Next
【職場私隱】公司四圍裝有高清閉路電視 網民：咁似監獄
【職場私隱】公司四圍裝有高清閉路電視 網民：咁似監獄
2022-02-14
打工最重要是完成應有的工作，令公司運作暢順同時，也為公司整體創造價值。每天上班八至九個小時，打工仔若全日都開啟全速工作模式難免會感到疲累，加上當今資訊發達，在不影響工作情況下看看手機並非十惡不赦的事，但如果你的辦公室裝滿閉路電視，你又會有甚麼感覺呢？最近，有名打工仔到社交媒體專頁「奴工處」投稿，憶述其某前僱主在細小辦公空間裝有大大小小的閉路電視，密度竟然是幾乎每100呎地方1部閉路電視，網民直呼離譜。
延伸閱讀：【職場熱話】WFH要畀證據？ 開會要cap圖？ 網民：小學生咩
即睇事主分享及網民回應：（按圖了解）
事主：之前做過一間公司有勁多cam，6000呎唔夠地方有60隻cam。
事主：全部cam高清、實時、夜視、收音。
事主：公司仲會喺員工廁所外裝讀卡裝置，監察員工一日去幾多次廁所。
網民A：監獄嚟㗎？
網民B：返工返到入冊咁！
網民C：《1984》真實版。
網民D：我都做過一間公司CCTV會收音，有個同事忍唔住講咗幾句晦氣說話，即時畀老細叫入房照肺……
網民E：話說幾年前，公司新請中層，老闆突然走去問佢，某月某日下午4時13分24秒你喺度做緊咩？
網民E：事後個中層話諗咗3日，先記起自己買咗張機票用公司電腦print。後來先知公司cam可以放大到excel表格內容都可以睇到一清二楚，阿大、阿二得閒就睇cam當煲劇，仲邊睇邊研究劇情。
網民F：間公司可能係賣cam？
網民G：呢啲工就算係銀行金舖都好，唔做都罷！
網民H：返工就不用怕cam！我以前返工個位有3個cam對到正一正，影晒！邊有人24小時睇住個cam？除非出咗事。
網民I：我試過有一間公司，萬五呎廠房，裝咗120支Cam，除咗廁所之外，全公司係零死角，任何一個位都至少比兩個cam影到……
網民J：之前返過一份文職都係咁，個寫字樓好細，每個座位嘅天花頂都有一個cam，真係黐線……
網民K：我上份工去廁所前要簽名，然後要通知全公司，去完又要簽名同通知全公司。管理層連員工飲水都唔鍾意。我地要喺檯底、後樓梯飲水。因為我成日口乾走去飲水，佢哋就話我經常失蹤。
網民L：仲好，唔使成日有人問自己去咗邊，一句「你自己睇Cam囉」就攪掂！
網民驚呼《1984》真實版 指引：與業務無關風險非監察理由
雖然現時不少辦公室均出於保安理由而增設閉路電視，但眾多網民直呼事主前僱主的監控行為過分，尤其閉路電視竟然更允許僱主監聽。許多網民認為閉路電視並非問題，但「收音就過份咗」。事主投稿更吸引了相信在澳門賭場工作的網民留言：「我做賭場，基本上係零死角，但最少唔會收音，收音呢樣嘢真係過咗火。」從此可見，即使保安規格較高的賭業，其閉路電視也未必會收音，可大部分打工仔也未必希望公司能透過閉路電視監聽。
雖然眾多網民認為監控行為過分，但許多打工仔留言表示自己曾有類似經驗，直言這些辦公室是反極權主義小說《1984》真實版，老闆透過閉路電視監察員工一舉一動，就如小說中的極權老大哥（big brother）透過電幕（telescreen）監控民眾所有行為一樣。
根據私隱專員公署《保障個人資料私隱指引：僱主監察僱員工作活動須知》，僱主須先做出有系統的評估程序，包括風險評估、替代選擇及盡責管理，其中風險評估部分列明，「純粹臆測與業務性質無關的風險，並不足以成為監察僱員的理由」。私隱專員公署建議進行監察活動前應擬定聲明，詳列監察活動細節與用途，並分發予所有僱員。香港大學法律及資訊科技研究中心「社區法網」指出，「除非僱主經已取得僱員的明確及自願給予的同意，或根據法律下有適用的豁免情況，否則收集得到的個人資料只能用於僱員監察政策訂明的用途（或與其直接有關的用途）」。
延伸閱讀：【見工奇遇記】見工遇上奇怪老闆 老闆茹素禁止員工食豬肉
延伸閱讀：【職場熱話】打工仔投訴公司設備世界級差！乜嘢都壞 電腦、雪櫃、自動門無一倖免！
延伸閱讀：【勞工法例】返兼職疑遇黑店 老闆：出少咗糧會次月出返 究竟有無問題？
Tags︰
- 職場
- ,
- 香港個人資料私隱專員公署
- ,
- 職場文化
- ,
- 職場貼士
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!