其實行前少少都需要勇氣
Danvis Lau(久保)
從事獵頭業務超過12年，Fillture Group獵頭公司、Fillture Career Coaching Limited職涯規劃服務公司創辦人、全職獵人FulltimeHeadhunter Facebook Page作者，現有大約45,000位followers。持有澳洲墨爾本RMIT大學．雙碩士學位(Commerce & Communication) 、 澳洲墨爾本Monash University．雙學士學位(Management & Marketing) 、 職涯服務規劃師（CCSP）、全球職涯發展師（GCDF）資格。
More Blogs最近睇咗一本書叫《無限賽局》，個人非常喜歡本書其中一個觀點：「每個人一出世就自動成為玩家，我哋冇得揀，唯一可以揀嘅，就係用「有限思維」定係用「無限思維」去參賽。如果我哋揀咗「有限思維」，我哋在意嘅就係贏，比別人更富有、比別人更快晉升、比別人更成功；如果揀咗「無限思維」，代表我哋會選擇會為了比自己更偉大的信念而努力，我哋會將擁有相同願景的人視為伙伴，努力一齊推動共同信念。」其實從個人層面定係商業角度，世上有太多壓力都在迫使我們走向有限賽局，造成許多領導人太短視，著重短期效果、獲利優先於員工等。
「別讓規則限制了你的想像。」
我承認自己行得比較前，某程度上因為我一啲理念、行動，甚至商業決定都會令到某些人反感──因為我覺得每一樣都可以做得更加多，去令到呢個獵頭市場更加不同。
雖然心裏面嘅聲音成日想我自己有朝一日可以顛覆個市場，創造「以人為本」嘅求職者、獵頭和客戶的三贏局面，但畢竟羅馬都非一日建成，我心裏面好多計劃其實都要逐步逐步去嘗試、去推行。
不經不覺自己做咗12年獵頭，自問係一個360獵頭──即係由Call客開客戶， Call Candidate到最後Placement都係自己一手一腳完成。一路都覺得其實喺香港呢個市場，求職者對獵頭；獵頭對求職者；甚至公司對獵頭嘅態度、定位非常薄弱。三方面都係建立喺利益上面，好似「我幫到你搵人就係你嘅朋友，如果唔係我都費事睬你」；「獵頭都係當我哋係一件貨，啱用就用，唔啱用就將我哋甩埋一邊」；「你幫到我哋公司搵人，最緊要又平又快又啱，最好可以一個月價錢就可以幫我哋公司搵到人」。
每一個行業都有良莠不齊的人，我哋獵頭呢行都會有，因為朋友或者自己過往嘅經歷，其實好多人都對獵頭好唔信任甚至當我哋只不過係一個Sales；又會有好多獵頭真係當求職者係一件貨，純粹利益交易；亦都會有公司，一次過用十幾間獵頭幫佢搵人，搞到全行都知道佢哋搵人，幾乎每一間獵頭都比四五個求職者去，真係做壞個市場。
我覺得「去中間化」會係未來幾年嘅趨勢，低中端嘅就業市場已經愈來愈少用獵頭，客戶好多時都會用自己嘅方法搵，換言之，香港大部份嘅求職者其實係少咗一個方法、一個中間人去幫佢哋去搵工。
我用逆向思維，行前少少於前年推出Career Coaching職涯規劃服務，一年之間其實做咗差唔多超過500個Cases，截至今日，已經有過千個成功個案，其實算係唔錯的成績。市場上愈來愈多我哋標誌性嘅CV、Visumé、設計內容，愈來愈多求職者自己做完Career Coaching，了解個規則可以教到朋友或者介紹身邊朋友；用我哋教嘅寫履歷表方法同埋面試要講什麼搵到工作固然最好，就算暫時未搵到都可以想像到好快會因為我哋嘅方法而搵到工作，我哋正慢慢改變緊個市場，幾年前邊有咁多人理解甚至去做Career Coaching，而家每次做完我哋問返Feedback，幾乎所有人都會話：「原來履歷表可以咁樣寫」、「真係唔知道原來面試可以講呢啲」、「你令到我有新嘅諗法」。
我相信Career Coaching，Visumé同埋一個去中間化嘅求職平台會創造一個新的生態圈，希望係不久嘅將來可以開始顫動這個求職市場。呢個就係我嘅理念，亦都係我成立FILLTURE GROUP嘅初心。自己顛覆既有的商業模式和策略，去嘗試全然不同的新路，假如用有限賽局的思維，呢個會係極大嘅風險，但如果用無限賽局的思維來看，這是必要的選擇，領導的勇氣是願意為未知的未來冒險，我唔係為咗贏，我係為咗創立一個願景，一個可以走得更長、更可持續嘅將來。
以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
Follow CTgoodjobs for the latest career news, hot topics and recommended jobs!