【中年失業】中年打工仔遭裁員自信心大受打擊網民：收拾心情開始搵工啦！

CTgoodjobs' Editor

Published: 2025-12-29 09:15

Updated: 2025-12-29 09:15

人到中年，不少打工仔不是身兼公司重要職位，就是以求穩定的心態工作，希望能順利工作至退休。不過，若然在中年階段突然遭到裁員，未知各位打工仔又能否承受這龐大的衝擊呢？近日，有網民於親子王國討論區發文，指自己最近遭到公司裁員，更坦言是次裁員令到他頓時感到自卑，質疑自己毫無能力，因此詢問網民中年被裁算不算一件大事？

事主分享及網民回應

+24

+23

事主：終於到咗我被裁呢日，真係好唔開心。雖然都有幾個月遺散費，但屋企有經濟壓力，心口好似有嚿大石咁唞唔到氣，唔想父母、小朋友擔心，只係可以對老公呻。人到中年知道身體健康係最緊要，比起身體有事失業其實都唔係咩大事嚟，暫時自己仲未睇得開。上年10月開始都有keep住搵工，但可能因為市道差、中年中層人工唔低，加上呢份工我已經做咗10幾年，人哋會覺得我唔夠競爭力。呢一年嚟已經send咗過百份CV，有好多連面試機會都無，個人真係無晒信心……而家連公司都裁員，覺得自己好無用，睇失業睇到好大件事咁。想問吓中年被裁算唔算大事嚟？

網民A：收拾心情開始搵工啦！

網民B：識個朋友都係人到中年，喺舊公司地位僅次於老闆，但今年過年前公司結業。一過完年，佢已搵到新工，所以與其在呻，不如真係行動去搵工。

網民C：你做開咩工？可以試吓搵其他行業，有啲工種好缺人！

網民D：唯有調節心態，如果真係急，就要擴闊吓工種，應該唔難揾的。加油！

網民E：我有屋企人接受咗公司嘅「肥雞餐」，直接攞咗一年人工，之後就玩咗一年。玩完返嚟就即刻搵到，人工只係以前嘅一半，但份工可以長做到退休。中年人有嘅係經驗，好多大公司都會請，所以絕對唔使擔心。

網民F：真人真事，我間公司2023年擴充開分公司，一直請唔夠人，好多後生仔見完工之後就全部放晒飛機。最後都老闆嬲得濟，一口氣請咗五個50歲以上嘅中年人士，之後再請多幾個就快60歲嘅人，老闆仲大讚50歲以上嘅人工作態度認真，做嘢仲好穩陣。

網民G：畀啲時間自己！呢刻會係覺得大件事嘅！既然係事實，努力再從新出發就得，而家市道唔好，中年人搵工有熟人介紹會比較容易！如果真係有經濟壓力不如降低要求，搵份低级少少嘅工做住先，起碼有收入先，然後邊做再邊揾。

網民H：我同你一樣，都係中年先被公司裁，而家搵工真係唔容易……

網民I：如果一直無面試，試吓執一執CV、求職方向。上網有人教你點樣執好份CV。你揀人，人揀你。Send過百分CV都無interview，估計樓主CV無hit到啲關鍵字。

網民J：屋企負擔大，返基層工又會唔夠錢應付開支，畀啲時間減吓人工，而家你只係心情仲未調整好，覺得前路茫茫啫。

網民K：最主要係個市靜咗好多，不過50歲左右嘅人要搵工係好多好處，老闆/上司覺得大年紀啲嘅做嘢有交帶好多，亦都鍾意請呢啲年紀，好多後生嘅仲未定性，做1至2年就會轉工，所以唔好灰心！

延伸閱讀：【職場規劃】37歲打工仔突遭解僱一家七口等住養長遠可以點？