【見工奇遇記】公司狂出招聘廣告 目的唔係請人？求職者︰HR係咁收風

本港疫情逐漸緩和，最新失業率亦稍稍下降至6%，就業市場陸續重回軌道，意味著打工仔有更多的轉工機會。讀者Mandy就是其中一位想轉工的打工仔，她表示最近自己不停留意所屬的行業職位空缺，見有間公司招聘人才，因此Mandy見有合適的職缺便網上應徵。果然，不足一星期該公司便邀請Mandy進行面試，可是在整個見工過程中，Mandy從HR的語氣和問題發現有古怪，懷疑該公司借招聘名義，實情有其他目的…

按圖了解讀者Mandy的見工奇遇記︰
讀者Mandy︰「我讀書時係主修Marketing，因為對呢個行業有興趣，同埋唔會好似普通文職咁齋坐，成日都要諗Idea，所以我出嚟做嘢繼續留喺呢行。我而家做緊一間中小企嘅Marketing，見呢排出面個市幾好，咪諗住Send下CV，睇下有冇更好嘅機會。

我喺求職網見到有間都算出名嘅公司，瘋狂出招聘廣告，上至Director，下至Assistant都請。其實當下我無咩留意，見到有啱嘅空缺，我就申請。唔使一個禮拜，有個HR打畀我叫我上佢公司見工。我自問自己係有責任感嘅人，所以每次面試我都會做足準備。

面試當日，我見到個HR都唔似HR，平時公司啲HR著得好整齊，但呢間公司個HR係T恤牛仔褲。不過算啦，可能係唔同公司有唔同嘅文化啫，我嗰陣無理咁多。但面試過程中，我就覺得越嚟越唔對路…起初佢問我啲背景、工作經驗呢啲都正常，問問下，佢居然係咁問我公司未來嘅方向。仲要唔係問一兩句咁簡單，係詳情咁問…係人都知，你喺度收風啦！而且嗰位自稱HR嘅女士，好似完全唔識HR嘅工作同成個見工程序咁。心諗，如果你係部門嘅主管，唔識HR嘢都話正常呀。但佢明明介紹自己嗰陣話自己係HR！

呢啲都算啦！最過份係臨到面試最後，佢叫我將面試過程中所講嘅Idea、工作建議同而家做緊嘅嘢，寫個Report畀佢…佢係咪黐線㗎？！我做咩要無啦啦寫個Report畀你？當然，最後我係無畀佢啦！經過呢次見工經驗，我真係會好小心揀公司，只係無諗過一間大公司，佢哋內部嘅運作會咁差咁亂。

奉勸各位打工仔，唔好為咗一份工而出賣個人同公司資料，隨時得不償失呀！」

延伸閱讀︰【勞工法例】試用期內辭職7日通知？點解打工仔被HR鬧曠工？盤點奇怪招聘廣告用語  有介紹費算唔算伏工？
有公司為了吸引更多求職者應徵職位空缺，在招聘廣告中加入大量奇怪的廣告用語，不過這些廣告可信性有多高呢？早前有網民盤點多個伏工的特徵，看看你又遇過幾多個︰

延伸閱讀︰【見工奇遇記】面試要求職者除口罩？HR被質疑睇樣請人︰選佳麗呀？

延伸閱讀︰【見工奇遇記】每次面試都被HR玩？打工仔︰隔咗一個月打嚟 叫我聽日返工
 

⏩⏩  需要請人？立即刊登招聘廣告！  ⏪⏪