【職場熱話】工作被認可但遲遲冇得升 主動爭取被老闆話:唔知足!

【職場熱話】工作被認可但遲遲冇得升 主動爭取被老闆話:唔知足!

職場上很難有公平事,有時為工作付出了很多,卻未必會有相應的回報。相信不少打工仔都會有經歷過,明明自覺工作能力優秀,上司亦常委以重任,比同輩明顯受重視,理應可以升職加人工;可是,這些機會卻總落在身邊本為平平無奇的同事身上,看着身邊的同事一個一個比自己遲來先上岸,定感不是味兒;但當你向上司爭取,上司只是表示自己無能為力,又或者覺得你自視過高,應該先做好自己的本份才對。這時,你會感到很無奈和灰心吧?我們都明白。

延伸閱讀:【職場熱話】外國返工唔介意講幾錢人工 點解香港打工仔咁介意?

有網民亦就相類似事件在社交平台專頁「奴工處」上投稿,她以「我想升職,老細鬧我唔知足」為題,分享自己在公司受到不公平的對待,不公平之餘,更加是不尊重!不少網民看畢她的分享後,覺勸她辭職,希望她可以有一個新開始!

事主:「我喺公司做咗接近5年,呢度嘅同事同客戶全部都好好,我好鍾意呢到,好唔捨得離開呢度。但係呢一年真係好唔開心、好辛苦,呢半年幾乎日日都好想喊,只要一返到位就會好想喊。已經試過喺公司唔同嘅地方喊到天昏地暗,喊到好攰好攰,每日都好似行屍走肉,我寧願我真係癲咗。」

即睇事主分享及網民回應:(按圖了解)

事主:「老細曾經講過話會畀機會我試吓,好多高層都睇我,個個都話我做到嘢,個個都問點解仲未輪到我?我都好想知點解,但我又好似睇透咗,而老細根本唔會答你點解。有一日老細叫咗我同幾個高層入房,但偏偏冇叫最睇我嗰位高層入去,入到去佢講埋晒啲極難聽嘅說話。

好似講到我呢個位係乞返嚟,好似話某啲項目都已經畀我負責晒仲想點,又話我唔知足,唔識進退,我喺度咁多年,明明就係你親口應承我,否則我都唔會做咁耐。我望住啲明明我嘅機會去咗第二個人到,如果接手嗰個好叻好醒,我都心服口服,但係唔係囉!我已經決定唔再做落去,但係我仲未搵到工,遞唔到信,因為我手停口就停……」

網民:「職場嘅嘢,一日未升,一日都唔好咁天真信,努力搵工喇,加油!」

網民:「老細就係知你手停口停先會壓榨你,香港就係咁不知所謂!但魚唔過塘唔肥,努力搵工跳走啦!」

網民:「認真,樓主真係要注意吓自己嘅情緒問題,走定留都唔係問題,身體緊要呀!」

網民:「咁咪邊搵邊hea做。為份工做到癲,唔好玩。唔好彩真係中,到時你幾年嘅人工可能畀晒醫生或用來康復。」

網民:「對工作有要求,係同自己交功課,唔係交功課畀老細,我話之你咩公司文化,嘢我做足,經理話過我準時收工,咁又點?老細喺度我照樣準時走人。呢幾年打工全用兼職心態,條件啱就繼續,今日唔知聽日事,加薪升職花紅有就當中獎,命就唔再賣啦,賣啲時間畀老細咁解,無欲則剛。」

網民:「升唔到職唔緊要,轉工就得! 唔使低聲下氣。 老細嘅承諾,聽聽就好,不要上心。」

網民:「我之前都試過,嬲嬲哋辭職,轉工升咗兩級。」

網民:「小朋友,你個經歷,我廿年前都試過,但我唔會喊,搵到工就走,仍然好來好去。做人不是為份工,做人,要學懂豁達!喺香港呢廿幾年睇見最高層職位變化,大家都應該睇化!做到高位,係講運,唔係講能力!」

 

調節自己的心態
很多網民都深表同情,因為很多人都有經歷過事主的情況,但大家都指事主可以嘗試調節自己的情緒,不用為此而哭到天崩地裂,要知道老細的說話、承諾都是不值錢亦不可盡信。雖然有網民很極端地認為「無欲則剛」,指:「呢幾年打工全用兼職心態,條件啱就繼續,今日唔知聽日事,加薪升職花紅有就當中獎,命就唔再賣啦,賣啲時間畀老細咁解。」

不過,明白事主都會想為事業拼搏,並覺得自己的工作能力值得被肯定,所以,未必一定要做到無欲則剛,但了解到自己追求的是甚麼時,就可以先忍耐,然後一邊尋找更適合自己的工作,別被那些難聽的說話打擊到,要對自己有信心,不是別人說一句話就要否定自己的努力。有網民鼓勵事主指,現階段可以放輕鬆地搵工,別迫得自己太緊。同時提醒事主要關注自己的情緒問題,指:「走定留都唔係問題,身體緊要呀!」
 

延伸閱讀:【職場熱話】外國返工唔介意講幾錢人工 點解香港打工仔咁介意?

延伸閱讀:【職場熱話】同事玩大咗 將榴槤放老細房 換嚟嘅懲罰竟然係…

延伸閱讀:【職場熱話】如果公司規定入辦公室要換拖鞋 大家贊成定反對?

延伸閱讀:【職場熱話】你在侮辱上司而不自知?你有冇做過呢6個行為?

⏩⏩  需要請人?立即刊登招聘廣告!  ⏪⏪

Look out for further updates on our Facebook fan page!

Jobs You Maybe Interested In

刊登招聘廣告
;