僱傭模式種類多 勞工權益知清楚

資料來源: 勞工處

小雲在茶水間碰到同事阿晴，兩人談到不同的僱傭模式和勞工權益。

小雲：「阿晴，一陣不如一齊食午餐啊？」

阿晴：「唔好意思，我諗唔得啦，我趕住去上堂。嚟緊兩年我都係上晝返工，晏晝返學。」

小雲：「吓？咁你咪變咗做兼職？仲有冇保障㗎？」

阿晴：「其實課程開始前，我已經同公司商量好，喺雙方同意下轉做兼職，仲簽咗新合約作實。依家雖然係兼職，但我仍然根據『連續性合約』受僱。除享有《僱傭條例》所規定嘅各項基本保障，我仲有疾病津貼、法定假日薪酬、有薪年假等權益同福利㗎！」

小雲：「咁就好啦，唔係間間公司都同僱員有商有量㗎！我朋友都係做兼職，但佢老闆為咗迴避勞工法例下作為僱主嘅應有承擔，竟然刻意限制佢嘅工作時數。」

阿晴：「其實所有僱員，無論係擔任全職或兼職、長工或散工、臨時工、替工或者係以件計酬嘅工作等，不論名稱，都係受《僱傭條例》保障㗎！僱主應該按業務上實際嘅運作需要，彈性聘請僱員，而唔係用其他手段逃避責任。」

小雲：「無錯！以任何僱傭模式受聘嘅僱員都係公司嘅寶貴資產，每個僱主都應該實施良好嘅人事管理，咁員工嘅士氣、忠誠度同生產力都會高啲啦！」

阿晴：「係啊！小雲，我夠鐘去上堂啦，如果你或者你朋友想知多啲僱傭模式同勞工權益嘅資訊，可以參考勞工處相關嘅小冊子㗎！」

勞工處《僱傭模式種類多 勞工權益知清楚》小冊子

⏩⏩  需要請人？立即刊登招聘廣告！  ⏪⏪