加入日資公司前︰熟讀5個面試禁忌
世界咁大，奇人奇事陳出不窮。同大家分享吓部份奇葩應徵者，千萬唔好學呀！
1. 太早／太遲
曾經有應徵者因為早到咗半個鐘，打電話問可唔可以早啲上嚟，但因為面試官其實開緊會，結果佢上到嚟都係坐咗半個鐘…如果太早已經去到，就喺附近等一陣，到約定時間前五至十分鐘先上去啦！
其實大家去日本都會見到電車或者巴士會根據時間表上嘅Schedule準時到站，就知道日本人對時間觀念要求好高。就算係香港嘅日資公司，有時會嚴格到遲到1分鐘都唔開門比你入去（就算肯見你，分數都一定大打折扣）。
2. 有人陪面試？！
試過幫應徵者開門，竟然發現佢媽媽跟係後面，當堂唔知應該請埋伯母入嚟定叫佢走好…啱啱畢業或者第一次去面試嘅朋友有時候都比較緊張，會搵屋企人或朋友一齊去面試嘅公司。但如果佢地送你去到公司門口，就會令人覺得你唔夠獨立，未必能夠交託工作俾你。所以如非有任何特殊理由應該自己一個人去面試。
如果怕屋企人擔心，可以請佢陪你到公司或者車站附近，唔好比人覺得你仲要人「送返學接放學」，不過梗係自己一個人去就最好。
3. 素顏／無剃鬚
由於日本人在文化上非常著重端莊儀表，所以女士們記得要化淡妝，男士們一定要剃鬚，保持清潔觀感，就算你打算應徵Back Office工作都一樣啊！曾經有公司反映過有應徵者完全無化妝，或者著短裙甚至牛仔褲面試，令人覺得唔夠端莊。
4. 文件散亂，手袋放枱面、腿上、椅背……
試過有應徵者係袋入面拎出一大疊無分類又無放入File，好似份睇完咗嘅報紙咁…有時面試時需要睇唔同種類嘅證書，記得分類好曬再整齊放好。
另外喺日本文化上，就算你坐喺長梳化或者旁邊有空位，手袋或者公事包記住一定要放喺地下，手提電話更加係絕對唔可以出現喺枱面，仲要熄機。
5. 誇張嘅身體語言、左右搖擺、托頭……
面試時為咗表現出熱誠而做出太誇張嘅動作只會有反效果，左右搖擺或托頭會令面試官覺得你毫無誠意，無論你張CV有幾靚，都會大減分數！另外，同人講嘢就記住望住人地黎講，眼神左閃右避都好影響印象㗎！
如果你識少少日文，大膽用日文同日本人面試官打招呼，都可以表現到你嘅誠意。最後送幾句用得著嘅日文俾大家：
早晨：おはようございます(Ohayou gozaimasu／餓哈唷哥渣E嘜su)
午安：こんにちは(Konnichiwa／Kong need之娃)
多謝：ありがとうございます(Arigatou gozaimasu／亞Lee架多哥渣E嘜su)
Kingsway Personnel Ltd.主要提供日資公司或日語職位。
我們會於Facebook專頁及網站定期提供最新工作機會、職場/港日資訊以及日語活動。
僱主及求職者可電郵至hkdept@kingsway-hk.com 與我們聯絡。
以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
