Next
【散水餅】好同事被上司欺凌最後辭職！派散水餅時打工仔欲為對方出頭！網民竟反罵事主？
【散水餅】好同事被上司欺凌最後辭職！派散水餅時打工仔欲為對方出頭！網民竟反罵事主？
2024-10-24
眾所周知，「散水餅」是打工仔在離職當天派發的零食或飲品，從而向上司及同事表達謝意。有打工仔在Threads分享一個散水餅的相關經歷，指好同事因為無法忍受上司的欺凌而辭職，事主在對方派散水餅時，決意為他出一口氣，豈料竟被網民斥責。
點圖了解更多事主分享：
事主：「關於散水餅，我曾經有唔係幾好嘅回憶。我啱啱出嚟社會工作嘅年代，工作嘅地方有個大我5年嘅姐姐，喺工作上好照顧我，教我都好有耐性，都唔怕我成日煩住佢問佢嘢，但係當時嘅男上司好唔鍾意佢，最後迫到佢辭職。
嗰日佢Last Day，買埋散水餅返嚟，有一件係特別豪華，嗰個貪心嘅男上司就第一時間拎咗去自己位，諗住洗完手就食。因為嗰個上司欺負嗰位同事令我覺得好氣憤，所以喺佢去洗手嗰陣就搶咗佢嗰嚿蛋糕，諗住食咗佢。
點知嗰個同事好惡咁叫住我，佢第一次用咁嘅態度對我。唔知係咪因為佢辭職，唔使再畀好面色我睇，但佢為咗個咁差嘅主管嚟話我，呢件事令我好唔開心。不知不覺都過咗一段時間，唔知佢而家過成點？佢其實係好好嘅人，只係佢冇必要喺離職嗰陣討好一個對佢咁差嘅主管。」
網民回應
A.1. 搵新工會reference check，無謂得罪舊工嘅人。
2. 佢已經被犧牲，但留低嘅人係你，佢希望你可以平安。
3. 山水有相逢，做人點都應該留一線。
我之前做咗幾年嘅partner，係一個好情勒嘅人，強迫症亦好嚴重，大家算係面和心不和。基本上我係因為佢而成日唔開心，所以辭工。經常有同好朋友呻頂唔順，朋友話：「到你quit嗰日，鬧爆佢啦，唔使再畀面呢段關係。」不過到最後我覺得，多一事不如少一事，我離開咗其實已結束痛苦。神奇嘅係，我quit嗰日佢仲買餅請返我食，跟住後來請啲人好廢，partner比以前痛苦，於是公司高薪叫我返去做兼職，咁啱我又未搵到工，暫時懶得搵新工又返去食回頭草
再次返返去做，佢又對我好好，一笑泯恩仇咁，所以其實無永遠嘅敵人。
B.你咁多年都冇成長過，係一件好難得嘅事。
C.個女仔咩原因都好，人哋拎咗返位嘅嘢，你去「搶」，就係偷，理得係主管定reception。
初出社會工作就咁冇禮貌，仲要到而家都唔知自己錯咩，真係唔係咁多人可以做到完全唔進步，佩服！
不過諗深一層，前面舖排咁多想去合理化自己偷人蛋糕嘅行為，會唔會其實只係你自己為食拎唔到件大嘅，心有不甘寧願做賊，所以整啲「代人報仇」嘅藉口美化自己。
D.如果你到現在仲耿耿於懷，證明你年歲增長，都仲係不懂人情世故。
E.如果事隔多年都唔理解姐姐點解叫住你嘅話，你到今時今日嘅心態仍然係啱啱出社會。
F.總之佢嘅出發點就係為你好。
G.你嗰下如果成事的話，只係一時幫姐姐報咗仇，但係日後就有排你受。
H.佢驚你留低會畀主管針對，因為佢知道被針對有幾難受。
I.因為出嚟做嘢，你就算憎一個人都唔可以搶佢嘅蛋糕。
J.姐姐處事很成熟，當時你咁做，後果可能比姐姐鬧你更難堪，你應該感恩有人及時拉你一把，試想男上司發難，話你偷東西，全公司嘅人都喺背後講你，我相信流言中傷更令人難堪。
K.呢啲無厘頭文化，應該要消失。
L.呢日係佢嘅last day，唔係你嘅last day，你咁做只會令自己被針對，而且你嗰位阿姐係教緊你，人哋攞咗嘅嘢你再搶就係偷，唔排除佢對你呢個行為失望。
M.你呢種行為瓜田李下，近乎陷害人。
對於事主所謂的「復仇」行為，網民一致認為事主太不懂事。有網民就拆解同事阻止事主的原因，覺得這個世界沒有永遠的敵人，沒有必要做得太絕。有人就認為事主過了一段時間，還沒有想通同事行動的用意，代表他的思想一直沒有成長過。有網民就直言同事救了事主一命，否則事主在公司的生活就會後難受。有人就發表個人意見，認為散水餅這種文化應該要消失。
00後開始不派散水餅？（點圖了解更多）
甚麼時候派散水餅才對？（點圖了解更多）
延伸閱讀：【職場貼士】Last Day當日要做的8件事 幾點派散水餅好？
延伸閱讀：【辭職學問】Last Day唔派散水餅 被老前輩問候：係咪聽日會補派？
延伸閱讀：【職場文化】Last day買散水餅 但同事竟然⋯⋯ 事主：呢間公司真係好差！
最新專訪片︰
【星級斜槓族】Cloud雲浩影曾做過侍應、補習老師及派傳單 風格多變深受觀眾喜愛 冀能實現演唱會夢
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!