【辭職學問】離職上司冇通知HR 最後幾日先知辭職信畀上司攔咗！

不少打工仔以為鼓起勇氣遞交辭職信後，就能輕鬆地迎接新生活，然而現實往往沒有那麼簡單。離職需要遵循一定的程序，從遞交辭職信到進行離職面談，若過程中出了差錯，可能牽連甚廣。近日，一位打工仔在社交平台「Threads」分享自己辭職時的意外經歷，指自己一個月前已正式提交辭職信，然而到了最後一周，HR（人力資源部門）卻表示從未收到通知！究竟當中發生了甚麼事呢？

即看事主經歷及網民回應：

+22

+21

HR：「咦，我哋呢邊冇收到你哋部門通知有同事會走喎，我想問吓你幾時遞咗信？」

我：「吓？我上個月月頭就遞咗了喎，計返個Effective day應該係今個星期三就Last day……」

HR：「我哋真係冇收到通知喎，你可唔可以Send返個Email record畀我睇吓？」

跟住我即時Forward個Email畀佢睇，佢話會同我部門上司傾吓。隔咗半個鐘後HR打嚟：「同你上司傾完，佢話因為之前同你傾過話你會考慮吓唔走，所以佢攔咗封信，冇通知我哋。」

我：「吓，佢從來冇搵過我傾喎？我幾日後就唔喺香港，咁而家即係點？」

HR：「你等等，咁我哋同你上司傾吓先，今日內畀個答覆你。」

跟住喺我今日放工之前，上司同HR都係冇搵我。想問吓大家，咁我Last day係咪可以直接走？

網民A：首先你做錯咗一步，你Send完Email辭職，係要隔一兩日跟手打去同HR再次確認或者BCC（Blind Carbon Copy，密件副本）畀HR以防萬一，你記得留返Email record照跟Effective day離開，到時佢屈你賠或者錢銀唔啱數就勞工處見。

網民B：我見識過一個同事就係咁，最後佢出殺手鐧，出個電郵話自己幾時Last day去晒全宇宙曾經都有收過佢Email嘅人度，逼上司面對佢要走嘅事實。

網民C：你係「通知」佢你辭職，唔係求佢畀你辭職，Keep返Email或者其他紀錄就可以。

網民D：我都試過，辭職信寫住幾月幾號辭職，畀一個月通知。但阿姐玩嘢，話我封信冇寫明Last day日期，唔合規格，佢唔收得。我去問HR，佢一睇就話封信好清楚，有齊資料，叫我再用Email send畀阿姐再CC（Carbon Copy，電郵副本）佢哋就可以。

網民E：1. 印嗰封辭職信出嚟，Keep住佢，裱起佢；

2. 跟返Last day走人；

3. 唔好單獨同上司談話；

4. 唔好亂簽嘢。

網民F：你快啲Forward返個Email record去你自己私人嘅Email度，梗係跟返你本來嘅Last day啦！

網民G：你已經白紙黑字Send咗畀直屬上司，上到庭都係你啱，所以Last day照舊就得㗎喇！

網民H：離職不論係佢炒你，或者你炒佢，都係單方面通知就得㗎啦！掉返轉，如果係佢炒你，使唔使你同意？

網民I：你Keep低自己封Resign email就冇問題，又唔係公司機密。你聽日一早即刻將封信直接Send畀HR，CC你老細，再寫埋根據今日討論嘅內容，直至COB（Close of Business，下班時間）都冇收到上司嘅直接回覆；又根據Email record，一個月之前已經遞咗辭職信，畀夠一個月通知，你嘅Last day係星期三，請HR通知你有咩手續要離職前辦理。

網民J：最近都試過，不過細公司，老闆以為我唔會走。我係咁Chur各個部門主管Hand over，但最後都要我做多一個星期……

謹慎對待離職程序 保障自身權益

帖文一出，熱心網民紛紛為事主獻計。有網民建議立即保留辭職信的紀錄，並將事件的前因後果以及當日與HR討論的內容整理到電子郵件，一併發送給上司與HR，再按程序辦理離職手續。亦有網民叮囑，提交辭職信時需要抄送到HR電郵或與HR聯絡確認。也有不少網民分享自己類似的經歷，這提醒我們，辭職時不能掉以輕心，每一步都要謹慎對待，留下充足的證據以備不時之需，必要時運用法律保障自身權益。

以下有10項辭職的Do's & Dont's，計劃辭職的打工仔應仔細留意：

+8

+7

延伸閱讀：【辭職學問】公司表示無收過辭職信點算好？事主：佢反問我有無證據.....

延伸閱讀：【2024更新｜辭職信範例】辭職原因理由/遞信時間/通知期/計算方式

延伸閱讀：【離職都有面試？｜辭職學問】點解連離職都有面試？Exit interview會問啲咩？打工仔應否講真心話？即睇咩係Exit interview、離職通知期計算方法、得體退出公司群組

延伸閱讀：【辭職學問】老細話年廿八年三十唔畀辭職？網民：我會賠錢走！

最新專訪片︰

【Office豪華旅行團】安永會計重視多元和企業社會責任 培養包容性的企業文化

⏩⏩  需要請人？立即刊登招聘廣告！  ⏪⏪