共建銀齡友善職場

資料來源: 勞工處

阿超與任職人力資源顧問的舊同事Helen敘舊，談到友善對待年長人士的僱傭措施。

阿超：「公司有幾位同事就嚟退休，但成兩個月都仲未請到合適人選替補，都唔知點算！」

Helen：「你哋公司有冇考慮過聘用年長人士啊？佢哋擁有豐富嘅工作經驗、知識同技能，待人處事成熟，又可以協助培訓新人，咁就可以解決人手短缺嘅問題啦！」

阿超：「聽落幾好喎，可唔可以詳細啲講吓點做呢？」

Helen：「僱主可以按企業嘅個別情況，運用靈活嘅模式聘用年長人士，例如延長現職員工嘅退休年齡，或者提供一啲兼職職位畀年長人士申請，吸引佢哋繼續工作或重投勞工市場。」

阿超：「公司仲可以點樣營造有利年長人士就業嘅工作環境呢？」

Helen：「公司可以採用彈性上班時間，方便佢哋兼顧工作同家庭嘅需要；又可以顧及年長員工嘅體能狀況，喺工作時間內安排休息時段，同埋提供輔助工具同設備，例如改善燈光、增設活動放大鏡同埋可轉換字體大小嘅電腦顯示屏等，配合佢哋工作嘅需要。想知更多，可以睇下勞工處嘅《共建銀齡友善職場》小冊子。」

阿超：「年長人士擁有寶貴嘅工作同人生經驗，值得我哋重視，不過只欠機會，只要有合適嘅工作，佢哋一定可以繼續發揮所長。」

《共建銀齡友善職場》小冊子

⏩⏩  需要請人？立即刊登招聘廣告！  ⏪⏪