CV點樣先叫花？

近日有好幾個朋友/讀者不約而同問我同一個問題，「CV點樣先叫花？」，問得呢個問題，其實喺你心𥚃已經有一個「前設」，就係「覺得自己個 CV其實都有少少花」。有啲人覺得每份工做兩、三年，CV就已經係好花，亦有人覺得每年轉一次工只係「小花」。其實CV花唔花最重要唔係你點睇，而係你未來老細點睇。

「Marketing Turnover 快/慢」
老實講，呢行Turnover平均都叫快，工作辛苦、人工又未必高、工時又長，都係令人快轉工嘅原因。多年來睇咗咁多CV，Turnover平均嚟講分「三轉」：「1-2年底層大轉」、「4-5年中層小轉」同「高層唔轉」。

「1－2年底層大轉」意思係，平均嚟計，1-2年內公司近9成嘅底層同事會大轉一次，2年後公司9成Junior level嘅同事會面目全非；「4-5年中層小轉」，Mid-level嘅同事好少會輕易走人，多數都係儲緊年資等升上神枱，4-5 年就係佢哋嘅極限；「高層唔轉」呢個唔洗解啦，神枱級同事等退休。當然，如果你做咗10年都係Junior，仲要沉醉於「1-2年底層大轉」的話，咁你CV就真係花呀。

「轉工要有原因」
如果你每次轉工係有一個「正常原因」，1-2 年轉一次工其實係冇問題。但記住「過得人過得自己」，「正常原因」係要真・正常，例如轉工升職加人工50%係正常，但如果你5年轉5次工嘅原因都係公司問題、人事問題，咁就唔正常。試諗下，如果次次都係你身邊嘅事情唔正常而令你辭職，咁應該最唔正常其實係你。試過有朋友做咗4-5份工，次次離開嘅原因都係「公司倒閉」，咁人哋唔請你，都好正常啫～

「要有一份長工」
做邊一行都好，最好有一兩份做得比較長嘅工作，長嘅意思係指4-5年以上先叫長(當然唔同行業/工作/公司/人都有好多例外)，而長得嚟要有升過職，咁先有價值。其實好易理解，做得耐，代表你對公司忠心，個人踏實唔Jumpy；有職升，代表有人認同你，而唔係做10年都係打雜；有份長工，代表公司都有少少歷史，唔係細公司，你亦同公司共渡過時艱，有一定嘅視野。如果你做咗3年都係未有升職嘅先兆，咁真係要認真諗諗。

每個人嘅Career Path都會有著不同嘅階段，由「摸索」>「實踐/儲經驗」>「儲年資」>「神枱」>「再摸索」等，而每個階段都有自己嘅需要，如果公司滿足唔到你現階段嘅需要，呢個就係轉工嘅理由。

(原文載於「我做Marketing」專頁
www.facebook.com/iDoMarketingHK)

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。