冇再問過啲Candidate嘅前世今生。見工啫，大家都係人，其實明嘅，過去唔重要，重要嘅係而家嘅你。

網民A：
真！我出嚟做嘢十幾年，今年搵工仲被問點解第1份工會離職，關你咩事。

網民B：
10個HR 9個呃飯食！HR最冇付出同賺錢能力，係公司嘅水蛭。

網民C：
其實問上一間已經夠啦，問完都唔會影響請唔請。

網民D：
HR表示：我唔會信你個故事。你嘅答案唔啱我心水。有問題嗰個一定係求職者自己。

網民E：
人生真係好無常，好在你都係一個好人。

網民F：
如果係真，咁個求職者人生都真係幾黑仔⋯⋯

網民G：
佢所謂空窗期只係幾個月，唔知以為幾年呀！

網民H：
所以香港職場其實幾變態，裸辭去休息去遊玩幾個月唔得嘅，一定要工接工。諗起今日至俾獵頭agent教育完。

網民I：
其實係㗎，問咁多做乜啫？人哋之前做十年，唔代表喺你呢度都會；相反人哋之前做幾個月，都可以喺你公司做十年。根本一樣還一樣，唔明有乜好問。不如問下你公司俾啲咩offer人哋，令員工肯做長啲。

網民J：
對我嚟講，HR嘅定位係book枱食飯、搞吓康樂活動或者醫療福利查詢，基本上功能大致係咁。In人嗰part⋯⋯算把啦，收集完履歷交俾部門主管就收手啦，唔好搞衰間公司。

網民K：
都係經驗嚟，一般咁情況問上一份離職原因已經夠啦。上一份做5年，再上一份已經5、6年前，冇咩參考價值啦⋯

網民L：
咁你之前又問到篤？

求職者與HR互動引起廣泛討論，不少人對HR在面試時不斷追問早年經歷及過去離職原因感到不滿。大部分意見認為問及第一份工等遠久經歷並無參考價值，過度查問只會令求職者反感，甚至認為HR角色流於形式，對實際招聘及發展無實質貢獻。另外，有人指出香港職場文化較保守，空窗期、裸辭都被視為大忌，企業寧願關注履歷「斷層」而非求職者實力。部分留言則質疑HR判斷求職者動機與誠信，忽略企業自身吸引力和條件。

延伸閱讀：【見工奇聞】HR問「點喺大海撈針」競爭對手一句KO霸氣離場網民：好想識佢！

+30

+29