Next
【見工早到都唔得？】被經理要求面試準時到 自己卻遲大到？
【見工早到都唔得？】被經理要求面試準時到 自己卻遲大到？
2025-03-03
求職者面試通常會提早到達公司，一來方便自己提前做足準備，或應對如迷路等突發狀況，二來可以向公司展現誠意和守時的好習慣。然而，在招聘方的眼中，求職者早到不一定是好事。有打工仔在社交平台「Threads」發帖，指自己面試提前15分鐘到，竟被經理要求出去，到約定的時間再回來。然而，當他準時再次出現在公司時，經理卻……
按圖即看事主經歷和網民回應：
事主：最近見咗份工，平時去面試，多數早10至15分鐘去到，今次早咗15分鐘。入到去，個前台帶咗我入房，叫我等等。幾分鐘之後，佢再入返嚟同我講唔好意思，話個經理覺得我太早到，叫我出去行吓先。佢細細聲講，個經理鍾意人哋準時先到。我唯有走人去行吓，喺門口等到啱啱好搭正，先敢推門入間公司。我以為個經理會好準時出現，結果等咗幾個字佢先入嚟。佢鍾意人哋準時，唔代表自己會準時！
網民A：之前睇到條講職場嘅片，記得有話提到早15分鐘，對HR同老闆嚟講唔係優點，要提到一兩分鐘或者搭正，先係有效益。老闆嘅心態係，你平時返工都唔會提前咁早，所以佢第一印象係唔會重視你面試早唔早到。
網民B：我做過中層管理級，都幫自己團隊做過好多次面試。最有印象嗰次係有個女仔早咗半個鐘到！前台安排佢坐喺長椅度等，我就不動聲色咁經過留意吓佢會用呢段時間做啲乜？結果佢不停喺度講電話！仲唔算細聲！
網民C：我有一次又係咁嘅情況，我大約等咗15分鐘，我同前台講，我唔見喇！佢問我點解，我話見工係雙向嘅，既然你要求我準時，相反你唔準時，即係冇心見啦。我當時講完就即走，等緊升降機嘅時間，有個職員出咗嚟，問我係唔係見工，我話係，佢就話自己係面試官，頭先有緊急事處理，總之就解釋好咗多。最後我有入去見工，不過就全程開足火力寸對方，大家不歡而散。但兩日之後佢又叫我見第二次。
網民D：前幾日有人嚟公司見工早咗半個鐘，嗰日經理都仲未返到，佢想喺入面等，啲同事最後叫佢落街行吓先再返嚟。
網民E：試過有個老闆約見工，到咗嗰日唔見個老闆，係佢下屬嚟面試我，嗰陣其他同事話搵緊老闆返嚟，個同事仲話老闆喺附近做嘢。到我入咗職之後，老闆話其實佢嗰日放假，唔記得約咗我。
網民F：試過有一次去面試，間公司要員工證先上到去，所以叫我喺商場等面試官。佢開頭約我2:30pm，點知嗰日凌晨WhatsApp我改時間，改到2:00pm，咁我1:45pm左右喺商場等佢，並且同佢講我喺邊度，佢就覆我：「5分鐘後到，落緊嚟」。點知佢直到2:10pm先落嚟，仲要一句對唔住都冇。
網民G：如果佢表示好忙都可以理解嘅，但話你太早到而自己又遲到，即係佢本身時間管理都有問題，未請都咁寸，請咗有心理準備同佢共事更加唔會尊重人。
網民H：早15分鐘到，畀公司處理啲文件好正常啫。
網民I：喺間房等都阻唔到佢，都要叫你出去行，呢個經理都好控制狂。
網民J：不過早到對前台嚟講唔係好事，人哋返9點都未夠鐘開工，就要開門畀你坐住等，分分鐘早餐未食，妝未化，15分鐘對人哋嚟講分秒必爭！
網民K：預早10至15分鐘去到附近係正常，早5分鐘去到公司門口就得，有時啲會議室未放返出嚟，你就要坐前台度等，如果見同行公司分分鐘撞到識嘅人就好尷尬，而面試官都應該準時出現。
網民L：HR答你，面試早到5分鐘就得，因為你早到，人哋未必有房準備好，個經理可能忙緊，會覺得你嚟得太早。不過，佢叫你出去行吓，跟住又叫你等返幾個字就擺明係玩嘢，唔使理佢。
求職招聘需要互相尊重
帖文一出，即引起熱議。不少網民提到，面試提早10至15分鐘到達公司屬於合理範圍，提前5分鐘到最佳，提前太早或會影響到HR（人力資源從業者）或面試官的工作安排，甚至加重前台接待員或公司其他職員的負擔。亦有網民指出，該經理要求事主準時，自己卻遲到的行為，是對求職者的不尊重，日後共事或會產生更多矛盾。正如網民所言，求職和招聘是雙向選擇的過程，需要雙方的互相尊重和配合，招聘方應當多考慮求職者的感受，才能吸納優秀人才。
延伸閱讀：【見工面試】早到唔等於美德？打工仔抱怨求職者太早到增加工作量！事主：約你幾點就幾點到啦！
延伸閱讀：【見工奇遇記】面試冇戴錶被鬧欠時間觀念？HR建議︰早到15分鐘屬正常
延伸閱讀：【見工面試】網民教路面試必做！咁樣就知公司伏唔伏？
延伸閱讀：【見工面試】Interview全攻略 HR︰求職者要避免15個小動作
最新專訪片︰
【Office豪華旅行團】安永會計重視多元和企業社會責任 培養包容性的企業文化
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!