Next
兼職賺外快 小心假自僱
兼職賺外快 小心假自僱
2022-09-23
資料來源:勞工處
半工讀的阿德打算做兼職送遞員賺取外快，向表哥阿超請教相關的勞工法例。
阿德：「間公司叫我簽一份自僱人士合約，而唔係僱傭合約。我點樣分辨自己屬於僱員定自僱人士？」
阿超：「要分辨呢兩種身分，須要考慮所有相關嘅因素，包括對工作程序、時間同工作方式等安排嘅控制權、工作時所需嘅工具同物料嘅提供與擁有權、係咪自行經營業務同負上投資及管理責任等。」
阿德：「公司會規定我嘅工作時間同方式，仲提供全部工具，我只係收人工，會唔會係『假自僱』呢？」
阿超：「可能係㗎！所以你簽約前要同公司了解清楚自己屬於僱員定係自僱人士。係僱員嘅話，公司冇得逃避作為僱主嘅責任㗎！如有爭議，最終詮釋會以法庭嘅判決為依歸。」
阿德：「兼職僱員同自僱人士嘅權益同保障又有咩分別呀？」
阿超：「《僱傭條例》並唔適用於自僱人士。至於兼職僱員，無論每星期工作時數幾多，都同全職僱員一樣，受到《僱傭條例》嘅基本保障，例如支付工資嘅安排、扣薪限制同享有法定假日。如果僱員連續受僱於同一僱主四個星期或以上，每星期工作唔少過 18 小時，更可享有有薪年假、法定假日薪酬、疾病津貼、遣散費或長期服務金等嘅權益。」
阿德：「唔該表哥。」
阿超：「想知多啲，可參考勞工處印製相關嘅小冊子，或者去勞工處勞資關係科辦事處查詢。」
《受聘形式雙方定 辨清身分保權益》
《『兼職』僱員 ─ 勞工法例知多點》
Tags︰
Look out for further updates on our Facebook fan page!
Follow CTgoodjobs for the latest career news, hot topics and recommended jobs!