【買樓夢碎】樓市冧市、裁員潮！有樓仲慘過冇樓？90後慶幸冇買樓：驚失業斷供變銀主盤！

CTgoodjobs' Editor

Published: 2025-07-04 09:05

Updated: 2025-07-04 09:04

近年香港經濟放緩，裁員潮頻現，令不少有意置業的年輕人「買樓夢碎」。在高息環境下，失業風險成為壓垮供樓能力的最大隱憂，斷供、變成銀主盤的個案屢見不鮮。近日有90後在Threads分享，自己未及早入市反而慶幸，免受樓市波動和失業風險雙重打擊，認為「有樓未必好過冇樓」。

有樓仲慘過冇樓？

+66

+65

樓主：身為一個90後，而家年紀都有30中，當年啱啱出嚟做嘢都有個目標諗住買樓，嗰陣24歲。但今時今日心態完全唔同晒，好慶幸自己冇衝動買樓，身邊好多活生生例子變咗負資產，仲要死死地氣受盡上司同啲客氣，都要繼續做份工。草根香港人買樓真係好慘，一世人為咗層樓，供到50歲供完，到時個仔女出身，又要幫佢畀首期。平時去個旅行都要就住就住，買樣嘢都要覺得日本買先抵。有樓嗰啲而家就好擔心個市咁差，度度都裁員，冇咗份工都唔知點供層樓。感覺係香港有樓，唔係有個安樂窩，而係一個好大嘅人生負擔。

網民A：我25歲出嚟做嘢就同家姐夾份買第一個單位，供供吓樓就會發覺供樓竟然平過租。通常供15年啫，初時係有啲辛苦，唔敢辭工，打工係會升職加薪嘅，做生意係會愈做愈大嘅……我都捱過咗，而家係中年收租公，我嘅目的係帶領家中各人走向成功。
網民B：我年紀大過你，反而慶幸買咗樓。嗰陣大學畢業就搬出嚟自己住，最初都係租樓，但好多限制，打粒釘都要扣按金，所以後嚟儲到首期，就買咗第一個物業自住（一手細單位），後來再入手其他當投資。自住就慢慢樓換樓，今年卒之趁價低，同老公買到四房dream house，裝修各樣都可以自己話事。其實自住最緊要計得掂條數，唔好諗賺蝕。
網民C：而家呢個時勢，個個都要擔心經濟差裁員啦，唔通租樓嘅失業都ok？
網民D：真係，時代唔同，而家唔可以靠樓升值而變有錢。唔可以用同一條formula apply喺呢個年代。至於買唔買樓，睇有冇需要，要結婚、生仔就可能有需要。如果冇，就唔使接火棒。keep住多啲流動資金，investment樓相關嘅stock都係一種喺樓上面嘅投資，唔一定要買樓先係投資。
網民E：幾時都話公屋人先係人生勝利組，冇壓力，每年去七次旅行，仲可以每年儲到十萬以上，退休時就攞住啲錢去東南亞或者大陸生活。
網民F：做咗十幾年租客，發現其實間中搬吓換地方幾正，冇咁悶又新環境。
網民G：如果同屋企人住，你咁諗都正常。但現實好多人唔係，就算唔買樓都要租樓。當然買樓生活壓力真係大，特別係經濟下行嗰時，一定會驚失業供唔起層樓。但如果選擇咗行買樓呢條路，最緊要唔好後悔，唔好怨自己做錯決定。如果覺得自己承受唔到風險，真係唔好買好過。
網民H：近幾年，買樓供樓嘅人好慘。不過只係心理上面慘。你自住都要交租啦。
網民I：你如果唔使做租客你咁講好啱，如果你要咁，請問你打算租到死嗰日？
網民J：跌咗咁多仲驚唔適合買？適合做塘邊鶴？30幾歲，搵錢易，轉工易，唔怕失業。過多10年去到四十幾，父母又老，仔女又細，又話要揸現金。結論都係申請公屋。話聲你知，香港業主少過公屋戶。
網民K：樓市無人估到，不過我自己搬過一次屋，覺得如果2-3年要搬一次都幾煩。
網民L：幫人供完幾十年樓，到年紀大咗發現好難租樓，買樓又要full pay上唔到會，到時你可能諗如果後生買咗層樓就好。供樓心理壓力一定有，一定要量力而為，唔好死充又要大又要靚又要新，計好數唔好逼死自己用大部份收入供樓。
網民M：香港地產就係變相嘅龐氏騙局，只要不斷有人相信樓價會繼續升，就不斷會有人繼續接落去買，直到最後接嗰批爆煲，先至如夢初醒！
網民N：你唔負擔都只係將痛苦留畀下一代，而家樓價咁低又大量增加供應其實ok啦。

部分人認為供樓壓力雖大，但長遠計算供樓成本甚至低於租金，且自住帶來穩定和自由，認為只要量力而為，置業仍是理想選擇。亦有人強調現時經濟不穩、裁員風險高，買樓斷供成隱憂，認為租樓靈活且無長期負擔，適合當下環境。另有觀點指出樓市已非過去快速升值的時代，應視個人需要決定是否買樓，保持資金流動性和多元投資更為重要。部分留言提醒買樓要量力而為，避免心理壓力過大，亦有人批評香港樓市存在泡沫風險。

延伸閱讀：【經濟發展】香港經濟斷崖式下降？仲慘過03年沙士時期？網民列2大理由力證說法！