Next
【CV疑雲】畀人盜用CV四圍send！網民：幕後黑手可能係你上司？佢想炒你好耐！
【CV疑雲】畀人盜用CV四圍send！網民：幕後黑手可能係你上司？佢想炒你好耐！
2023-05-25
CV小偷出沒請注意！ 近年來，電話騙案頻繁出現，原因是受害者意外披露個人資料，導致騙徒有機可乘。而最常見的被盜資料莫過於電話號碼，住宅地址及信用卡號碼等。不過，最近有網民在社交媒體專頁「奴工處」發文，竟表示自己的CV（履歷表）被盜用，繼而莫名地受到各大公司的面試邀約，使他感到煩惱萬分。於是，網民們紛紛化身成福爾摩斯，嘗試為事主撥開迷霧。究竟，最有可能的幕後黑手會是誰？！
按圖即看樓主經歷：
上司：「搞咩呀？你想轉工咩？揾工都唔好send去總公司啦，頭先head office人事部打嚟，佢哋話收到我下屬份CV，問我發生咩事。」
差唔多食lunch嘅時候，上司叫咗我入房講呢件事，語氣明顯係埋怨緊我。我聽到之後梗係嬲啦，但並唔震驚，所以就答佢：「唉，又係咁，我冇諗過轉工，都冇send過CV去總公司，你當我傻㗎咩，我畀人整蠱呀！有人將我份CV周圍send出去，今年已經第7次啦！」雖然上司畀head office問到口啞啞，面色有啲難睇，不過佢係信我嘅，話晒我都喺呢公司做咗接近5年，會唔會咁白痴連總公司都認唔到呀？
亂咁將我份CV周圍send嘅情況，喺2022年已經發生，當時有間不知名公司打嚟約我interview，對方第一句就問：「Hello Michael，收到你份CV喇，想問下你而家份工係咪仲做緊？如果arrange聽日晏晝見工有冇問題？」我當時聽到一頭霧水，又唔係揾緊工，又冇send過任何CV同resume出去，突然有人叫得出我英文名，仲想約interview ？究竟發生咩事？結果我同對方確認自己冇應徵就匆匆收線，相信嗰位HR都覺得好奇怪。
因為打嚟叫我見工嘅電話真係太多，我曾經同個別一兩個打嚟嘅HR講，可唔可以畀個sender嘅email address我，因為你send我份CV出去都要經電郵㗎嘛，但係冇人理我，或者覺得冇義務幫我「緝凶」啦，佢哋淨係提議報警。
好啦！咁我嘗試去差館備案，當值嗰個警察仲好笑，佢問係咪啲親戚朋友想我轉份好工，又話周圍send CV冇令我招致金錢損失，嗌我睇多一排先喎，仲叫我諗下係咪得罪咗咩人先會出現呢啲惡作劇。大佬呀，我知就唔使嚟備案啦！
本身都諗住唔理，因為都理唔到，點知惡作劇條友而家send我份CV去總公司，明玩嘢，但我又唔知點做，呢啲究竟算唔算刑事？係咪屬於商業罪案？定係要求助私隱專員公署？坦白講，老婆都冇我份CV，有得我CV嘅人，照道理係我send過去嘅公司，不過我都好耐冇搵工啦，我都想知係咩人咁無聊！
按圖即看網民留言：
網民 A：一向都係最唔似兇手嗰個就係兇手，即係你上司！可能想你走好耐。
網民 B：官方答案：畀人hack咗。
網民 C：好簡單，再收到啲headhunt唔合作，咪quote pcpd掟file去私隱專員，到時公司compliance收到，冇得佢哋唔合作啦。
網民 D：我覺得似現任公司的人，投稿人做咗五年喎！可以叫總公司收到cv嘅人forward份CV嚟睇吓，等投稿者認吓約莫係幾時寫！睇下working experience update到邊份工，就大概知係咩年期的CV！
網民 E：好簡單，如果樓主離職，最終得益者是誰？一定係公司同事，而且曾經喺人事部做替工，或者同人事部friend嘅人啦！
網民 F：問總公司睇下收到嗰份CV，如果係呢5年內嘅version，而份CV又淨係得自己有，應該基本可以確定係公司嘅人做嘅？
網民 G：有咩原因驅使佢咁愛公司？畀我就見吓先，分分鐘有人工加，不過我覺得係下屬想送走佢嘅機會大啲。
網民 H：份CV咁靚，應該公諸於世做sample。
網民 I：既然係咁，直接轉工啦，跟手改email同電話。
網民 J：記得以前睇過本書定有套戲講過，對付公司入面嘅死對頭，最好方法就係幫佢send CV。
樓主的經歷實屬罕有案例，留言區的網民普遍認為幕後兇手必定是同公司的同事，才有機會接觸到該份CV，而人事部同事首當其衝成為了頭號嫌疑人。同時，亦有人覺得樓主的上司其實一直看他不順眼，於是趁機找辦法趕走他。只可惜，所有推論都無法得到實質證據證明，而樓主向警察報案又不受理。到底，還有甚麼辦法可以阻止對方持續盜用自己的CV？
當你開始尋找工作機會時，履歷表（CV）是你向潛在僱主展示你自己的機會。一份好的履歷表可以讓你在眾多求職者中脫穎而出，而一份不好的履歷表可能會讓你的機會付諸東流。在這篇文章中，我們將討論一些基本的履歷表項目，以及如何最大限度地展示你的技能和經驗，並提供一個英文履歷範本供你參考。
一般畢業生的履歷表需要包含甚麼項目？
延伸閱讀：【職場貼士】轉工嘅時候唔知點樣寫預期薪酬？網民話至少叫高20%！
延伸閱讀：【見工面試】Send CV竟被HR勸喻「咪再apply份工」？全因求職者做咗呢樣嘢！
延伸閱讀：【求職攻略】CV應唔應該寫屋企地址？HR：最多寫地區就夠
最新專訪片︰
【星級斜槓族】Grace陳凱琳享受「媽的多重身分」 惟暫無意再拍劇 自認慈母 老公鄭嘉穎卻有微言？！
Look out for further updates on our Facebook fan page!
Follow CTgoodjobs for the latest career news, hot topics and recommended jobs!