【人際關係】點解公司可以咁多人事問題轉極工都係避唔到！網民：份工夠忙就無心機搞人事問題！

2024-01-23

正所謂「有人的地方就有是非」，辦公室更經常被人戲稱為戰場，同事之間都會因不同原因而互相看不順眼，引致一連串人事問題。近日，有網民於連登討論區發文，指自己已經轉過數份工作，但公司經常都出現人事問題，使事主不禁疑惑是否每間公司都必定充斥着人事問題。

延伸閱讀：【轉工太密】經常轉工令僱主覺得太jumpy？網民：一定有個人之處先可以不斷轉到工！

按圖了解事主及網民回應：

+17

+16

事主：點解公司永遠都充斥住一堆人事問題，成日會因為啲好小事就唔鍾意某位同事。我轉咗幾次工，每間公司都一定會有人事問題。雖然啲人事問題唔關我事，但每次見到都覺得好煩，好驚之後我都會牽涉其中。真係好想知有冇人份工係好舒服，一啲人事問題都無？

網民A：做IT或者工程嘅話，因為男同事多過女同事，所以好少會發生人事問題。

網民B：基本上如果你份工可以唔使點理其他人嘅話，就唔會有人事問題發生。

網民C：我而家間公司因為好忙，除咗傾公事之外，都唔會有時間同其他人傾偈。所以只要份工係夠忙嘅話，根本就無時間或者心機製造人事問題。

網民D：好多人事問題都係啲老海鮮整出嚟，成日持住自己年資高，就會拉攏其他人入佢哋個小圈子，杯葛啲唔肯埋堆嘅同事。

網民E：我曾經聽過隔籬team好多人都唔鍾意某位同事，有位同同佢關係稍微好少少嘅同事幫佢講好說話，之後成team同事就一齊杯葛嗰2位同事，最後願意講好說話嗰位因為頂唔順就辭職，另一個就扮唔知畀人杯葛，繼續留喺公司。

網民F：我間公司暫時無咩人事問題，有啲女同事共事咗10幾年，每日只限公事上嘅交流；男同事之間就會成日傾偈，但多數都係講股票、跑馬、足球嘅話題。大家都知返工還返工，除非有共同興趣先會傾吓閒偈。

網民G：完全無人事問題，因為細公司，同事都唔多個……

網民H：曾經聽同事講，係我未入職之前，有某幾位女同事因為一齊做咗10幾年嘢，佢哋自成咗一個小圈子。每次公司請新人都會畀面色佢睇，或者直接無視個新人。

網民I：每次遇到人事問題，都會覺得其實大家都係返工，專心做嘢算啦。成日講是非、唔鍾意某某同事而嬲、又成日做啲小動作，佢哋唔覺得攰咩？

網民J：想遇到一間完全無人事問題嘅公司真係可遇不可求，有人嘅地方就會有是非，有是非通常代表同事之間有不和，只係睇不和呢件事會唔會做到出面。

網民K：試過見到有同事完全無參與公司任何黨派，只係專心做自己嘢，但因為佢工作能力好好，惹到其他同事妒忌佢，然後佢就無啦啦捲入咗公司黨派啲明爭暗鬥入面，最後佢覺得好麻煩就決定辭職。

延伸閱讀：【職場熱話】舊公司上司對工作能力讚口不絕但新公司竟然要延長試用期？網民：延長試用期係想你自己辭職

對於事主的經歷，眾多網民都表示深感共鳴，分享自己任職的公司發生過的人事問題，例如因看不順眼某位同事，繼而整個團隊一同杯葛他；年資較深的同事組成小圈子，欺負新入職的同事；因為有同事忌才，而牽連他人捲入辦公室政治當中，因此不少網民都表示人事問題普遍都存在於每間公司。有網民分享，由於任職的公司工作過於繁忙，完全沒有同事有閒暇或者精力來興波作浪，暫未出現任何人事問題，並認為自己實屬好運，無需分神處理複雜的人際關係。

延伸閲讀：【職場熱話】大公司人工唔差但完全冇嘢做打工仔想轉工！網民：讓個位畀我！

按圖即看25歲打工仔為避辦公室政治，轉行做保安的經歷：

+10