【職場熱話】收銀員離職時被要求扣糧賠錢否則報警 網民:報警告返間公司
CTgoodjobs' Editor
零售行業靠日常貨品銷售來維持營運。貨品出門前,收銀員可謂把關者,要確保顧客付足金錢,以及避免貨物失竊。不過,收銀員同樣是人,總有出錯機會,收錯錢不足為奇。最近,一名收銀員不堪壓力辭職,怎料僱主突要求一次過賠償過往出錯而累積的損失,否則報警。事主就此到社交媒體轉頁「奴工處」投稿,惹來熱烈討論,甚至建議報警,究竟僱主要求有沒有問題呢?
延伸閱讀:【職場熱話】離職即背叛老闆?網民:曾被恐嚇「唔使指擬再撈呢行」
即睇事主分享及網民回應:(按圖了解)
事主:「由於收銀工作大壓力,唔啱數就要自己貼錢畀公司。為咗負責任,我都曾經補貼咗6舊水,之後都唔敢再大意找多錢畀人。
我亦都冇理到勞工處嗰個員工只賠上限300蚊條例,就照賠返畀公司先。之後諗住辭職休息,再慢慢搵新工,點知老細就叫我最後一日返工離開公司之前,將過去曾經令公司損失嘅公款全部還返畀公司,填返準確條數先可以離開,如果唔係就報警。
我心諗,我明明一早將要還嘅錢已經畀返公司啦!我又唔係冇還到,點解仲要咁樣講嘢呢?而且超市咁大間都裝咗CCTV,點知係咪一定係我整唔見公司啲錢,一係就睇清楚!」
網民:有證據就告盜竊,無就勞記!
網民:希望你間嘢係大嘢,越大間你就越有得玩。
網民:投稿者被人勒索,建議報警。
網民:直頭同佢報埋警啦,唔使煩!
網民:同佢講而家係你報咗警。
網民:答佢好呀,最好報警,一定全力協助調查,另外最好計足人工、大假、補水,唔係我一定上勞記。
網民:記住叫佢提出證據先好賠三舊水!
網民:掉返轉指住條法例同佢講,之前賠多過300蚊嗰啲叫佢還返畀你。
網民:乜嘢叫做曾經?超市收銀埋數要更更埋、日日埋,有問題就即刻出聲,之後講就口同鼻拗。
網民:日日收工都要埋數清機,交更又要對數,你依加嚟同我講唔啱數,咁你即係做數啦。咁成件事除咗報勞工處之外,仲要報警、報ICAC、報埋稅局喎!
網民:明顯係經理落咗格,再卸落你度,橫掂唔做,梗係報警啦!
網民:幾舊水都計,仲要人哋已經畀返錢,小家到咁……
網民:有證據就有得賠。無證據就賠條毛畀佢。
網民:如果即時埋數你唔賠返嘅,會唔會有刑事責任先?
網民:我曾經試過間賤嘢出信話搵律師追討。
網民:咁樣恐嚇都得㗎咩?啱㗎啦,報警啦,因為你畀人恐嚇緊!
網民:同公司講人情即係對自己殘忍。
扣糧總額設上限 網民呼籲事主報警
眾多網民認為事件無理,僱主應於損失發生時要求僱員賠償,而非到離職前累計金額。此外,相信是來自零售業的網民提及,收銀員「日日收工都要埋數清機」,甚至交更時都要確認錢箱餘額,出問題時應立即處理,否則死無對證。另多名網民指,事主應向僱主要求證據,避免被誣捏。
多名網民亦聚焦於賠償金額,對事主曾單次賠償600元感不值,認為事主才是要報警的一方。根據《僱傭條例》(香港法例第57章)第32條,當僱員疏忽或失職而損壞屬於僱主的貨品、設備或財產,僱主有權扣除該僱員的工資,每次事件可扣除總額應與損失價值相等,但同時不得超過港幣300元正。
即使事主可能多次出錯,但《僱傭條例》第32條同樣規定,僱員在任何一個工資期內被扣除的款項,不得超過該工資期內薪酬的四分之一。
事主最終下場不得而知,但許多網民支持離職決定,其中一名網民直言揶揄僱主「小家到咁」,「幾舊水都計」。總言之,打工仔應該清楚法律條文,保障自己,避免受僱主愚弄或剝削。
根據《僱傭條例》,僱主只可在下列9種情況扣糧:(按圖了解)
(上述部分並非法律文件。有關法例條文的詮釋,仍以法例原文為準。若遇上類似事件時,應尋求法律專家之意見。)
延伸閱讀:【勞工法例】上司企圖拖延Last Day 辭職通知期計算方法你要知!
CTgoodjobs is Hong Kong’s leading recruitment platform. Our editors brings you the latest salary trends, interview tips, and professional courses. We provide comprehensive career insights to help you navigate career transitions, break through bottlenecks, and stay ahead in the workplace!


Follow CTgoodjobs for the latest career news, hot topics and recommended jobs!