Next
【職場熱話】減人手時被裁 市道好轉再食回頭草 網民：無其他選擇？
【職場熱話】減人手時被裁 市道好轉再食回頭草 網民：無其他選擇？
2022-06-01
兩年多來，不斷反覆的疫情影響各行各業，旅遊、航空、飲食等行業可謂首當其衝，生意額一直受到影響，更有許多商家因而抵受不住而結業，而剩下來的無可避免要裁員節流。經歷本港至今最嚴重的第五波疫情後，市面逐漸恢復正常，假如你曾在減人手期間被裁，你會否在市道好轉時重返呢？這條問題最近在「香港討論區」有激烈的討論，皆因有人指其朋友竟然苦等兩年重返舊公司。
延伸閱讀：【職場熱話】前上司send訊息噓寒問暖 事主：實情佢叫我返去舊公司…
即睇發文者分享及網民回應：（按圖了解）
發文者：「有朋友喺疫情最初期嗰陣因為公司要裁員所以畀人炒咗，兩年幾嚟都係做part time同埋靠屋企人畀生活費佢。最近佢舊公司請返多啲人，佢竟然係自己send CV去公司到再interview返去做……
原來呢兩年幾時間無搵第二份正職做就係為咗等間公司再請人佢再返去做，但佢又無諗過如果唔請返佢嘅話咁點算。佢有其他同事嗰陣都係畀人炒，不過係舊公司問佢哋要唔要返去做，但我朋友就係自己再interview咁返去做……
唔知咁樣待遇有無唔同嘅呢，如果係我，我唔會等間公司再請人嗰陣自己再返去in囉，咁晒自己時間。」
網民：佢咁鍾意間公司嘅？
網民：等2年都係為咗今日……
網民：第一次畀人炒，下次公司再有事都係會炒你朋友先。
網民：如果Like你，最初肯定唔會揀你炒，炒你肯定對你心中產生不滿。
網民：唔好太認真，可能實情係你朋友一直都搵唔到其他full time，所以才申請返舊公司的職位。
網民：如果間公司一路唔請返人，或者請人但唔請返佢，佢就慘……
網民：呢鋪真係好大嘅一鋪人生賭注，畀佢個朋友賭贏咗。不過兩年無工作搵少兩年錢，可能得不償失。
網民：可能你朋友一心諗住做生不如做熟，不過佢無諗過舊公司會唔會再請返佢呢……
網民：我覺得好恐怖，個感覺就似係你同條女分手，條女特登唔去識人，等住返嚟你身邊。
網民：聽過有啲公司會請返被裁員（不是犯錯被炒的）的舊員工，原因是公司遺棄了你，公司有少少責任。但在有得揀的情況下，不會招請那些自己辭職的舊員工，原因是公司覺得佢哋不忠。
究竟一眾打工仔網民會唔會食回頭草？（按圖了解）
會食回頭草
網民：好草不怕回頭吃。
網民：睇下咩工啦！行頭窄，例如揸飛機唔去A公司就去B邊有得你揀？
網民：問題係有無其他更好嘅選擇？如果無，又等錢開飯，就算公司係你嘅殺父仇人，佢肯請你，你都要返去㗎啦。
網民：佢呢兩年幾搵唔搵到嘢做先？如果搵唔到就返去做，或者老細經過呢兩年幾覺得佢好。
不會食回頭草
網民：唔好話炒，就算係自己辭工都唔會食回頭草。
網民：如果係我就唔會返公司做，就算無嘢做公司搵返我都唔會返。
網民：如果係炒出嚟，一定唔會返去做，做人要人骨氣。
網民：好馬不吃回頭草，我就一定唔會返去做。
網民：如果係我，就會搵過第二間公司。
網民：晨早揾第二份工啦！仲等！人生有幾多個兩年！
網民：我唔會食回頭草，last day踏出舊公司就唔諗住返轉頭。你朋友唔係舊公司誠邀佢返去，係自己出面撈唔掂返去，之後舊公司亦都唔會器重佢。
好馬不吃回頭草？ 網民：睇情況做人
常言道：「好馬不吃回頭草。」大部分打工仔都不會重返舊公司工作，皆因這會給其他人有「不能在外面生存」、「厚臉皮」等負面印象，有打工仔留言表示，不論甚麼原因而離開公司也不會重返舊職，即使「無嘢做而（舊）公司搵返我都唔會返」。
一名網民毫不忌諱直斥發文者朋友浪費時間，虛耗兩年人生等待未必出現的機會。有人認同相關說法，認為等待舊職重新招聘舊人是場賭注。話雖如此，部分人留言提及一些行業行頭窄，重返可能都是無可厚非的，應視乎情況，不能一概而論。另有人持類似意見，認為做人應該「能屈能伸」。
疫情期間，常有企業裁員節流的消息傳出，有人指該等公司可能只是迫不得已，「唔代表間公司差」。不過，另有人反駁：「如果對你感到滿意，最初肯定唔會揀你炒。」
「會否吃回頭草」這道問題，相信大家都有自己的答案，但最重要的當然是有一份安穩而不討厭的工作。
轉工象徵要離開舊職，究竟點樣先可以好好包裝離職原因呢？不妨參考以下6大模範答案！
見工被問上一份工離職原因 6大模範答案得HR歡心（按圖了解）
延伸閱讀：【職場熱話】打工仔失業返舊公司做Part Time 遭前同事取笑「無出息」
延伸閱讀：【薪酬待遇】失業兩個月有面試機會 打工仔︰被HR壓價20%做唔做好？
Look out for further updates on our Facebook fan page!
Follow CTgoodjobs for the latest career news, hot topics and recommended jobs!