Next
【裁員潮來臨？】打工仔好奇他人公司境況 大呻公司裁員不斷！網民：公司準備炒晒成個部門……
【裁員潮來臨？】打工仔好奇他人公司境況 大呻公司裁員不斷！網民：公司準備炒晒成個部門……
2024-12-17
市場大環境如公司發展息息相關，若果市況未如理想，不少公司都會選擇重整架構，又或裁員以減省公司成本。近日，有網民於連登討論區以「大家今年公司咩環境……」為題發帖，分享公司裁員不斷，因而好奇其他網民公司的情況，欲知市道是否如想像中那樣不景。
事主分享及網民回應
事主：而家外面市道咁差，成個社會風向都講緊公務員應該減人工或者減咁啲職位。想問吓大家做私人公司又係咩環境？我而家返工返咗半年，已經炒咗4個，收到風過年前仲會炒多5個……然後今日又收到風，有個同事被人炒。點解返工返到好似玩大逃殺咁……
網民A：我啲同事已經清緊個位……
網民B：我公司擴充人手，IT部門開多咗條新team。
網民C：公司賺緊錢，不過就藉住巿道差做藉口，炒咗幾位同事，然後佢哋跟緊嘅嘢分晒畀其他人，啲同事一個人要做兩份嘢都唔敢嘈。
網民D：我公司請緊admin，人工得$1.6萬，都收到百幾份CV，你覺得係咩環境？
網民E：前排feel到間公司唔多掂，之後就有send吓CV搵工，但最後搵唔切，10月全team人收到解僱通知做到年尾就走。我已經搵咗2個幾月，有啲工見到final round都無offer。啲朋友話年頭就會好返啲，我開始驚過完新年市道都係咁差……
利申：我做會計，完全無咩中層嘅職位，就算有都要同100幾、200人爭一個位；中資公司仲誇張，400、500人爭一個位……
網民F：我幾個幾星期前已經畀公司炒咗，而家努力搵工中……喺我被裁之前，公司已經炒咗10幾個人了……
網民G：老細年年都同我講公司今年賺唔到錢。
網民H：老闆話生意好差，無錢賺所以唔會加人工，不過同時佢又換咗新車、買大咗間屋。
網民I：係咪得我一個想喺呢段時間裸辭？而家一個人要做兩個人嘢，就嚟頂唔順啦！
網民J：公司準備炒晒成個部門，佢哋啲嘢就準備交畀我哋部門負責晒……
網民K：啲嘢多到做唔晒，公司而家仲請緊人，好多同事轉工自己走，完全無見過有同事被人炒……
延伸閱讀：【中年失業】中年打工仔遭裁員 自信心大受打擊 網民：收拾心情開始搵工啦！
帖文一出，旋即引起網民熱烈討論，眾多網民均表示公司裁員不斷，例如「準備炒晒成個部門」、「幾個禮拜入面10幾位同事裁員」等，有網民表示公司聘請行政文員，月薪只得$1.6萬仍收到數百人申請，可見市道不景氣，因此勉勵其他網民應盡力表現自己，以免成為裁員大軍。
不過，有部分網民表示，有不少無良僱主知道公司賺取盈利，但藉市道差為藉口而裁員，目的是進一步減省公司開支，讓自己可以賺取更多盈利，罔顧員工的生死。亦有部分網民表示，自己所在的公司招聘良久仍未聘請到足夠人手，而且眾多同事都是成功轉工而選擇離職，並非遭到公司裁員。
按圖即看老闆辭退員工前通常會出現的5大徵兆：
延伸閲讀：【職場熱話】金融業裁員 中層打工仔想犧牲自己保下屬 被高層咁樣拒絕……
按圖即看4種能夠脫離裁員名單的員工特質：
延伸閲讀：【解僱員工】被炒仲要幫手配合老細？打工仔：佢叫我做到有人接手先走⋯⋯
最新專訪片︰
【Office豪華旅行團】安永會計重視多元和企業社會責任 培養包容性的企業文化
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!