我知你好憎答「點解要請你」,但是……

我知你好憎答「點解要請你」,但是……

Vichy Ho

香港大學中文學院講師,《上班前後一百天》、《跟喬布斯學PowerPoint演說》等書作者,大學生職前導航、面試語言策略等方面的資深顧問

More Blogs

前陣子看到網友對面試官問:「點解要請你」深惡痛絕,大家心裡都明白一個道理:「係你登廣告話請人,咁我咪嚟囉!」「答完你呢個問題,我開始問自己『點解我仲要喺度俾你玩?』」我明!我真係明!但是……。

追求內子時(上世紀末的事,現在懊悔不已),她真的問過我:「點解你要追我?」(其實我對上幾個都問過)我好記得,當她問這個問題時,我就知道「終點在望」,追求差不多成功。原因好簡單,如果一點機會也沒有,對方會加個「喎」字,例如「點解你要追我喎?」……其實類似問題,除了問題本身,提問時雙方的關係和語氣都很重要。

「點解要請你?」有可能是對方心存懷疑,但句末沒有「先」字(「點解要請你先?」),有可能如當年內子問相似問題時的想法:想接受,但差一點明顯理由,你仲有咩好嘢?看家本領?拿出來使我容易做法定,不用再揀選?上司之上有上司,心裡覺得面前這個人不錯,但寫在報告上,想要多點理由,但又不想太直白說「差少少,你講多個優點我就請」,又沒時間再去求職信、履歷表發掘,所以問「點解我要請你」,直接把「找出最後理由」的責任交給求職者。

語氣各有不同,但我們都明白「點解要請你?」這句話「不算得友善」,但退一萬步講,就算求職者回答這問題時答不出個所以然來,面試官仍可以多一個理由:「咁樣問佢佢都和顏悅色,無唔耐煩,啱晒出去見客」。

另一方面,有時求職者本領不錯,但表達能力不足,又或者根本輕視表達技巧,覺得「你想請我,仔細睇我個履歷係你嘅責任」,回答問題「一句起,兩句止」,這時面試官都可以「出黃牌」:「點解要請你?」這種問法,讓求職者警覺自己說得不夠多、不夠深入,又或者根本說不到關鍵點,面試官用這問題,也許是最後一次請求職者回歸正題……當然,一般會在前面加個「咁」字(「咁點解要請你?」)

多講無用,如何回答才實際。

第一:最起碼不要反唇相稽:「不如我又問吓你『點解你要見我?』」

第二:不要面露為之色,又或者讓對方覺得他問了一個你不喜歡的問題:「囉!你話點解呢?」「咁係咪即係我講以上的內容都係浪費時間?」

第三:努力嘗試回答,提供內容,例如「我剛才講到自己做過一個跟今次招聘要求相關的project,其實仲有兩個差不多的,都好有關係……」。

第四:其實這是一道「比較題」,完整問題是「點解要請你……而不是今天見過的其他求職者?」因此,最好的答案應是好整以暇地道出「比較優勢」,例如「我相信今日其他求職者都跟我一樣擁有相關大學學位,但我一直有兼職,使用跟公司同一套軟件編程,能盡快投入工作」。

第五:有「比較優勢」的話早就說了出來,怎會等最後?如是者還有一可做的事:動之以情:「我覺得真係緣份,今日見XX銀行,其實我一直只有一張信用卡,就係XX銀行」……類似回答(當然應該是真實故事),對重視客戶服務、銷售工作的空缺尤其有用。

……我知道有些問題答得不甘心,但人浮於事嘛!總好過內子現在成日問我:「點解當年我要嫁你?」

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!
Follow CTgoodjobs for the latest career news, hot topics and recommended jobs!
Maybe Later Follow