【職場奇聞】同事2周內狂請12日病假！理由日日新鮮！網民笑爆：期待佢仲有咩理由！

CTgoodjobs 編輯部

出版： 2025-07-31 14:15

更新： 2025-07-31 14:15

病假是職場中的基本福利，旨在保障員工在身體不適時能夠安心休息，促進健康恢復，維持工作效率。然而，當病假被過度使用或頻繁請假，尤其是理由多變且令人質疑時，便可能對團隊運作和同事間信任造成影響。近日，有網民在Treads發文，指同事在兩週內請了12天病假，每日理由各異，既讓人哭笑不得，也引發網民熱烈討論。

同事2周內狂請12日病假！

+37

+36

樓主：
過去兩個星期收到同一位同事嘅請假申請，理由真係層出不窮，除咗"take care"仲可以講咩？
Day 1: 屋企人傳染感冒
Day 2: 肚痾
Day 3: 仲係唔舒服
Day 4: 上吐下瀉
Day 5: 上吐下瀉
Day 6: 正常返工
Day 7: 乾嘔肚痾
Day 8: 流鼻血頭痛
Day 9: 正常返工
Day 10: 心口痛
Day 11: 仲係唔舒服
Day 12: 屋企人發燒

網民A：
我以前個reception partner都係咁㗎，返工未夠1個月，每個星期都最少2日sick leave，頭痛、肚痛、M痛，到拗柴齊晒。第2個月行動升級，屋企人唔同程度嘅病，要佢陪睇醫生同照顧，轉頭就話自己唔夠休息返唔到工。第3個月仲勁，話自己有情緒病，唔可以返工，怕多人怕見光好頭暈。經理好同情佢㗎，話大家都係教徒，唔會講大話。最致命一擊，佢又話要請幾日假，因為前一晚見到外星人，好panic喎，經理聽完好嬲，講返畀我哋知，我哋笑到胃抽筋，本身好體諒佢嘅經理都忍唔住，即炒！

網民B：
試過有個同事扮病去韓國追星，返到嚟冇耐有人篤佢灰，畀埋佢ig出post啲相我睇，我就叫HR出信即炒。篤佢灰嗰個平時同佢好friend，真係好似宮鬥劇咁。隔咗一排，我求其搵個藉口炒埋佢。

網民C：
我試過病足14日，HR仲要唔信上門拍門。我收到風即刻打畀佢，唔係求情係叫佢幫手買支寶礦力上嚟，之後放足我成個月，仲要喺公司群組寫明「嚴禁xxx飲含有奶類成份飲品」。

網民D：
請咁多SL有冇醫生紙？

網民E：
屋企人發燒請SL？

網民F：
我想講我本人身體真係好差，基本上個個月都病，唔係感冒就係敏感，或者腸胃炎。自己都唔想請病假，但係病到死死吓返工仲死，仲要傳染其他人。

網民G：
奇怪，點解仲未炒？

網民H：
佢係咪攞假去咗第二度返part time？我呢個old seafood，真係未見過咁都唔炒，你HR太縱容呢啲人。

網民I：
喺你上面嘅人未出聲就唔好諗住出聲喇。

網民J：
Day13: 我就是爛唔想返工，理由唔諗了。

網民K：
有時唔係話信唔信，想射波都唔緊要。但大佬，你唔好咁過分啦，雖然我真心佩服有人做得出。

網民L：
返工恐懼症都係病嚟㗎。

多數網民認為此類經常請病假且理由牽強的行為，容易造成職場信任危機與團隊困擾，亦有不少人質疑是否有醫生紙作為證明，懷疑濫用病假。部分留言則提醒真實病患的辛苦與無奈，認為因病請假本應被體諒，指出病假不應被濫用但也不能隨意懷疑正當請假者。此外，有網民以幽默口吻評論請假理由的多樣甚至荒謬。