Salute

「又要馬兒好又要馬兒不吃草」呢句說話出响Timothy把口零舍有味道同故事。

Timothy係一個資深HR ，我啱啱入行嘅時候佢已經係一個獨當一面嘅Headhunter。响佢轉做Inhouse之前九個月，我哋兩個不停交手，有輸有贏，要計寸嘴同心狠手辣佢比我厲害得多，佢夠膽死帶住幾份profiles去大學Seminor度搵個Guest Speaker，即係CEO去sell candidate，呢份determination我真係自愧不如，但係唔知點解我倆鬥鬥下就識英雄重英雄做咗好朋友。自己欣賞嘅HR其實唔多，佢係其中一個。

咁啱星期六我哋兩位嘅另一半都要飛，收到Timothy電話約我出去，兩個麻甩佬有乜好做？飲酒但係要揸車，同埋唔想兩個麻甩佬開住篷游車河上山睇日落、睇戲又好Hehe、唯有去返平時一齊去嘅雪茄吧，清清地過一個下晝。一路好奇怪點解佢三個月之前會入呢間中資企業做Head of Talent Acquisition，因為一個咁Money Driven、咁aggressive嘅Top Tier Headhunter竟然放棄每個月六位數字Commission，而去一間中資企業做。原因好簡單：就係想要吸收大企業入面爾虞我詐、兩邊不是人嘅Client Servicing經驗，咁當然最重要就係夠穩定。曾經有人同我講過，做我地呢一行，最後只有三條出路：出嚟自己開，可以Home Office平有平做，又可以租Office貴有貴做，只要你有足夠Connection，每個月做幾張單100%自己袋，好過日日比上司捽數但係只袋30%；第二個選擇係一路做Recruiter，升到做一個Senior Level負責捽人，袋Team Commission；最後當然係入In House啦，穩穩定定固定收入。Tim嫂啱啱生咗BB，好自然Timothy要追求”Stable”。

以我同Timothy嘅關係，好自然我已經可以做到佢公司嘅Recruitment Sole Partnership。最近同Timothy做緊一單COO position，去到出offer，傾好點樣Buy out、Share options，連合約都ready，就响Candidate當天下午準備簽contract之前，Timothy收到中央高層嘅電話，叫佢即刻Hold住個process，因為個position已經俾咗主席嘅妹夫……之前一大輪响香港搞嘅動作純粹比香港股東、管理層睇。自己今年做好多內地Conglomerate客，得出嚟嘅經驗係：响中國大陸請人，Soft skills永遠排最重要，佢哋expect Candidate有全能Hard skills仲要有強大connection，就算最後返咗工，未過Probation都唔知道最後結果係點，真係令人又愛又恨。最近自己嘅Portfolio都做咗好多中資企業，有民企有國企，冇錯佢哋俾錢係好梳爽，閑閑哋一次過可以俾你接近十幾個Positions、又唔介意簽30% Fee，做一張單起碼廿幾三十萬placement fee，但係不了了之嘅機會都有50%，經常性去到最尾無啦啦就會比一個唔知咩人截糊。同埋有一樣唔好就係永遠係冇JD，唔似MNC客，每個Opening都有詳細要求，連Team Size同Reason of hiring都會講得清清楚楚，中資客戶只會比個Title同Budget你，剩下的只有靠自己去摸索。站於HR立場，點樣將上頭好簡短嘅要求整頓消化再Deliver俾我哋真係有難度；加上我哋Recruiter都會步步進逼，務求可以攞多少少資料節省Sourcing時間。

「HR好似中間人，當勞資都對對方有期望，你做中間𠴱位就麻煩好好照顧兩邊嘅需要。既想同事做得開心、爭取下福利，但係又要顧住公司唔可以有太大開支變動。特別係要傾去留問題就最兩邊不是人，例如有同事過左試用期，但係公司又唔同佢傾係咪正式錄用，過左一段時間先叫HR Terminate個Candidate。咁就梗係死梗啦，要賠錢㗎嘛。Candidate痴左線問點解唔早講，依個時候就要有烈士出嚟面對依位同事，將成個故事講得好聽少少，等佢自己願意resign重要俾佢立即走𠴱隻。最後錢可以慳返，人又可以消失，同事又無再投訴，咁就皆大歡喜啦。」Timothy說。
「上面嘅想法我都係要跟，似終香港同內地收入同生活水平唔同，好多野都要慢慢習慣。間間公司都想用最少嘅錢請到最top嘅人啦，中間點adjust就下面HR自己諗掂佢，總之老細想見到fit馬, 不過又唔貴，我哋依啲做細嘅就唯有左加一啲，右加少少。係關囗呀久保，就好似＄99同＄100嘅分別。」Timothy抽著雪茄説。「也許你不在乎。根本你以為In House HR就是長期的賣淫」我引用張愛玲筆下的名句送俾Timothy。一針見血。真心Salute。

我諗，我應該點都唔會入In-house了。

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。