Next
【職場熱話】Micromanagement可以去到幾癲？打工仔細數上司微管理惡劣行為
【職場熱話】Micromanagement可以去到幾癲？打工仔細數上司微管理惡劣行為
2025-01-03
在眾多的管理風格之中，最令打工仔頭痛的莫過於「Micromanagement」（微管理），事因這種管理方式事無鉅細地監視員工的一舉一動，使他們受到束縛之餘，更感覺不被信任。有打工仔在社交平台「Threads」發文，控訴工作生涯中遇到上司的種種瘋狂微管理行為，例如監控閉路電視、計算員工午飯時間、追問請假理由等。一眾網民苦微管理久矣，紛紛加入細數上司「控制狂」行徑的討論中。
按圖及看事主經歷及網民回應：
事主：「我返工生涯嚟講，遇過最癲嘅 Micromanagement 例子：
1. 老細覺得準時6點收工嘅人係太得閒冇嘢做，所以佢會睇返CCTV邊個準時走，然後第二日專登畀多啲嘢嗰個人做。
2. 公司用開Google Drive，老細會逐個開晒大家嘅文件，監控住你係咪真係做緊嘢。
3. 要求同事去廁所同放lunch前要話聲佢聽，佢會計時，一唔喺位就問你去咗邊。
4. 每次請AL都要你講理由，就算你話去旅行，佢都會問長問短要知晒你行程先肯批。試過生日想攞兩日AL，佢又會問：生日都要日假？咁多節目㗎咩你？」
網民A：「以前有個主管，copy and paste規定要用滑鼠點，唔可以用Ctrl C同Ctrl V，而且仲會喺你後面監視你係咪真係跟佢方法。」
網民B：「我之前有個老闆，佢set到全公司所有人email進出都會bcc佢，睇晒全公司啲email，仲會無啦啦jump in。」
網民C：「1. 返到公司要先填本日工作計劃。2. 放工離開公司前要填time sheet，幾點做過乜，幾點開過咩file。3. AL要30日前申請，因為成個approval procedure 係30日。」
網民D：「以前都遇過一個老闆，只要佢發出指令，就要馬上回覆。例如打畀你一定要兩聲鈴聲內接聽，收到email嘅十分鐘內要覆，佢放咗係tray嘅嘢要即清走，等等。做唔到嘅話，佢會行去你個位搵你問點解唔覆；如果你唔喺位，佢會寫低時間，mark好memo紙叫你搵返佢，再計你用咗幾多時間先覆。Micromanagement嘅程度係要100%跟足佢嘅方法出文件，字體行距table width都要一樣。」
網民E：「以前做過一間公司，個老細要求全公司都用一個類似msn嘅app去溝通，我同同事懷疑佢mon實所有同事嘅對話。於是有次同同事夾埋，特登喺個app度講『唔明點解要咁樣處理某件事』，老細隔一陣捉咗我哋去開一個會，第一句就話想解釋嗰件事點解會咁樣處理，怕我哋唔明。」
網民F：「老細係被公司耽誤嘅保安專員。」
網民G：「好癲，試過老細唔喺度，我同客入conference room開會，開開吓老細突然打電話問個客係做咩，嗰吓先證實佢3點前唔返工只係為咗睇閉路電視。」
網民H：「每朝寫to do list、希望大家每日同佢食lunch做朋友、放假公司有event要你自願去、連開6個鐘會、管埋你平時IG post咩、捉標點符號係咪跟足佢所有格式。」
網民I：「以前試過做實習，人事部及每個員工提供一個空白嘅時間表，要求員工每做一樣事項就記錄低，用電腦、去廁所、食lunch，都要記低所用時間。」
網民J：「我老細成日睇CCTV邊個偷懶，有人係茶水間飲緊水，其他人入去就話人偷懶。成日話點解某team同事可以準時放工，其他team同事要開OT，明明大家工作內容都唔同。」
網民K：「呢啲唔係micromanagement而係控制狂。」
給予員工信任和尊重 創造良好工作環境
不少網民提到微管理導致的繁瑣程序影響到了工作效率，亦有網民提到，上司甚至會監控員工之間的私人對話以及社交平台，嚴重破壞了公私界線。這樣的管理方式令打工仔如坐針氈，為了員工良好的工作心態和公司的穩定發展，管理層應要給予員工充分的信任和尊重，打造舒適的工作環境。
以其人之道還治其人之身，即睇事主4招反擊微管理：
「1/既然佢要你咩事都報告，咁就唔好客氣，事無大小都email/msg佢。例如啲task一唔明就鉅細無遺咁問，轟炸到佢都覺得煩。我試過佢叫我改文件嘅每一個地方我都cap圖send畀佢證明我做咗，一份文件send 20幾張圖畀佢，最後佢話我唔使再send畀佢。
2/Set deadline畀佢叫佢覆你，加多句需要佢嘅指導先推進到task。如果佢唔覆你都有嘢留底，證明啲嘢晾住喺佢到。然後我會每日都提佢覆，將個壓力轉嫁去佢身上，唔好自己食晒。
3/對付成日𥄫實你進度嘅人，可以調返轉問：「你係咪有新諗法想加？一係你review完先，我之後繼續做。」用One drive或Google drive嘅人可以直程將個doc set去得你睇到先，做完再set返去。
4/至於監視放工時間呢，最緊要係你夠薑起身走人。就算佢臨收工前先畀嘢你做，要出聲講你做唔切，然後建議一個合理期限；若果佢情緒勒索你OT，就問返佢要claim OT錢，或者直接講你有緊要事做。」
當然，不是所有情況都適合像事主一樣勇猛反擊，處理不當或會招致麻煩。
若想更平和適宜地應對上司的微管理，以下有幾種策略可以參考：
1/理解原因：試着了解上司為什麼會進行微管理，是因為他們對結果過分關注，或是對團隊缺乏信任？理解原因可以幫助你找到更切實可行的應對方法。
2/建立信任：主動與上司溝通，展示你的能力和責任感。定期匯報工作進度，減少上司不必要的擔憂。
3/設定界線：與上司討論工作方式，嘗試設定一些界線，明確上司可以干預的程度，要求更多的自主權。
4/尋求反饋：向上司主動尋求建設性的反饋，展示你的專業態度的同時，讓上司感到自己的意見被重視。
5/保持專業：即使產生負面情緒亦要保持專業態度，避免與上司正面衝突，專注於如何改善工作關係。
6/尋求支持：如果情況已超出自己可解決的範圍，可以考慮尋求人力資源部門或其他管理層的支持，共同商議如何改善工作環境。
延伸閱讀：【職場熱話】打工仔斥新公司「微管理」好難頂 出去見客要填表 遲到逐分鐘扣錢 仲要員工喺ＯＯ自拍！？
延伸閱讀：【職場八卦】遇過最難頂嘅上司係點？網民：Micromanage一定係極品中嘅極品！
延伸閱讀：【職場熱話】新工返咗幾日 發現上司OOO！ 事主大呻：做咗20年嘢都未遇過……
延伸閱讀：【Z世代】年輕打工仔唔管得？招聘專家：Z世代在不發命令的工作場所效率更高！
最新專訪片︰
【Office豪華旅行團】安永會計重視多元和企業社會責任 培養包容性的企業文化
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!