【辭職轉工】通知期有3個月點轉工好？打工仔唔想裸辭又怕蝕代通知金 網民：有3個月搵工咪仲好

新年過後即將進入求職旺季，不少打工仔有辭職轉工的打算。然而，決定辭職之前，打工仔有多方面因素要考慮，對於離職通知期較長的打工仔而言，辭職的時機更是一個思考的重點。有打工仔在社交平台「Threads」分享，他正在考慮轉工，然而長達3個月的離職通知期令他很困擾，不知應裸辭還是先求職，於是發帖希望了解網民的看法。

即看事主分享及網民回應：

+15

+14

事主：「想問問有冇人份工辭職要3個月通知期？我做緊中層職位，現職環境極度Toxic，每日都想祼辭但又驚搵唔到工。

唔知呢兩種做法大家會點揀？

1/ 裸辭後搵工；

2/ 捱到搵到新工先辭職（但如果新公司等唔到咁耐，走嗰陣可能要自己畀錢Buyout）。」

網民：「真心建議唔好裸辭（除非工作係搵錢買花戴），個市麻麻哋，我身邊好多朋友都唔易搵工，等等吓會好冇安全感。

我曾經試過3個月通知期，上一份工2個月。你而家開始搵工，如果新公司畀Offer你，你又想做，可以試吓同佢商量，睇佢肯唔肯幫你畀Buyout，或者佢畀1個月Buyout，你自己再畀返1個月。

不過我覺得唔使擔心太多，你搵咗工先，到時候有Offer，你就會知點做！」

網民：「先考慮自己年紀，同埋做緊嗰行易唔易搵工，或者你嘅經驗同技能喺其他行業用唔用得着。

我都係3個月通知期，年過40，有家累，做開嗰行好窄，窄到10幾年經驗出到去根本冇人Care，忍無可忍都只能繼續忍。

但如果你嘅處境未去到咁極端，我認為可以放手一搏，唔好搞到我而家先嚟悔不當初。」

網民：「係有緣同賞識嘅公司一定會等。如果人哋急要，即係有鑊要人孭，咪搞！同埋我絕對唔會自己裸辭咁傻，有收入有工作先有底氣，見工講句都大聲啲。」

網民：「Send咗CV睇吓有冇面試機會先？咁你大概會知自己難唔難搵工。」

網民：「辭咗再搵，未必一面試就掂。」

網民：「情況類似，但轉返呢份工已經蝕住咁轉，唔想下次又蝕住轉。」

網民：「辭咗職先慢慢搵，要多啲Social搵機會。」

網民：「咁咪好，有3個月畀你扮工又搵工。」

網民：「以前公司高層係半年辭職通知期，經理級就3個月。其實你自己諗返有冇負擔，祼辭之後可唔可以一段時間唔做都頂得住開支。

我都係裸辭，有3個月冇返工，但好舒服終於可以休息吓，之後舊公司叫我返去升職加薪，但最終我第二次裸辭，而家轉埋行。」

網民：「搵住工見住工先，至於個市差唔差，同你本人嘅能力係兩樣嘢，當然能力差嘅人市道差時係難搵啲。正所謂冇可能人人都做經理，真正覺得你啱做嘅會等你，甚至幫你賠埋畀公司都有可能。」

理性評估自身情況 慎重作決定

大部分網民建議事主不要輕易裸辭，先開始求職，如果招聘方有聘請的意願，可以和對方商量通知期或代通知金的事宜；亦有網民意見相反，認為裸辭脫離3個月通知期的束縛會帶來更多機會，免去支付代通知金或讓意向公司等待的煩擾。

對於事主的情況，無論裸辭或在職求職都存在一定風險，建議事主全面地考慮自身條件，如日常開支、家庭負擔、工作行業和經驗技能等，再作出合適的決定。打工仔如有類似的煩惱，可以參考以下5個問題自我審視，判斷現時是否為辭職的好時機：

+13

+12

延伸閱讀：【辭職學問】公司半年走25個同事！離職率高應否遞信？網民反問：有邊間公司冇人辭職？

延伸閱讀：【辭職學問】老細話年廿八年三十唔畀辭職？網民：我會賠錢走！

延伸閱讀：【2025更新｜辭職｜裁員｜解僱賠償】老闆迫員工主動辭職10大常用手段 終止僱傭合約有冇長期服務金、代通知金？如何計算通知期？

延伸閱讀：【伏工預警】辭職要3個月通知期！連試用期內都係？勞工法例又點講？

最新專訪片︰

【Office豪華旅行團】安永會計重視多元和企業社會責任 培養包容性的企業文化

⏩⏩  需要請人？立即刊登招聘廣告！  ⏪⏪