風雨安排早溝通 返工放工更輕鬆

資料來源︰勞工處

主管阿超與新入職的阿欣，談論公司在惡劣天氣下的工作安排。

阿欣：「天文台話呢幾日有機會打風，打得成嘅話，公司會唔會有特別嘅工作安排啊？」

阿超：「如果喺返工期間內，天文台預告將會發出八號熱帶氣旋警告信號，除必要人員，同事可以分批返屋企。至於八號風球或者黑色暴雨警告信號取消後復工安排，同事應跟從事先同公司嘅協定。如果員工嘅工作性質合適，公司會安排佢哋在家工作。」

阿欣：「如果同事受惡劣天氣嘅影響而返唔到工，可以點做呢？」

阿超：「如果員工返工有困難，應該盡快通知上司，毋須立即返工。公司唔會因為咁而唔出糧、扣減勤工獎或者津貼。老闆話最緊要做好溝通，幾時都係員工嘅安全行先。」

阿欣：「呢個颱風有可能係超強颱風，如果政府公布『極端情況』，工作安排會係點呢？」

阿超：「如果政府因超強颱風或其他大規模天災而公布『極端情況』，除咗預先協定嘅必要人員之外，員工喺『極端情況』期間，應該留喺安全地點，毋須立即返工，仲要密切留意政府嘅公布。」

阿欣：「如果每個僱主都好似我哋老闆咁通情達理，按個別僱員面對嘅情況彈性處理，又兼顧我哋嘅安全，咁就好喇！」

阿超：「老闆之前參考咗勞工處嘅《颱風及暴雨情況下工作守則》（https://www.labour.gov.hk/tc/public/pdf/wcp/Rainstorm.pdf）。你都可以睇吓㗎。」

⏩⏩  需要請人？立即刊登招聘廣告！  ⏪⏪