【見工面試】面試官邊啲說話一聽就覺有伏？一人一個見工危險信號！網民：我哋公司係一個大家庭

CTgoodjobs' Editor

Published: 2025-04-02 17:59

Updated: 2025-04-02 20:04

求職時，面試短短幾十分鐘的接觸，往往能透露出許多關於公司文化和管理方式的蛛絲馬跡。有時面試官不經意間的一句話或一個舉動，就可以幫助求職者判斷這家公司是否值得加入。近日，有打工仔在社交平台「Threads」發起討論，向網民徵集那些面試過程「伏味濃」的信號。

即看樓主分享及網民討論：

+14

+13

樓主：一人一個Interview一聽就覺得間公司唔妥嘅Red flag，我先：「你介唔介意OT？」

網民A：「我哋公司係一個大家庭，同事就好似一家人咁。」

網民B：曾經見過一個HR：「我哋公司唔鍾意嘈雜，所以公司內唔好傾閒偈，保持肅靜。另外有Cam對住你哋，除咗HR會睇到，老細都會睇。」

網民C：「你覺得你見緊乜嘢工？」即係個Hiring manager唔知自己想請乜嘢人。

網民D：「你要求嘅人工，我哋畀唔到你喎。」

網民E：等Interview等咗9個字，擺我一個喺房，然後人都冇個，當我想走先有人嚟。

網民F：約好1點見工，佢哋部門阿頭遲成個鐘先出現，見到真人之後發現原來係啲鍾意擺款又冇料到嘅老海鮮。嗰次之後學識咗以後見工只准自己等20分鐘，仲係冇影我就會走人。

網民G：Apply過咗2個月先嚟做Written test，之後再等6個月先安排面試。

網民H：「你覺得你可以為公司貢獻啲咩？」

網民I：試過有間公司First interview都未到，已經叫我又填表又交勁多資料，仲要畀埋Passport，成個過程已經同其他同行好唔同。到真係見工嗰陣，係Online meeting同幾條友一齊，然後個老細Check文件嗰陣將我個Passport copy射上個大Mon度大家一齊睇！嗰吓已經決定幾多錢都唔會做。

網民J：見工時嘅Test係幫老闆做私人事，解決佢當前困難，前後等嘅時間多過傾嘅時間。見完自己離開Meeting room，叫你自己走順便幫佢熄埋燈，拍埋啲枱櫈。

網民K：問我屋企有咩人，答完係獨生之後，佢話：「咁平時咪冇人可以傾訴？」

網民L：「喺呢度返工係公司畀機會你發揮同學嘢。」

警惕危險信號

從網民的分享來看，面試中的危險信號主要集中在兩個方面：一是公司文化，例如聲稱公司是一個大家庭或試探求職者是否願意加班；二是面試流程，如等待時間過長、打聽私人狀況或要求提供過多資料等。這些信號反映了企業潛在的工作壓力以及對求職者的不尊重。求職不僅是企業挑選人才，也是求職者篩選企業的過程，如果打工仔遇到這些危險信號，不妨三思而後行。

同場加映：【見工面試】面試如何識別Toxic老細？打工仔列3大Red flag！

+27

+26