做老闆身邊嘅紅人,一定要識得借花敬佛

做老闆身邊嘅紅人,一定要識得借花敬佛

HR熊 - 職場航行日誌

人事部工作既小妹,見盡唔少公司既「人」同「事」,係呢個平台上一齊分享職場上既苦與樂,笑與淚。

More Blogs

巧用「精人出口,笨人出手」,務求以最慳水慳力既方式達致老闆眼中既最高效率有能之士。咁借問精人是如何煉成的?

數數手指,喺公司入面,你認識既同事或者高層有幾多位?講緊嘅「認識」,並非無任何感情交流,純粹出於禮貌向對方打招呼既街坊朋友,而係見面時會閒聊吐下苦水嘅普通朋友。普通朋友堆入面,又有幾多位有機會係工作上俾到實際幫助或者利益你呢?

暗藏各種絕技嘅同事唔少,你要用心力眼力發掘到出黎。如果你擅長油腔滑調,考用小聰明討人歡心加埋厚一厚嘅面皮,已經事半功倍!早前無意中係電視上見到馬浚偉先生係節目回顧番以往飾演《鹿鼎記》中嘅康熙一角,男朋友就一時興起同小熊重溫舊劇集,本身明明係想睇番當年嘅康熙幾咁俊俏,點知唔夠半集已經俾佢身邊既大紅人韋小寶迅速轉移咗我地視線。呢隻聰明又詭計多端嘅小鬼,好識得捉人心理,大家明知佢經常信口開河無厘正經,但每次係緊急關頭又可以人急生智,諗到方法逢凶化吉,不知不覺產生左一種魅力對佢又愛又恨,令人開始信服佢講嘅說話。

我地人事部出咗名有位生得好標緻既甜姐兒Apple,雖然年過三十又濃妝艷抹,不過佢係處理人際關方面的確好有天分兼訓練有素。「Peter哥哥,我部Printer唔知點解成日Jam晒紙,你電腦方面咁叻,麻煩你過黎幫我睇下啊!」其實電腦叻同整Printer根本係兩回事,只係聽到有同事咁低聲下氣「哀求」你,引導你嘅虛榮心浮上面,咁搞法唔大顯一下身手點得呢!Peter好簡單咁打開內籠睇下,清番入面塞住既紙部機就Run得番,Apple作狀細細力拍手掌,仲加句「唉啊,你話呢度無左你點算啊!唔該晒你!」邊講邊順手拎咗包隔離部門阿邊個嘅旅行手信請Peter品嚐!Peter不以為意,仲覺得咁小意思有人拍案叫絕又送小禮物,仲唔笑笑口以為自己好威!

就算甜姐兒同你幾唔熟悉都好,佢總會不厭其煩每三兩個月就主動安排一次全部級數差唔多既同事黎個午聚,天南地北咩話題都傾到。等你放鬆警戒時就會突然追問你最近既狀況,無論公事、感情定係是非上,聽著佢似係親切關心嘅聲線,加上群眾一致等待你回答既眼神,無咩抵抗力嘅人好容易和盤托出,唔小心洩漏風聲。能幹嘅天文台就當然將接收番黎嘅消息,整理好後用黎做話題轉告俾老闆知,嗱……唔係老闆八卦問架,係佢「關心」同事轉達下佢地嘅諗法同意見啫,咁襟撈實會被加以重用,同時又唔覺意顯出佢同同事打好晒關係,一舉幾得!

識人好過識字,係職場真理。

人事部「做騷」嘅機會多的是,係老闆眼中,係重要關頭「攞到人」等同獨力主持左個招聘日一樣咁大挑戰。每次安排活動都希望可以平均地得到每個部門既參與,不過根據過往經驗,十次有九次都係靠我地啲同事打人情牌邀請番嚟。Apple一開頭係完全擺出事不關己的姿態,唔會插手,只係用順風耳留意住事情既動向,知道老闆想要啲咩人就開始暗地裡鎖定目標,邊個Talk得玩得,邊個演奏樂器唱歌叻,邊個做手工佈置有心機,全部心裡有數。然後等老闆無晒計頭都痕埋好慌張周圍搵同事幫手既時候,Apple就會一擊KO!佢會口甜舌滑咁說服啲同事仔參加,變身為跑數嘅保險經理,落足嘴頭講到佢地趁機會俾人認識下係對自己前途幾咁著數,考升級試印象分都高啲。每成功爭取到一單老闆對佢既好感就加一分,當佢做到top sales既時候,紅人地位更穩固。

一個精人,只要靠把嘴同埋平時夠眉精眼企,係有需要既時候將技能發揮到出黎,解決老闆既煩惱。識穩用呢招借花敬佛,自自然漁人得利!

 

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!