【職場謊言】同事為整衰上司扮患情緒病 打工仔︰覺得佢好恐怖

香港人壓力大，無論工作還是照顧家庭，都需要投放不少心機和時間，長期令精神繃緊，假若無法釋放壓力，容易患上情緒病。最近讀者GiGi分享了一位公司女同事K小姐的故事，由於K小姐工作效率不佳，經常遲到早退，令部門主管感到十分不滿，曾在同事面前當眾責備K小姐，K小姐懷疑心有不甘，假扮有情緒病及欲控告部門主管，令事件越弄越麻煩…

按圖了解整件事的始末︰ 讀者GiGi分享︰「K小姐都算係我哋部門資歷較深嗰個，不過其實佢都只係做咗5年左右。5年都係資深，原因係我哋公司嘅流失率其實好高，可能係人工唔高，又多嘢做，所以好多人做一排就走。同事都知㗎，公司養咗好多懶人，基本上公司唔炒人，等啲人自動流失。老闆個想法係，啲人走咗咪請過囉，而家個市又未去到請唔到人，佢完全唔驚有工無人做。K小姐可能係恃住公司唔炒人，咁多年嚟都無咩貢獻，成日返工等放工，得閒就喺Office同個仔講電話。

有次我阿姐畀咗個客K小姐跟，可能佢平時懶開我唔知啦，佢跟到甩晒。有好幾次個客仲直接打嚟同阿姐投訴，其實阿姐都幫K小姐頂晒。阿姐見K小姐再係咁做嘢好影響公司運作，咪直接走去K小姐個位，話佢成日遲到早退都算，仲跟甩個客啲嘢唔得囉。大家見到K小姐當下個樣已經唔係好順，但無諗過過幾日之後…K小姐拎咗張醫生紙返嚟，話阿姐當日當眾鬧佢，搞到佢精神緊張，仲有啲抑鬱症狀。佢仲諗住拎呢張醫生紙畀老細睇，想老細因為呢件事鬧阿姐，或者直接炒阿姐。大家當下其實都覺得K小姐過份咗，平時見佢喺公司都無咩嘢，成日同個仔有講有笑。就算係佢被阿姐鬧完嗰兩三日，除咗係當下見佢條氣唔多順，基本上都無見佢喊過唔開心過。

我哋有同事有問過K小姐個狀況嘅，點知佢直認係專登同個醫生講話自己好唔開心，仲無任何抑鬱症狀！佢咁做，只係想報復阿姐當面鬧佢。大家當下都覺得K小姐好恐怖，唔明點解可以咁樣做…不過紙都係包唔住火，老細雖然收到K小姐嘅醫生紙，但係佢都唔太信K小姐真係有病。有次K小姐仲好衰唔衰，喺Pantry同老公講電話，大聲得滯畀老細咁啱行過聽到，言語間話佢精神無問題之類。老細聽到梗係火都嚟啦！最後佢Warn完K小姐，再勸K小姐自動離職。其實老細都算係咁啦，知K小姐有頭家要養，本身佢Hea底都唔理佢。但居然無嘢搵嘢
嚟搞，仲要講大話…勸佢自願離職已經好好㗎啦！」

因工作患上精神病 可否向僱主追討賠償？
根據《僱員補償條例》，若僱員因工作及在僱用期間，遭遇意外引致受傷，或患上該條例涵蓋的職業病而導致喪失工作能力或死亡，僱主即有責成向僱員作出賠償，但保障範圍並不包括由工作直接引致的精神疾病或精神損傷，因此僱員未必可以獲得賠償。

延伸閱讀︰【職場熱話】離職後 公司del晒所有自己參與嘅作品 網民：自己做嘅嘢一定要留底！
 

老闆迫員工主動辭職10大常用手段
以上K小姐的個案，是否有足夠理由令老闆勸自願離職，見仁見智。不過職場上，不少老闆都會因為想幫公司開源節流，迫員工主動辭職，從而避開賠償。究竟老闆迫員工主動辭職，又有哪10大常用手段？

按圖了解更多︰

 

延伸閱讀︰【職場文化】老闆鍾意挑撥離間員工關係 打工仔：連同事移民都唔畀Farewell

延伸閱讀︰【職場熱話】老闆大呼員工係公司最大資源 補充：因為公司最大支出係人工！
 

 

⏩⏩  需要請人？立即刊登招聘廣告！  ⏪⏪