Next
【急住請人=伏？】面試即日收到Offer 但要Buyout兩個月！究竟係咪伏？
【急住請人=伏？】面試即日收到Offer 但要Buyout兩個月！究竟係咪伏？
2025-03-20
求職與招聘往往是一場博弈，尤其是當公司急於請人時，打工仔難免會心生疑慮，究竟公司是真的缺人，還是潛藏着風險呢？近日，有網民在社交平台「小紅書」發文，指他面試當天即獲錄用，然而公司要求他盡快入職，事主面臨要支付通知金的困境，令他感到非常憂慮。於是發文向網民詢問，這樣的情況是否有「伏」？
即看事主經歷與網民回應：
事主：公司請人好急，係咪一定係伏？上個星期五朝早見工，下晝就收到Offer，但係佢哋好急住要我返工，一開始話下星期一，之後又話最遲下下星期二要入職，而我有兩個月通知期，即走就要賠代通知金。之後同HR（人力資源部門員工）Argue咗好耐，佢話過兩日覆我，要同老闆傾吓，結果噚日收到嘅消息都係下下星期二入職。想問吓有經驗嘅朋友，呢種情況係咪有伏？同埋請教吓Buyout嘅經驗，星期六日同公眾假期使唔使計埋？
網民A：超級伏，我都係朝早見工（仲要係好出名嘅外資公司），第二日朝早就收到Offer。見工嗰陣仲講到好好聽，話好注重員工放工時間、好包容、好透明，結果份合約得一張A4紙，條款完全唔透明。但因為係畢業第一份工，唔知頭唔知路就簽咗，簡直係惡夢！Micro-management好嚴重，日日放工之後話要跟返外國時間，Training到差唔多凌晨，冇加班費仲要PUA（即透過心理操控或情緒勒索打壓或羞辱他人。）我，連我綁鞋帶嘅姿勢都要畀人話，仲要一個人當我係成Team人咁使，兩個月就頂唔順辭職了。
網民B：係，仲有就係見工時嘅感覺都好重要。我當時唔信邪，而家仲慘過中邪。
網民C：我感覺真係可以由呢啲細節就睇得出公司好唔好。我當時入職，公司畀咗一個月時間，我話要5個星期，對方都同意，入到去真係好好嘅公司。
網民D：兩個月通知期真係好長。
網民E：可能係離職潮，好缺人都話唔定，好似我上間公司咁。
網民F：唔一定，有時只係想快啲Handover先咁急，如果太遲入職Handover容易出現問題。不過我都試過面試中資，即場出Offer畀我，仲要不停遊說我，唔畀時間考慮，結果就係大伏。
網民G：我就係因為公司出Offer出得快，又急住搵工，選擇即刻入職仲放棄咗其他見工機會。結果就係後悔咗成年，準備下個月辭職。
網民H：要賠兩個月人工畀現公司？好大風險喎。
網民I：你同新公司傾，你有兩個月通知期，佢哋咁急要人，可唔可以幫你Buyout？我之前有個同事都係咁，公司好趕住要人，所以肯幫佢出錢。
網民J：正常公司急嘅都會願意出代通知金，唔願意嘅真係要考慮吓。
網民K：如果新公司唔係特別好嘅話，唔好Buyout啦，一般有通知期公司都會理解，唔理解嘅話就唔會出Offer畀你。
網民L：大概率係伏，但都不一定，主要係你個通知期有啲太長，等你嘅時間都夠重新請人了。
全面考察公司 衡量風險與機遇
不少網民都認為該公司的做法不合理，企業通常都理解求職者有離職通知期，如果要求員工盡快入職，應由企業支付代通知金；有網民猜測公司是出於交接工作的考量，才作此要求；亦有網民表示事主的通知期太長，企業有顧慮也屬正常；也有網民提醒，有時從細節便能看出公司的文化，面試時的感覺和後續的溝通，都是考察公司的重要參考指標。面對這樣的情況，建議打工仔從多方面了解公司，衡量風險和機遇，才能避免「中伏」。
入職前如何了解公司是否適合自己，可以從以下5方面入手：
1/ 查看網上評價
瀏覽求職平台，閱讀現職或離職員工的評價，了解公司文化、管理風格及常見問題。
2/ 研究公司背景
透過公司官網、新聞報道或社交平台，了解其業務發展、市場地位及未來方向，判斷是否與個人職業規劃契合。
3/ 面試時主動提問
在面試中詢問公司文化、團隊合作模式和晉升機會等，觀察HR或主管的回應是否真誠及具體。
4/ 與現職員工交流
透過求職社交平台或人脈網絡，聯繫公司現職員工，詢問日常工作體驗及公司內部情況，獲取第一手資訊。
5/ 留意招聘流程細節
觀察公司是否尊重求職者時間以及流程是否專業透明，這些細節能反映公司對員工的態度及管理水平。
關於代通知金的計算方式，《僱傭條例》有如下說明：
►代通知金（通知期以日或星期為單位）
僱主或僱員發出終止合約通知的日期（下稱「通知日期」）前12個月內僱員所賺取的每日平均工資 X 通知期內通常須付給僱員工資的日數 = 代通知金
►代通知金（通知期以月為單位）
「通知日期」前12個月內僱員所賺取的每月平均工資 X 通知期的月數 = 代通知金
另外需要留意的是，勞工處列明在計算每日或每月平均工資時，須剔除未有付給僱員工資或全部工資的期間，包括︰
(a) 休息日
(b) 法定假日
(c) 年假
(d) 病假
(e) 產假
(f) 侍產假
(g) 工傷病假
(h) 在僱主同意下放取的假期
(i) 沒有向僱員提供工作的任何正常工作日
以及需連同就該期間已支付的款項。
延伸閱讀：【勞工法例｜辭職】一文睇清辭職後 通知期、代通知金、年假、雙糧或花紅點計
延伸閱讀：【勞工法例丨通知期】打工仔圍爐呻離職要3個月通知期！網民：我要XX個月，仲誇！
延伸閱讀：【辭職轉工】通知期有3個月點轉工好？打工仔唔想裸辭又怕蝕代通知金 網民：有3個月搵工咪仲好
延伸閱讀：【勞工合約】返新工被合約嚇倒 無試用期、離職通知期半年 網民：多數超惡頂
最新專訪片︰
【Office豪華旅行團】安永會計重視多元和企業社會責任 培養包容性的企業文化
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!