【打工仔薪酬】00後獲公司賞識加薪15% 但福利麻麻又學唔到新嘢事主大嘆：究竟仲走唔走好？

2023-12-07

對打工仔而言，能夠獲得加薪固然開心，但若果現時職位的發展前景未如理想，打工仔又會不會因為加薪已留下呢？近日，有網民於連登討論區發文，指自己任職大公司，但因為發展前景與自己不符而打算辭職，但公司最近竟向事主加薪15%，令事主頓時感到疑惑，未能決定辭職還是繼續留守。

延伸閱讀：【見工面試】HR問「點解突然轉工」點答好？網民紛紛獻計

按圖了解網民回應：

+19

+18

事主：我而家返緊一間福利麻麻嘅大公司，喺呢度已經做咗1年嘢，開始覺得學唔到啲乜新嘢，加上工作量好多，每日做到冇停手，所以本身諗住做夠1年就會辭職，之後唞返半年，畀自己休息吓。

近排公司突然話加我$2,300人工，大約加咗15%。因為公司無啦啦加人工，搞到我唔知走唔走好。我做緊呢行好少會突然加咁高人工，諗過不如攞住呢份人工捱多3個月，遲啲轉工就可以嗌高啲人工。但同時又覺得，人嘅時間有限，嘥3個月時間繼續留喺公司做啲無謂嘢，好似搵新嘅出路會更好。

問過啲朋友，佢哋都話我仲咁後生，搵份有意義嘅工，同搵個教到嘢嘅好上司，比加人工更加有意義。有冇人可以指點吓我？

網民A：嚟緊度度都開始炒人，走咗隨時搵唔到工！

網民B：過完新年先再作打算啦。

網民C：你個行業難唔難搵工先？好多人都移咗民，間間公司都爭住請人，公司加人工留人都好正常呀！

網民D：老實講，如果加你$2,300人工都令你咁困擾嘅話，建議你唔應該走。

網民E：你知唔知行情係點？$2,300係咪公價？Over咗嘅話你遲啲未必叫得返，如果係under或者係行情價就做住先啦。

網民F：公司肯加你$2,300人工，就做多年先啦。你做得1年Junior，邊有可能咁快冇嘢學。同埋你話想唞半年，建議你真係唔好咁做，搵多半年錢同剩使半年錢已經差好遠。

網民G：繼續做，然後keep住搵工。公司都係加你$2,300人工，又冇要求你留喺公司打一世工。而家已經年尾，2月又新年，邊有咁快搵到新工，騎牛搵馬先啦。

網民H：除非你清楚知道下一份工追唔到而家升幅，如果唔係諗唔到原因點解唔試吓走？你驚搵唔到工咪用SL或者AL嚟見工，呢個唔一定係一刀切嘅決定嚟。

網民I：返多一個月先，當入息證明你加咗$2,300之後，就可以搵定新工。好多公司只會睇你上一個月嘅人工，同埋部分公司出嘅人工可能已經高過你加咗人工嘅價。至於好老細或者上司，就睇你好唔好彩啦。

網民J：返工嚟講，主要都係諗份工啱唔啱自己、人工夠唔夠使，同工作前景，我估你而家應該比較關心前景多過人工？

網民K：嚟緊咁多假放，好快就做夠3個月，遲啲先再決定搵唔搵新工啦。

延伸閱讀：【職場文化】千祈唔好對公司付出真感情？網民：建議真係當試工

帖文一出，旋即引起網絡熱烈討論，大部分網民都認為事主應該繼續在公司任職，指出事主只得1年工作經驗，但公司已經願意加薪15%，可見老闆肯定事主的工作能力；即使他日決定離職，事主亦能以新的薪酬覓得更高薪酬的工作。另外，有部分網民表示，現時經濟不佳，擔心事主辭職後未能找到工作，因此紛紛建議事主不應毫無準備下辭職。

延伸閱讀：【職場年齡差】90後由年輕人變中年人經驗傳承給00後網民唔多buy？

按圖即看轉工的價位升幅：

+15

+14