【擦鞋好過能力高？】舊上司因人工不合離職新上司上任人工直接翻倍事主大嘆：佢能力普通，仲要咩都唔使做，果然識擦鞋好過能力高

2024-12-18

打工仔夢想都是升職加薪，努力工作、展現表現都是希望受到上司賞識。不過，若然公司加薪及晉升機會並無制度可言，打工仔又會有甚麼感受呢？近日，有網民於社交媒體專頁「奴工處」投稿，指舊主任因人工不合選擇離職，但新主任人工卻是舊主任數倍，令到事主確切感受到職場的殘酷。

事主分享及網民回應

+23

+22

事主：幾個月前舊主任因為太低人工辭職，當時上司同佢傾咗好耐，最後只係肯加少少人工畀佢，同舊主任達唔到共識所以辭職。之後嚟咗個新嘅主任，人工同舊主任走嗰陣一樣。點知一過試用期就升職加人工，人工仲係以前舊主任想要嘅，差唔多加咗幾倍咁滯，聽到真係好無言……

其實上司唔想加就唔想加，佢想加邊個就邊個嘅話根本無制度可言。我本身以為個新主任有咩咁勁嘅工作能力值呢個人工，觀察咗幾個月完全覺得佢工作好普通，反而上司當佢係寶咁，咩都唔使佢做，將佢啲工作推晒畀我同另一個人身上，果然識擦鞋、畀到情緒價值好過能力高。

最近又到年尾又係時候做Appraisal，心諗做嚟都只係畀上司交功課，根本唔係用嚟評核同事嘅能力，更加唔係用嚟評估你有無得升職。我喺公司做咗咁耐，無過升職，只係每年年頭加少少人工，重要做埋原本主任嘅嘢，一薪三用！明明公司都叫大企業，但原來升職制度咁唔公平，真係越諗越灰……

網民A：感覺你會好難有晉升空間，你要改變自己先得。你如果覺得自己懷材不遇，其實好多人都係咁。以前呀頭有同我講過：「你唔好理人做唔做到嘢，佢升到職一定有佢原因。如果你都想升職，就要學吓佢有咩技巧。」

網民B：睇開啲啦，同埋保持自己競爭力！唔開心嘅話可以搵個另一份工。

網民C：職場從來只有靠關係，所以公司先有咁多冗員。

網民D：問吓舊主任去咗邊，睇吓佢有無好介紹！

網民E：可能人哋係上司啲自己人嚟，你新年後搵果份算啦。

網民F：職場真係無公平可言，幾時都係識人好過識字！如果你覺得呢間公司唔好嘅，不如搵定下家啦，話唔定有伯樂欣賞你！

網民G：算啦，舊主任自願走，新主任又咩都唔知。如果佢真係無過人之處就會畀人炒啦！

網民H：調返轉咁諗，有得升未必一定係好事嚟，人工高咗少少，但工作量大增。

網民I：做嘢識得同上司打好關係真係好重要。

網民J：你無得升可能喺同上司唔夾，做得上司梗係想搵個做到嘢又夾嘅人啦。

網民K：如果真係唔滿意個新主任，你可以集齊證據，同班同事一齊向上司投訴，只係睇你敢唔敢做，同如果得唔到預期結果時敢唔敢走。

延伸閱讀：【麻煩上司】打工仔呻上司工作指令唔清晰成日都五時花六時變！網民：講得太清楚佢就冇得賴！

對於事主的經歷，不少網民都表示同情，紛紛表示職場存在着「識人好過識字」的法則，員工與上司有着良好關係或直屬關係，職涯發展會比他人更為順利。有部分網民續指，即使作為普通員工，均會希望遇到相處舒服且工作能力良好的同事，上司有同樣想法亦為合理。若然事主對新主任不滿、認為自己懷才不遇，網民建議事主可以選擇離職，到新的環境發揮才能。

不過，有部分網民認為打工仔能夠身處高位或晉升機會，均是有過人之處，作為下屬應該好好學習，讓自己溝通能力或工作技巧得以提升，才會受到老闆或上司賞識，繼而有更好的發展。因此建議事主專注自己工作、持續學習，就能在職場上闖出一片天。

延伸閲讀：【職場趨勢】返工就想辭職？15大讓人最想辭職的工作！

按圖即看8大線索判斷上司對你的信任度：

+14

+13