有人喜歡刷存在感，也有人刻意刷無力感
人都是喜歡被受關注，被需要的。無左自我既存在感，就彷彿做什麼都唔係值得被記錄既一回事。
身處係職場，你會見到最普遍既依然係狼狽地刷存在感既一群。即使係看似殺傷力最低既茶水姐姐，都生怕你會認為佢係公司只係唔重要既小小微塵，每逢我地午飯時叮飯盒，收拾活動後既會議室，或者拜託佢幫忙碎一大疊廢紙時，佢都會借故強調佢呢個職位既重要性。「我啊，日日見晒你地咁多人出出入入，幾時邊個係茶水間講啲咩做啲咩我都一清二楚架。聽講啊，最近十樓個秘書遞左信唔做啦，岩岩過試用期就走，佢服侍果位老闆出左名難湊架啦，又一個頂唔順啦！」我知我知，茶水姐姐與公司入面其他人毫無利益衝突，同任何人都可以聊天。而且，佢既工作位置唔受到限制，所有部門或者大老闆既私人房來去自如，根本就係神級既天文台。隨佢既心情，將有聽到既無聽到既都一一當做話題散播出去。唔好睇輕公司低微既職位，茶水姐姐、reception姐姐、公司司機哥哥，唔小心得罪佢地，可能就會係老闆面前「厚多士」放風講下你既壞話了。講既人無責任，講完心情舒暢，而你？就急住想辦法收科吧！
所以如果你想請佢地幫忙而忘記左好好稱呼，「喂」，「你啊」，「唔該」，「過一過黎啦」，「阿邊個」，聽到呢一連串既叫法，佢地係絕對係會借左聾耳陳對耳。認清喜歡刷存在感既人既諗法，係其中一樣職場求生心得。
不過，遊戲既玩法隨著時代會轉變，話時話，你地覺唔覺得試圖刷無力感既人開始湧現係職場？
反正返工既模式和工作量都係身不由己，一早已洩氣對自己既career path唔抱有期望，倒不如大被冚過頭，咩都事不關己咪唔洗煩惱囉！
總會見到，有一班新入職既，或者年資長既，對事事都提不起勁，即使老闆請飲貴價下午茶，都感覺行出黎拎個免費餐返埋位都好浪費佢地力氣咁，日日只想合埋眼快啲熬過係公司既九小時。佢地可能曾經有過對職場既衝勁，seed已爆去加班，但上司永遠講一套做一套，功夫沒完沒了亦只淪為內鬥鬼打鬼既工具。辦公室政治唔係個個都想被牽涉其中，自己也不過係食物鍊最底層既浮游生物，不如就當我不存在，將傷害減到最輕微。好快好快，就係因為經歷過百般無奈既情況，迅間決定唔再投放心力係工作上。
辭職轉個環境？唔好啦。唔排除去到第二間公司同樣係咁，無謂白費時間去重頭適應。好累了。刻意去令本來忐忑既自己變得麻木，唔係創傷既特效藥，反而係加促身心衰老既毒藥。
一個內心富足既人，從來唔需要特意去刷存在感，佢已然透徹了解到自己活著既意義。而一個無希望既人，亦無需要去刷無力感，佢自然會眼白白讓機會全流失而毫無傷感感覺。
以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
