【見工被刁難】面試官唔睇CV 仲要瘋狂開火！打工仔爆喊半個鐘！

面試是求職者與公司互相了解和的過程，求職者與面試官的身份理應是平等的。然而，近日有網民在社交平台「Threads」分享了一次令人崩潰的面試經歷，面試官不僅態度輕蔑，更刁難事主，令其自信心受挫，甚至痛哭半小時。究竟發生了甚麼事？

即看事主分享與網民回應：

+26

+25

事主：畀場面試搞到崩潰！自我介紹嗰陣，個面試官全程掛住撳電話，眼尾都唔望我一吓。跟住就開始瘋狂出難題，我答得唔好，佢就即刻開火：「我覺你好似唔明我講乜，我哋完全溝通唔到。」

仲叫我即場扮之前返工嘅情景，做完佢又話呢Part老土，嗰Part冇新意。跟住仲死追問之前公司啲細節，講完佢又唔滿意。

問我畢咗業幾耐，我話前年，佢即彈句：「哦，唔怪之得睇落咁冇諗法又冇經驗啦。」佢連我CV都冇睇清楚就叫我嚟，嘥我時間仲要玩PUA（注：「PUA」即「Pick Up Artist」，原意為「搭訕藝術家」，現多指透過心理操控或情緒勒索打壓或羞辱他人。），真係離譜到爆……

之後佢又遞張白紙同筆叫我即場寫嘢，我個腦已經空白晒，最後乜都寫唔出。佢輕輕力推返份CV過嚟：「唔好意思，我哋想要有經驗同有諗法嘅人，下次再合作啦。」我眼淺差啲當場喊出嚟，死忍到落電梯，終於喺公司門口爆喊半粒鐘……

網民A：明你感受，不過錯不在你，呢啲垃圾工唔使恨。

網民B：我試過聽到類似說話嘅時候企起身，好Firm咁話：「唔好意思，無論你覺得我適唔適合，我都覺得呢間公司唔適合我。」 跟住拎袋起身走。而且我嗰時好細個，得20歲左右。我會覺得每個人都有選擇嘅權利，你選擇我時，我都選擇你。你其實選擇聽晒佢咁多難聽嘅說話，仲要入晒腦，都係你嘅選擇。 

網民C：記住見工時，你都同時面試緊間公司，有唔對路可以Say no走人！仲有，有啲公司叫你上去係行家套料，基於商業保密唔好乜都講畀對方知。

網民D：係唔係中小型公司？因為正常大少少嘅公司，好少會單純由HR考核（多數係直屬上司），仲要用呢種態度。不過唔理點都好，下次Feel到唔對路就直接走，會咁樣對人嘅公司，本身就冇心請。且正常有前途嘅公司，好少會容許有呢類咁短視嘅面試官出現，邊個知未來有冇一日，去面試嘅人會走咗去呢間公司嘅客入面做？尤其係行頭唔闊嘅行業。

網民E：正常HR唔會咁講嘢，感覺呢間公司唔會正常得去邊。

網民F：喊咩啫！你應該開心，未入都咁Toxic，入咗去咪仲衰！

網民G：其實如果見工時覺得個面試官唔尊重，我會提早結束，有禮貌咁講：「其實我仲約咗另一個面試，如果冇具體嘅問題，咁今日就傾到呢度，我大概已經了解到貴公司係間咩公司，謝謝！」成日都話，見工，人哋見你嘅同時都係你見緊間公司，係因為人哋需要你嘅能力先要請人，你都有權挑選合適嘅地方運用你嘅能力。唔好因為見工就將自身價值降低！

網民H：有次面試，我仲坐喺度等緊入房，已經聽到啲HR喺度講上一個面試者嘅壞話。然後面試過程體驗當然唔好啦，最後膽粗粗反映咗畀佢哋聽，啱啱聽到佢哋講被面試者壞話。佢哋叫我返去等消息，如果適合會同返我講，我話「唔使啦，我諗你哋公司文化唔太適合我」，揮袖而去！

網民I：香港HR係叫面試官，係官嚟㗎，好大官威㗎，所以咪搞成咁囉！而搵工嗰個叫求職者，係求啊！以前我都見過好寸嘅HR，每句說話好似撩交嗌咁，最後我同佢拍枱收場，臨走嗰時佢同我講，話會通知呢行唔好請我，結果過咗兩三個禮拜我就搵到份工喇。

網民J：公司選擇人，同一時間你都選擇緊間公司，將來再有機會見工，放鬆心情去見，當每一次見工係經驗累積就得！你應該仲後生，大把機會，唔好將今次件事放上心！

尊重與專業是面試的關鍵

帖文一出，即引發廣泛討論，許多網民紛紛分享他們類似的經歷，並給予事主支持與建議。有網民認為事主無需自責，反而應慶幸及早發現該公司不友善的文化；不少網民都指出，面試是雙向選擇的過程，求職者可以在感到不被尊重時主動結束面試；亦有網民鼓勵事主，不必把這次不愉快的經歷放在心上，而是將每一次面試視作經驗累積。

正如網民所言，面試不僅是公司評估求職者的過程，也是求職者觀察公司文化的機會。無論結果如何，每一次面試都是一次學習和成長的機會，保持自信和冷靜，有助於在職場中找到真正適合自己的位置。

從企業的角度來看，面試官的態度與專業度直接影響公司形象。一個合格的面試官應以尊重和同理心對待求職者，並透過合理的問題考察其能力，而非刁難或貶低。企業亦應當重視求職者的面試體驗，培訓面試官以專業且友善的方式溝通，才能吸引更多的優秀人才，提升公司整體形象與競爭力。

同場加映：面試官黑面原因及應對方法：

+16

+15

延伸閱讀：【見工中伏】面試官講嘢勁細聲又冇禮貌！FG見工遇到咁嘅情况算唔算中伏？

延伸閱讀：【伏工特徵】見Office工要小心！網民喻求職者面試被要求做1件事即放棄？「呢啲公司多數好麻煩！」

延伸閱讀：【伏工預警】面試官好寸令人唔想take offer！答問題句句窒住晒？求職者：佢話我個答案一聽就知上網睇⋯⋯

延伸閱讀：【見工疑惑】HR話見工前已經要畀身份證副本同住址證明？咁樣正唔正常？

最新專訪片︰

【Office豪華旅行團】安永會計重視多元和企業社會責任 培養包容性的企業文化

⏩⏩  需要請人？立即刊登招聘廣告！  ⏪⏪