回顧2018成敗 訂立新目標向前

回顧2018成敗 訂立新目標向前

郭美德 Joanna Kwok

香港恒生大學企管發展中心總監、伍絜宜創新及創業中心榮譽顧問,專責籌備行政人員課程及企業培訓;擁有豐富市場營銷、公關、管理及培訓行政人員經驗;碩士課程顧問及學生導師。

More Blogs

不經不覺,又嚟到一年之末。還記得2018年新年伊始,我曾訂下8個目標,讓我看看是否都已經達標?須知道人要不斷鞭策自己,才可以進步;亦要不停反思,才可長進!

回顧我訂立的8個目標,包括:

1. 打造健康身體,遠離疾病
遺憾的是年尾我竟然有腸胃炎加上耳水不平衡,又做了個白內障手術(唉,咁後生都要做!)所以,呢方面嘅打分,我係最差!但我同自己承諾明年唔再食生冷東西,減低腸胃炎復發嘅可能性。

2. 改變對工作的期望及辦事方法
還算勉強合格吧,今年多了每天要行一萬步的目標,在周末減少工作,多休息、行山、返教會,平衡工作、家庭及自己時間,表現尚算不錯!

3. 凖備出版Career或Parenting的書籍
在今年,筆者曾經跟出版社談過,最近又認識了一位網上作家,希望有機會在 2020前達成。

4. 多花Quality Time陪家人
呢個永遠都好難講係夠唔夠,不過筆者在今年比以前陪父母同埋屋企人嘅時間都多咗,但同理想始終仲係有少許距離,要再加油!

5. 學習一樣全新東西
大女兒曾經提議我們一起學插花,雖然呢個係我頗有興趣嘅項目,但又覺得唔係我最想呢一兩年去學習嘅。不過,我在HR圈總算是試多了一點活動,例如接受訪問及作為不同HR獎項的評委,也算是今年的多角度發展。

6. 支持年輕人發展
呢樣係我覺得還做得可以嘅地方,今年舉辦過一啲專為年輕人而設嘅跨世代共融研討會。喺學校係有無限嘅空間俾我去支持年輕人發展,明年我準備籌辦嘅「生死教育」系列,希望能成為年輕人作啟蒙嘅一個項目。

7. 探索新的假期旅遊地點
今年筆者去咗越南嘅芽莊——一個令人喜出望外嘅地方,亦都去咗馬來西亞兩次,包括探索過一個從未踏足嘅地方——怡保。明年春節嘅時候,筆者準備去日本九州,由福岡玩到鹿兒島,除咗豪斯登堡,其他地方就係一個新嘅探索。本來想去睇北極光,又要留到2019年啦!

8. 受浸成為正式基督徒
呢個係我自己覺得一年下來做得最好嘅一面。因為喺12月30號我會受浸正式成為基督徒,趕得上尾班車,係2018年完成。

我好感恩神為我預備咗好多好好嘅天使喺我周圍。近幾個月,我參加了學校嘅團契活動,亦都係喺屋企附近搵到個合適教會,希望呢個會係我人生另一轉捩點。

年尾之際,我做咗個白內障手術,以前覺得係年紀大先至要做,而家除咗可能係睇得手機多,亦都係因為我以前有深近視之故。除咗係家族遺傳,我相信係細個嘅時候睇電視睇得太近,所以我在此勸諭各位小朋友、年輕人或者係鍾情打機嘅朋友,切勿太集中精神打遊戲機,或用手機太多,要好好保護眼睛!眼睛係靈魂之窗,當你失去視力嘅時候,你嘅世界變得不一樣,亦需要面對生活上的一點不便。

今次做手術,我在單焦同多焦晶體嘅選擇之下,並在收集不同意見後,揀咗單焦,相信會容易適應一點。如果要做白內障手術嘅朋友,都要多蒐集資料,找出一個最合適嘅方法畀你自己。

希望新一年大家都身體健康,生活愉快!

(聯絡電郵:edcdirector@hsu.edu.hk )

有幸參予CTgoodjobs Best HR Awards 評審。

 

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!