【家庭矛盾】發錢寒阿媽只在乎未來女婿有樓有錢 要求女兒「止蝕離場」？

家庭矛盾有很多種，兩代人在談婚論嫁的話題出現分歧便是其中一種。最近有女網民於連登討論區訴苦，指摘自己母親見錢開眼，只在乎自己男友的經濟能力，得知男方經濟狀況後甚至要求事主盡快「斬纜」！究竟是甚麼一回事？

即睇事主經歷：

+17

+16

延伸閱讀︰【兩性關係】嫌男朋友唔發奮儲錢買樓 打工仔：我真係冇信心將自己未來交畀佢

事主：「本身屋企住公屋，阿爸地盤佬一個，無乜學歷；阿媽無做嘢，無學識無技能嘅師奶。由細到大都同佢哋都唔係特別親，但相對上同阿爸關係會好少少。佢哋對我嘅了解都只係知我讀邊間中學、邊間大學，至於讀咩科我都無同佢哋講過。由細到大都無咩資源畀過我，完全係放養式咁養大我，零用錢呢啲奢侈品當然係無。甚麼興趣班、補習、去Exchange、去旅行乜都無份。

記得小學有一次，我見同學學琴，我同阿媽講我都想學。佢一句：「學咩呀？有咩好學？」就完咗呢段對話。金錢上嘅資源無畀，連精神上嘅支持都無畀，淨係識得拎其他人嚟踩低我⋯⋯畢業之後出嚟做嘢，佢曾經問過我攞家用，我同佢講要我交家用我就搬出去。本身平時喺屋企大家都無兩句，反而有返啲距離感對大家最好。

有次同佢講我拍緊拖，佢第一樣關心嘅就係對方有無樓，講埋啲咩千祈唔好幫人供樓，最好就層樓都寫埋我個名。見我男朋友有層私樓供緊，就係咁話要約埋我男朋友出嚟食飯見個面。去到食飯嗰日成程係咁問人以前返咩工、依家返咩工、層樓供幾錢⋯⋯知佢唔係Full Pay就嫌人無錢，成餐飯黑口黑面咁。返到屋企又畀說話我聽，話唔知邊個個仔喺邊度有層Full Pay嘅樓，問我做咩唔揀佢。淨係考慮對象有幾多層樓、有幾多錢，完全唔提人哋性格學歷興趣。佢唔在乎個人適唔適合我、我會唔會鍾意，只在乎個「未來女婿」有幾多層樓，佢可以拎出去同人晒命。最好笑係佢叫我唔好再同我男朋友錯落去，要止蝕離場。

我覺得好委屈我男朋友，去佢屋企食飯氣氛都好好，會傾啲日常生活嘢、講下未來，無人會問我人工幾多、屋企住公屋定私樓。因為咁我都同咗兩老嘈交，叫佢哋要求人哋有車有樓之前都要睇吓自己屋企咩條件，依家係我哋屋企條件差過人，但佢哋偏偏睇唔到呢一點。佢哋仲係覺得自己無錯、係想我好，仲強烈否認自己淨係講錢。佢仲癲到受害者上身咁，話第時我哋結婚唔會得到佢哋嘅祝福⋯⋯其實我想講，佢哋唔出現就係對我最大嘅祝福。」

►最新【旅遊 / 觀光】職位空缺

即睇網民回覆：

+6

+5

網民：你真係要止蝕，快啲搬出去，唔好再理佢地兩個。

網民：祝你早日斷絕關係。

網民：次次見到呢啲阿媽呻自己個女對自己差都好想兜巴星埋去，叫佢諗吓自己做過啲咩。

網民：你都要拎你阿媽同人地阿媽比，話畀佢聽自己有幾廢。

網民：你男朋友有層樓供緊都叫無錢？咁佢自己住公屋嗰啲叫乜？

網民：試下搬走唔理佢哋一段時間，如果無改善就唯有老死不相往來。你出嚟做嘢點都有能力搬走，睇你肯唔肯。

網民：你家中兩老直頭係想賣女咁。

網民：有類似背景，但我先斬後奏搬咗出去。通知佢哋會搬嗰陣嘈得好勁，但我心意已決，然後開展我人生最快樂嘅階段。

網民：老豆老母你係無得揀；但你嘅人生係有得揀。

網民：佢哋無有用嘅意見畀到下一代，只會情緒勒索，以為將仔女同叻人比較就可以得到自己想要嘅結果，但多數會適得其反，令人反感。

延伸閱讀︰【行業趨勢】2024年興起「單身經濟」？Meta預測：營銷應用呢啲工具係大勢所趨！

耐心溝通必有成果？
網民們主要認為事主父母沒有廣闊的眼光，只懂對事主情緒勒索，傳播錯誤價值觀。若果對象固執己見，不懂從對方立場思考及嘗試理解對方，即使其中一方保持耐性溝通，對解決問題的幫助仍然不大。香港的生活壓力巨大、私人空間狹窄，連想找個宣洩情緒的地方都沒有。要花大量精神時間理性溝通，雙方同心協力將矛盾化解又談何容易？

►最新【銷售 / 顧客服務 / 業務發展】職位空缺

生於香港問題特別多？按圖了解更多香港家庭矛盾糾紛。

+14

+13

延伸閱讀：【家用問題】母親因不滿家用金額 斥打工仔自私 事主：我想儲錢啫⋯⋯

延伸閱讀：【打兩份工】打工仔為養家朝9晚10 盼獲支持 網民：辛苦又搵得唔多！

最新專訪片︰
【星級斜槓族】Cloud雲浩影曾做過侍應、補習老師及派傳單 風格多變深受觀眾喜愛 冀能實現演唱會夢

⏩⏩  需要請人？立即刊登招聘廣告！  ⏪⏪