全職獵人FullTime Headhunter

一個中環Headhunter,遊走於各大企業、不停挖角。澳洲回流,全職獵頭,兼職旅人。風流不下流,靠把口搵食。純粹分享每日光怪陸離、有血有淚的獵頭生活。

More Blogs

緣份這回事,有時很玄妙。以前舊公司逢星期五會三點放工,通常放工之後我就會拿着相機去城市每個角落拍照。呢個傳統到我去到新公司都延續下去,星期五放工後拿着相機去中環海濱影相,係鏡頭裏面見到離遠處有一位氣質美女站在草間彌生件黃色南瓜旁邊,直至佢走過嚟同我揮手,我先睇得清楚,一件Ralph Lauren黑色皮褸配襯一件白色長裙再配搭一對Jimmy Choo高跟鞋。靚得嚟好清新好有氣質,佢就係我舊同事,最近轉咗去一間大型化妝品牌入面做Talent Acquisitions Manager嘅Edvina。

「Hello好耐冇見!最近點啊?」Edvina走過來說。「都係咁,未死得住,啱啱轉咗去新公司。」我定一定神說。「咁耐冇見,一齊飲杯嘢慢慢傾?」Edvina開到聲,真係好難可以拒絕,我們一齊去了Dear Lilly飲酒傾計。坐低之後,大家傾一傾近況,Edvina忽然之間問起:「你記唔記得之前响舊公司我同你提過一個Candidate叫『哭泣瑪莉』?」「梗係記得!你Interview佢半個鐘,佢係半個鐘之內不停花式自殺,你睇唔過眼鬧到佢喊,教佢點樣避免喺Interview入面自殺𠴱個Mary呀嘛!點解無啦啦講起佢?」我答。「先旨聲明,佢後尾同我講返唔係因為委屈所以喊而係因為感動所以喊,因為Mary見過咁多Headhunter,冇一個有用心去指出佢嘅問題、去糾正佢嘅錯誤,佢覺得我真心想幫佢先感動到喊啫,我脾氣好好㗎!你同我做咁耐嘢唔知咩?」Edvina輕輕拍着我的手說。

不少人去面試嘅時候,往往因為緊張而犯下不少錯誤,我聽過、遇到過嘅最少100種以上,而Mary就犯下其中6種:手袋放喺枱上面、軟弱冇力嘅握手、面試期間不停把玩Interviewer嘅卡片、眼神閃縮、太Hyper,有佢講無人講、最重要係冇熟讀清楚Job Description,要個Interviewer重新再講多一次。不過個人覺得眼神依樣嘢真係好蝦人,如果眼神冇接觸或者交流,會被人覺得缺乏自信;但係如果目不轉睛望住個Interviewer,又會被人覺得佢太進取,所以眼神交流大約5秒就最好 。另外如果面試之前冇做好功課,連最基本份工做什麼,公司背景,公司年報,Interviewer嘅LinkedIn Profile都沒有了解,盲舂舂咁去見工,當人哋問你知唔知份工做什麼嘅時候,答唔出嚟,仲要個Interviewer同你講返,就係一個好失敗嘅行為。

「Mary果次之後同我做咗好朋友,佢而家係一間Luxury品牌做Marketing Manager,佢成日都有同我提起多得我當日教佢、糾正佢嘅錯誤,佢先至可以知道自己嘅問題,改變自己面試習慣,亦都唔可以去到今日呢個位置。佢舊年結婚都有請我做姊妹。」Edvina説。酒過三巡、吃過晚餐之後,我送了Edvina返家。「今晚好開心,下星期同我去西環影相得唔得?」Edvina問。「冇問題!不過下次唔好再飲酒喇。」回家路上我想起Edvina剛剛說的話,我非常認同Edvina某程度上改變了Mary的人生,一個好HR好多時候都會喺Interview之後同Candidate講出佢嘅問題, 希望佢哋下一次面試可以作出改善。Mary其實好幸運,有緣遇到Edvina呢位咁好嘅HR肯教佢。人生同過百個HR交過手,有好差亦有好好的,Mary件事令我想起我之前舊公司遇到過的一個頂級HR,她的名字叫Cody。

記得Cody係我之前做Cold Call BD返嚟嘅客,其實一個BD Call,最好客戶有現成嘅職位空缺俾你去做;冇Role就要約客戶去見面建立關係;真係攞唔到Role又約唔到會,最低限度要取得一個客戶電郵,方便第時跟進。好記得我約Cody第一次見面,去到佢辦公室,接待處職員同我講叫我去一間房入邊等待Cody,記得房入邊嘅擺設好靚,有一幅水墨畫,還有一個海藍色嘅古董花樽插着五朵紫色玫瑰花。點解隔了幾年我仲會咁印象深刻?因為呢次Client Meeting係我人生中最特別的一次:到埗後等了15分鐘,職員叫我去另外一間大房,坐了5分鐘,Cody入房見我。佢第一句問我:「可唔可以形容一下响頭先間房你見到啲咩?」因為我個人天生好奇心重,加上紫色玫瑰花真係好靚,所以我對間房特別有印象,我開始慢慢描述。「記唔記得個花樽係什麼圖案、什麼顏色、插了幾多枝花?」Cody再問。雖然有一點兒摸不着頭腦,但是我也耐心地回答了她這個問題:「Cody,個古董花樽是藍色的,有兩條龍在左右兩邊,插着五支紫色玫瑰。」「最後問你一個問題,五支玫瑰花的花語代表着什麼?」Cody再問。「欣賞。」我答。「Impressive!其實頭兩條問題主要係考你耐性和觀察力,最後一條問題係睇你求知欲旺唔旺盛。」Cody終於解開了我心中的疑問。「我今後只會用你一個Headhunter,因為我之前見過太多Headhunter,佢哋冇一個可以答到我問題,絕大部份我叫佢哋喺間房度等我,佢哋只會玩電話或者乜都唔做。你係唯一一個會留意間房佈置嘅Headhunter。我要搵一個有耐性、觀察力強、有求知慾望嘅人去協助我請人。因為我嚟緊俾你嘅Position,要用一段時間去搵,冇呢三種特質都好難可以勝任。」

之後我用了個半月,終於在新加坡那邊幫佢挖了一個COO。自此之後,Cody只會用我,幾乎每年我都幫佢請六至七個人,試過一年幫佢搵十幾個唔同Level的Candidates,感謝上帝,Cody真係我嘅客戶奶媽。到今時今日,我仲好慶幸當日有打過個Cold Call,緣份。

執筆之日,正值是這個Page的一周年,衷心感謝這一年有份Share過、留過言、冇介意我粗劣的文筆、有Like過我文章的讀者們,沒有你哋的支持和留言鼓勵,我真係唔知道可唔可以繼續堅持寫下去,個人覺得認識每個人、每次交集,都是一種緣份,大家總會在對方身上學到些東西,希望呢個Page可以帶我們走得更遠。

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!