【職場辛酸】會所姐姐工作13小時後過勞暈倒 同事：內部政策搞到天怒人怨！

在以工作步伐急促聞名的香港職場生存，壓力已經非常龐大，更何況是吃力不討好、經常被人投訴的服務行業？有網友於香港討論區發文，公開自己於私人會所工作的情況，控訴管理層在長期人手短缺的情況下，依然增加員工的工作量，令員工最終因體力不支而暈倒。無奈員工多次向上級投訴不果，只能於網上發文抱怨，祈求令更多人知道於私人會所工作的辛酸⋯⋯

+18

+17

事主：我真係好想講下喺呢間私人會所嘅工作情況。

事主：三個星期前，會所一位姐姐做咗13個鐘之後，喺收工嗰刻過勞失去知覺暈咗。好彩救護車嚟到嘅時候位姐姐已經醒咗，但公司只當例行病假，冷處理不了了知。

事主：以前呢間私人會所個老闆的確係個好僱主，喺呢間機構工作都識咗好多做咗10年至20年嘅同事，都係話公司有幾好。

事主：疫情開始嘅時候，我哋都係放無薪假，好多人都好羨慕；疫情最高峰時大家都係咁清假，清到無晒大假先有得放疫情假，無扣減任何人工。

事主：當然，好多同事都因為中咗新冠返唔到工，到疫情第二次高峰期時，管理層開始改變策略：先扣假及再扣鐘。

事主：咁係咩意思？即係當你放完你有嘅假期，然後公司決定無得開門嘅時候會要求你放假，但無曬假就每日扣你9個幾鐘，最終人人都欠公司200個鐘以上，咁唯有每日都加班去還。

事主：當呢件事不停地發生要求你閂門扣鐘，咁就還咗一年都未還得晒啦。所以人人都要還，日日做11個鐘。

事主：自從年中開始，唔計一般員工，中階經理級走咗一半。

事主：從疫情前到今日，人手減咗兩成以上，有啲清潔部仲慘，日日返去就係聽到減預算、減人手追生意。

事主：自從疫情開始，酒店街檔都無生意，但會所因為防疫做得唔錯，所以唔敢去出面食飯嘅人都嚟晒呢度。

事主：但我哋嘅人手比疫情前少咗兩成，平時已經踢晒腳，何況係依家？

事主：連啲會員都問我哋點解個場無人，會費就年年都加，招呼客人嘅人手就年年都減⋯⋯

事主：我身為員工真係唔識答。依家得返咩人？咪就係啲有家庭、做咗10幾20年嘅人，你叫佢哋點走？咪唯有頂硬上，一個人做兩個人嘢。

事主：我哋有個「與總經理對話」嘅活動，每位同事都反映唔夠人手，回應係「有業績可解決任何東西」，聽完真係得啖笑⋯⋯

事主：我哋做會員制，幾多人嚟食飯我可以控制到㗎咩？點解要推個責任喺我哋身上？減咁多人手點做好啲服務？叫會員點返嚟？

事主：是但行入銅鑼灣間茶餐廳都多人手過我哋。如果計返面積，分分鐘連佢哋一半人手都無⋯⋯

事主：做咩要不停減我哋人手，變到每日就係追業績而唔係服務行先？究竟呢個係咩邏輯？

事主：個名氣喺行頭已經唔好啦，人手一個個咁流失又請唔返。然後過兩個月覺得你哋又做到喎，又Cut咗個位。咁都得？

事主：講返轉頭，先喺疫情扣到你欠公司200、300個鐘，然後再減你人手，一人做兩人做嘅嘢，再人人都做11個鐘以上去OT還鐘。

事主：終於有人過勞暈咗，人事部聲都無出，坐喺總部嘅淨係會睇數字，分分鐘連有件咁嘅事都唔知。

事主：救命，有無一齊做緊嘅同事講吓點先反映到畀高層知？

即睇網民回覆：

+3

+2

網民：依家啲管理層唔會理你㗎喇，搵錢最緊要。CEO加到上三千幾四千萬人工，然後今年全部部門要減6% Cost，所以仲點會請人幫你？

網民：其實無乜渠道可以令上面嘅高層知道，之前都有其他部門同事投訴上去，但最終都係被對上一層講幾句就了咗件事⋯⋯

網民：啲高層好識做門面功夫，有好多無理政策強行要求下屬執行，好多有能力嘅人都係一個一個被佢逼走！

網民： 我相信如果班高層落嚟做我哋個位，絕對無一個有能力做到佢哋要求嘅服務及政策！

網民：成班高層淨係得把口，從來無了解清楚實質情況同員工工作壓力，做得最多嗰班員工反而係最低收入。

網民：希望工會可以做到一啲反映畀高層，不過唔好有太大期望⋯⋯

細心留意身體狀況 謹記避免工作過勞
工作過勞會隨時間不斷累積，可以造成許多症狀，並誘發許多疾病。在累積疲勞的過程中，身體會出現以下5個警號，工作壓力龐大／長時間工作的打工仔要多加留意了！

1：眼睛乾澀
眼睛酸痛、乾澀，甚至視力模糊都是用眼過度的症狀，工作一段時間後不妨嘗試望望遠方景物，讓眼睛休息一下再重新投入工作。

2：肩頸僵硬酸痛
於辦公室工作的人士需要長時間對着電腦工作，維持固定姿勢會令頸椎、韌帶退化，肌肉會出現痙攣與痠痛，造成頸椎疲勞。要避免症狀發生便要不時伸展肩頸，讓頸椎給肌肉得到放鬆。

3：記憶力減退
因為長時間精神緊繃會導致記憶力減退、經常忘記工作細節，更會難以集中精神專注工作。改變心態，以輕鬆豁達的心境面對工作，便能避免記憶力衰退或減少患上心理疾病的風險。

4：短期內快速掉髮
長期精神緊繃除了會導致記憶力減退，更會導致短期內快速掉髮，令儀容更顯憔悴。

5：情緒管理失控
工作量大與壓力大時，大腦會潛意識偏向儲存消極負面的記憶，讓人情緒煩燥，或是心情低落、產生悲觀的想法。

+9

+8

延伸閱讀︰【職場辛酸】香港打工仔悲歌？ 樓主：放工後嘅私人時間所剩無幾⋯⋯

延伸閱讀︰【職場辛酸】盤點5個送貨員辛酸 網民：以為日曬雨淋已經好辛苦⋯⋯

延伸閱讀︰【職場辛酸】放完產假工作報告被評D級 事主：搵平機會告唔告得入？

延伸閱讀︰【職場辛酸】服務業的辛酸！網民力數客人講過最「無厘頭」嘅說話

最新專訪片︰
【星級斜槓族】港隊劍擊運動員吳諾弘專訪 中五停學決心打劍 東奧後卻遇職業生涯最低潮

⏩⏩  需要請人？立即刊登招聘廣告！  ⏪⏪