【職場熱話】真係咁易炒人？上司日日灌輸「畀着係其他公司一早炒咗你」！網民：佢只係催眠緊你

2024-11-01

打工仔工作繁忙，有時候會因工作過於趕急而有所出錯，若只是一些小錯的話，普遍上司或同事都會作出善意提醒。不過，有部分上司會捉緊機會，試圖情緒勒索員工，貶低他們的自尊心，甘願為公司賣命。

有網民於連登討論區發文，指上司一旦發現自己在工作上出錯時，就會說出「畀着係其他公司一早炒咗你啦」，使樓主不禁質疑自己的工作能力，亦好奇其他公司會基於怎樣的原因而決定解僱員工。

延伸閱讀：【被炒原因】被解僱全因1種特質？網民安慰：你值得更好！

按圖了解事主及網民回應：

+14

+13

事主：我而家返緊呢份工，係由我fresh grad就開始做，做咗大概有4年幾。呢4年入面，有時做嘢都會有啲小甩漏，例如文件打錯字、畀漏文件同事咁。近呢兩、三年，我上司只要一見到我做錯嘢，就會灌輸我「畀着係其他公司一早炒咗你啦」嘅思想，仲同我講「出面好難搵得返咁好嘅公司」，搞到我每晚都會反思自己能力係咪真係咁差。同埋真心好奇想知其他公司點先會決定炒人？

網民A：你上司咁講係等你唔敢轉工，或者唔敢叫公司加人工畀你。

網民B：唔使驚！香港好少公司會炒人，除非係細公司、公司業績差、你做咗大鑊嘢先會被炒。

網民C：返工有邊個唔會做錯嘢？

網民D：啲人開始唔畀嘢你做、你時間鬆動咗但隔籬忙到癲、冇乜同事同你吹水，或者傾公事嗰陣唔同你眼神接觸，有其中一項嘅話你就知你就快被人炒。

網民E：佢只係催眠緊你，等你覺得你仲可以留低繼續做係公司對你好，而唔係你有幾好嘅工作能力。

網民F：如果真係要炒就一早炒咗啦，仲日日同你講想炒你咩？

網民G：建議樓主你攞本筆記簿寫低有乜要做，唔好畀自己有機會做漏嘢，然後又畀到機會你上司話你！

網民H：大公司唔會主動炒人，通常都會等你自己辭職，咁公司就唔使賠錢。

網民I：日日同你講「公司有幾好幾好」，「出面搵唔返咁好嘅公司」，講得出口通常都係有伏，公司係好嘅邊使日日提住啲員工。

網民J：呢啲係情緒勒索技巧嚟，貶低你自尊，同時拉高公司喺你心目中嘅地住，令你之後唔可以擺脫公司對你嘅控制。我係你就而家開始send吓CV，搵定其他工。

網民K：間唔中有啲小錯好平常，只要你overall係做到嘢，公司就唔會炒你！

延伸閱讀：【職場熱話】冇啦啦畀上司針對做乜都會畀佢鬧一餐…… 事主：我係咪得返辭職呢條路？